hasb-e-farmaish

maiñ tujhe phuul kahūñ aur kahūñ bhañvaroñ se

aao us phuul kā ras chuus ke nācho-jhūmo

maiñ tujhe sham.a kahūñ aur kahūñ parvāno

aao us sham.a ke hoñToñ ko ḳhushī se chūmo

maiñ tirī aañkh ko tashbīh duuñ maiḳhāne se

aur ḳhud zahr-e-judā.ī kā talabgār rahūñ

ġhair so.e tirī zulfoñ kī ghanī chhāñv meñ

aur maiñ chāñdnī rātoñ maiñ faqat sher kahūñ

mujh se ye tere qasīde na likhe jā.eñge

mujh se tere liye ye ġhazleñ na kahī jā.eñgī

yaad meñ terī maiñ sulgā na sakūñgā āñkheñ

saḳhtiyāñ dard kī mujh se na sahī jā.eñgī

shahr meñ aise musavvir haiñ jo sikkoñ ke evaz

husn meñ lailā-o-azrā se baḌhā deñge tujhe

tuul de kar tirī zulfoñ ko shab-e-ġham kī tarah

fan ke e.ajāz se nāgin sī banā deñge tujhe

tujh ko shahr kī zarūrat hai mohabbat kī mujhe

ai hasīna tirī manzil mirī manzil meñ nahīñ

naach ghar terī nigāhoñ meñ haiñ raqsāñ lekin

is ta.ayyush kī tamannā.eñ mire dil meñ nahīñ

dekh ke ġhair ke pahlū meñ tujhe raqs-kunāñ

bhiig jaatī hai mirī aañkh sarishk-e-ġham se

mujh ko barsoñ kī ġhulāmī kā ḳhayāl aatā hai

jis ne andāz-e-vafā chhīn liyā hai ham se

mujh ko bhañvrā na samajh mujh ko patañgā na samajh

mujh ko insān samajh merī sadāqat se na khel

terī tafrīh kā sāmāñ na banūñgā hargiz

merī duniyā hai yahī merī mohabbat se na khel

main tujhe phul kahun aur kahun bhanwaron se

aao us phul ka ras chus ke nacho-jhumo

main tujhe shama kahun aur kahun parwano

aao us shama ke honTon ko KHushi se chumo

main teri aankh ko tashbih dun maiKHane se

aur KHud zahr-e-judai ka talabgar rahun

ghair soe teri zulfon ki ghani chhanw mein

aur main chandni raaton main faqat sher kahun

mujh se ye tere qaside na likhe jaenge

mujh se tere liye ye ghazlen na kahi jaengi

yaad mein teri main sulga na sakunga aankhen

saKHtiyan dard ki mujh se na sahi jaengi

shahr mein aise musawwir hain jo sikkon ke ewaz

husn mein laila-o-azra se baDha denge tujhe

tul de kar teri zulfon ko shab-e-gham ki tarah

fan ke eajaz se nagin si bana denge tujhe

tujh ko shahr ki zarurat hai mohabbat ki mujhe

ai hasina teri manzil meri manzil mein nahin

nach ghar teri nigahon mein hain raqsan lekin

is tayyush ki tamannaen mere dil mein nahin

dekh ke ghair ke pahlu mein tujhe raqs-kunan

bhig jati hai meri aankh sarishk-e-gham se

mujh ko barson ki ghulami ka KHayal aata hai

jis ne andaz-e-wafa chhin liya hai hum se

mujh ko bhanwra na samajh mujh ko patanga na samajh

mujh ko insan samajh meri sadaqat se na khel

teri tafrih ka saman na banunga hargiz

meri duniya hai yahi meri mohabbat se na khel