hawa-e-bahaar

vahī havā hai ye jān-e-jānāñ

jo terī zulfoñ se kheltī thī

naqāb ulaTtī hijāb haTātī

tumhārī palkoñ kī chilmanoñ se payām detī

salām letī

vahī havā hai

jo mere bāloñ ko chheḌtī thī

jo tere dast-e-hinā ke shāne se pyaar kartī

yahī havā hai jo tere shab-tār kākuloñ ko

gulāb gāloñ safed shānoñ pe ābshāroñ kā jaal phailā.e

mere hoñToñ ko gudgudātī

dil-o-nigah ko asiir kartī

chaman kī rūh-e-ravāñ thī jaañ thī

vahī havā hai ye mauj-e-paimāñ

junūñ kī zanjīr jhanjhanātī

javāñ lahū ke diye jalātī

hamāre hujre meñ

chāñd sūraj sitāre kitne hī jagmagātī

liye jilau meñ

utartī rahtī thī tere dil-shād qahqahoñ kā fusūñ jagātī

tire badan meñ tarāre bhartī

mire badan meñ tarāre bhartī

'azīm chāhat ke raag chheḌe

kabhī dilampat

kabhī durat aur

kabhī tarāna

tan tanānan

har ek saañs ek taan ban kar

nafas nafas bādbān ban kar

na.e jazīroñ ke sāhiloñ par hayāt-afgan ḳhayāl gaatī

vahī havā hai

vahī havā hai ye jān-e-jānāñ

basant-rut kī sunahrī paa.el

bajātī kangan

vo pighle sone pe lahreñ letī

badaltī rut kā payām letī

javāniyoñ kā salām letī

mirī nigāhoñ ko terī palkoñ se jazb kar ke

vo tere hoñToñ ke jām-e-mai-gūñ se

mere hoñToñ kī tishnagī ko magas kī mānind apne sapne meñ jā samotī

vahī havā hai ye jān-e-jānāñ

kabhī daraḳhtoñ

kabhī chaTānoñ

kabhī kitāboñ meñ naam likhtī

hamāre donoñ ke naam kanda

vafā-e-īfā-e-‘ahd ke haiñ

chamakte raushan nishāñ hamāre

abhī vahīñ haiñ

vahīñ raheñge

malāl kaisā

vahī havā hai

hazīñ na ho jaañ

vahī huuñ maiñ bhī

vahī hai tū bhī

vahī hai tū bhī

magar ye piirī

siyāh bāloñ pe chāñdnī kā ġhubār sā hai faqat ye haala

to ranj kaisā

ki vaqt kā ye purānā tohfa hai

'aql-o-dānish

pyaar meñ to kamī nahīñ hai

havā vahī hai

to aao hañs kar

havā ke jhūle pe jhuul jaa.eñ

suhāg-rut kā ḳhayāl gaa.eñ

‘amīr-ḳhusro’ ke saaz par ham

mah-e-‘asal ke ḳhayāl gaa.eñ

visāl kā ik nayā tarāna

mohabbatoñ kā nayā fasāna

havā vahī hai

vahī hai ai jaañ

tirī mirī dāstāñ vahī hai

wahi hawa hai ye jaan-e-jaanan

jo teri zulfon se khelti thi

naqab ulaTti hijab haTati

tumhaari palkon ki chilmanon se payam deti

salam leti

wahi hawa hai

jo mere baalon ko chheDti thi

jo tere dast-e-hina ke shane se pyar karti

yahi hawa hai jo tere shab-tar kakulon ko

gulab galon safed shanon pe aabshaaron ka jal phailae

mere honTon ko gudgudati

dil-o-nigah ko asir karti

chaman ki ruh-e-rawan thi jaan thi

wahi hawa hai ye mauj-e-paiman

junun ki zanjir jhanjhanati

jawan lahu ke diye jalati

hamare hujre mein

chand suraj sitare kitne hi jagmagati

liye jilau mein

utarti rahti thi tere dil-shad qahqahon ka fusun jagati

tere badan mein tarare bharti

mere badan mein tarare bharti

'azim chahat ke rag chheDe

kabhi dilampat

kabhi durat aur

kabhi tarana

tan tananan

har ek sans ek tan ban kar

nafas nafas baadban ban kar

nae jaziron ke sahilon par hayat-afgan KHayal gati

wahi hawa hai

wahi hawa hai ye jaan-e-jaanan

basant-rut ki sunahri pael

bajati kangan

wo pighle sone pe lahren leti

badalti rut ka payam leti

jawaniyon ka salam leti

meri nigahon ko teri palkon se jazb kar ke

wo tere honTon ke jam-e-mai-gun se

mere honTon ki tishnagi ko magas ki manind apne sapne mein ja samoti

wahi hawa hai ye jaan-e-jaanan

kabhi daraKHton

kabhi chaTanon

kabhi kitabon mein nam likhti

hamare donon ke nam kanda

wafa-e-ifa-e-‘ahd ke hain

chamakte raushan nishan hamare

abhi wahin hain

wahin rahenge

malal kaisa

wahi hawa hai

hazin na ho jaan

wahi hun main bhi

wahi hai tu bhi

wahi hai tu bhi

magar ye piri

siyah baalon pe chandni ka ghubar sa hai faqat ye haala

to ranj kaisa

ki waqt ka ye purana tohfa hai

'aql-o-danish

pyar mein to kami nahin hai

hawa wahi hai

to aao hans kar

hawa ke jhule pe jhul jaen

suhag-rut ka KHayal gaen

‘amir-KHusro’ ke saz par hum

mah-e-‘asal ke KHayal gaen

visal ka ek naya tarana

mohabbaton ka naya fasana

hawa wahi hai

wahi hai ai jaan

teri meri dastan wahi hai