hasan kuza-gar (4)

jahāñ-zād kaise hazāroñ baras ba.ad

ik shahr-e-madfūn kī har galī meñ

mere jaam o miinā o gul-dāñ ke reze mile haiñ

ki jaise vo is shahr-e-barbād kā hāfiza hoñ

hasan naam kā ik javāñ kūza-gar ik na.e shahr meñ

apne kuuze banātā huā ishq kartā huā

apne maazī ke tāroñ meñ ham se piroyā gayā hai

hamīñ meñ ki jaise hamīñ hoñ samoyā gayā hai

ki ham tum vo bārish ke qatre the jo raat bhar se

hazāroñ baras reñgtī raat bhar

ik darīche ke shīshoñ pe girte hue saañp lahreñ

banāte rahe haiñ

aur ab is jagah vaqt kī sub.h hone se pahle

ye ham aur ye naujavāñ kūza-gar

ek ruuyā meñ phir se piro.e ga.e haiñ

jahāñ-zād

ye kaisā kohna-parastoñ kā amboh

kūzoñ kī lāshoñ meñ utrā hai

dekho

ye vo log haiñ jin kī āñkheñ

kabhī jaam o miinā kī lim tak na pahuñchīñ

yahī aaj is rañg o roġhan kī maḳhlūq-e-be-jāñ

ko phir se ulaTne palaTne lage haiñ

ye un ke tale ġham kī chiñgāriyāñ pā sakeñge

jo tārīḳh ko khā ga.ī thiiñ

vo tūfān vo āñdhiyāñ pā sakeñge

jo har chīḳh ko khā ga.ī thiiñ

unheñ kyā ḳhabar kis dhanak se mere rañg aa.e

mere aur is naujavāñ kūza-gar ke

unheñ kyā ḳhabar kaun sī titliyoñ ke paroñ se

unheñ kyā ḳhabar kaun se husn se

kaun sī zaat se kis ḳhadd-o-ḳhāl se

maiñ ne kūzoñ ke chehre utāre

ye sab log apne asīroñ meñ haiñ

zamāna jahāñ-zād afsūñ-zada burj hai

aur ye log us ke asīroñ meñ haiñ

javāñ kūza-gar hañs rahā hai

ye māsūm vahshī ki apne hī qāmat se zholīda-dāman

haiñ juuyā kisī azmat-e-nā-rasā ke

unheñ kyā ḳhabar kaisā āseb-e-mubram mere ġhaar siine pe thā

jis ne mujh se aur us kūza-gar se kahā

ai hasan kūza-gar jaag

dard-e-risālat kā roz-e-bashārat tire jaam o miinā

kī tishna-labī tak pahuñchne lagā hai

yahī vo nidā ke pīchhe hasan naam kā

ye javāñ kūza-gar bhī

pyāpe ravāñ hai zamāñ se zamāñ tak

ḳhizāñ se ḳhizāñ tak

jahāñ-zād maiñ ne hasan kūza-gar ne

bayābāñ bayābāñ ye dard-e-risālat sahā hai

hazāroñ baras ba.ad ye log

rezoñ ko chunte hue

jaan sakte haiñ kaise

ki mere gil o ḳhaak ke rañg o roġhan

tire nāzuk aazā ke rañgoñ se mil kar

abad kī sadā ban ga.e the

maiñ apne masāmoñ se har por se

terī bāñhoñ kī pahnā.iyāñ

jazb kartā rahā thā

ki har aane vaale kī āñkhoñ ke mābad pe jā kar chaḌhā.ūñ

ye rezoñ kī tahzīb pā leñ to pā leñ

hasan kūza-gar ko kahāñ lā sakeñge

ye us ke pasīne ke qatre kahāñ gin sakeñge

ye fan kī tajallī kā saaya kahāñ pā sakeñge

jo baḌhtā gayā hai zamāñ se zamāñ tak

ḳhizāñ se ḳhizāñ tak

jo har naujavāñ kūza-gar kī na.ī zaat meñ

aur baḌhtā chalā jā rahā hai!

vo fan kī tajallī kā saayā ke jis kī badaulat

hama ishq haiñ ham

hama kūza-gar ham

hama-tan ḳhabar ham

ḳhudā kī tarah apne fan ke ḳhudā sar-ba-sar ham

ārzueñ kabhī pāyāb to saryāb kabhī

tairne lagte haiñ behoshī kī āñkhoñ meñ ka.ī chehre

jo dekhe bhī na hoñ

kabhī dekhe hoñ kisī ne to surāġh un kā

kahāñ se paa.e

kis se iifā hue andoh ke ādāb kabhī

ārzueñ kabhī pāyāb to saryāb kabhī

ye kūzoñ ke lāshe jo in ke liye haiñ

kisī dāstān-e-fanā ke vaġhaira vaġhaira

hamārī azaañ haiñ hamārī talab kā nishāñ haiñ

ye apne sukūt-e-ajal meñ bhī ye kah rahe haiñ

vo āñkheñ hamīñ haiñ jo andar khulī haiñ

tumheñ dekhtī haiñ har ik dard ko bhāñptī haiñ

har ik husn ke raaz ko jāntī haiñ

ki ham ek sunsān hujre kī us raat kī aarzū haiñ

jahāñ ek chehrā daraḳhtoñ kī shāḳhoñ ke mānind

ik aur chehre pe jhuk kar har insān ke siine meñ

ik barg-e-gul rakh gayā thā

usī shab kā duz-dīda bosa hamīñ haiñ

jahan-zad kaise hazaron baras baad

ek shahr-e-madfun ki har gali mein

mere jam o mina o gul-dan ke reze mile hain

ki jaise wo is shahr-e-barbaad ka hafiza hon

hasan nam ka ek jawan kuza-gar ek nae shahr mein

apne kuze banata hua ishq karta hua

apne mazi ke taron mein hum se piroya gaya hai

hamin mein ki jaise hamin hon samoya gaya hai

ki hum tum wo barish ke qatre the jo raat bhar se

hazaron baras rengti raat bhar

ek dariche ke shishon pe girte hue sanp lahren

banate rahe hain

aur ab is jagah waqt ki subh hone se pahle

ye hum aur ye naujawan kuza-gar

ek ruya mein phir se piroe gae hain

jahan-zad

ye kaisa kohna-paraston ka amboh

kuzon ki lashon mein utra hai

dekho

ye wo log hain jin ki aankhen

kabhi jam o mina ki lim tak na pahunchin

yahi aaj is rang o roghan ki maKHluq-e-be-jaan

ko phir se ulaTne palaTne lage hain

ye un ke tale gham ki chingariyan pa sakenge

jo tariKH ko kha gai thin

wo tufan wo aandhiyan pa sakenge

jo har chiKH ko kha gai thin

unhen kya KHabar kis dhanak se mere rang aae

mere aur is naujawan kuza-gar ke

unhen kya KHabar kaun si titliyon ke paron se

unhen kya KHabar kaun se husn se

kaun si zat se kis KHadd-o-KHal se

main ne kuzon ke chehre utare

ye sab log apne asiron mein hain

zamana jahan-zad afsun-zada burj hai

aur ye log us ke asiron mein hain

jawan kuza-gar hans raha hai

ye masum wahshi ki apne hi qamat se zholida-daman

hain juya kisi azmat-e-na-rasa ke

unhen kya KHabar kaisa aaseb-e-mubram mere ghaar sine pe tha

jis ne mujh se aur us kuza-gar se kaha

ai hasan kuza-gar jag

dard-e-risalat ka roz-e-bashaarat tere jam o mina

ki tishna-labi tak pahunchne laga hai

yahi wo nida ke pichhe hasan nam ka

ye jawan kuza-gar bhi

pyape rawan hai zaman se zaman tak

KHizan se KHizan tak

jahan-zad main ne hasan kuza-gar ne

bayaban bayaban ye dard-e-risalat saha hai

hazaron baras baad ye log

rezon ko chunte hue

jaan sakte hain kaise

ki mere gil o KHak ke rang o roghan

tere nazuk aaza ke rangon se mil kar

abad ki sada ban gae the

main apne masamon se har por se

teri banhon ki pahnaiyan

jazb karta raha tha

ki har aane wale ki aankhon ke mabad pe ja kar chaDhaun

ye rezon ki tahzib pa len to pa len

hasan kuza-gar ko kahan la sakenge

ye us ke pasine ke qatre kahan gin sakenge

ye fan ki tajalli ka saya kahan pa sakenge

jo baDhta gaya hai zaman se zaman tak

KHizan se KHizan tak

jo har naujawan kuza-gar ki nai zat mein

aur baDhta chala ja raha hai!

wo fan ki tajalli ka saya ke jis ki badaulat

hama ishq hain hum

hama kuza-gar hum

hama-tan KHabar hum

KHuda ki tarah apne fan ke KHuda sar-ba-sar hum

aarzuen kabhi payab to saryab kabhi

tairne lagte hain behoshi ki aankhon mein kai chehre

jo dekhe bhi na hon

kabhi dekhe hon kisi ne to suragh un ka

kahan se pae

kis se ifa hue andoh ke aadab kabhi

aarzuen kabhi payab to saryab kabhi

ye kuzon ke lashe jo in ke liye hain

kisi dastan-e-fana ke waghaira waghaira

hamari azan hain hamari talab ka nishan hain

ye apne sukut-e-ajal mein bhi ye kah rahe hain

wo aankhen hamin hain jo andar khuli hain

tumhein dekhti hain har ek dard ko bhanpti hain

har ek husn ke raaz ko jaanti hain

ki hum ek sunsan hujre ki us raat ki aarzu hain

jahan ek chehra daraKHton ki shaKHon ke manind

ek aur chehre pe jhuk kar har insan ke sine mein

ek barg-e-gul rakh gaya tha

usi shab ka duz-dida bosa hamin hain