hawa ek qalam hai

maiñ ne havāoñ kā giit sunñā chāhā

magar sun na sakā

gīt-bāzārī bhāv-tāv se katrāte haiñ

aur yahāñ vahshat-zada āvāzoñ meñ se

tarannum kī alaihadgī kā koī bandobast nahīñ

jab maiñ soyā huā thā

havā bhūke bachchoñ kī lorī ban ga.ī thī

maiñ havā ko mo.attar mahsūs karnā chāhtā huuñ

magar ye hamesha

jhulsī huī lāsheñ DhūñD letī hai

ye taptī huī lau meñ

aur sardiyoñ kī udaas ThiThurtī huī shaam ko

logoñ ke phaTe hue kapḌoñ meñ ghus jaatī hai

havā ek behtarīn ḳhatīb hai

jab ham

garm yā sard hone lageñ

ye taqdīr ke alfāz ban kar

hamāre kānoñ meñ chhup jaatī hai

havā ek qalam hai

jo purānī kahānī meñ har roz na.e kirdār gaaḌ detā hai

main ne hawaon ka git sunna chaha

magar sun na saka

git-bazari bhaw-taw se katraate hain

aur yahan wahshat-zada aawazon mein se

tarannum ki alaihadgi ka koi bandobast nahin

jab main soya hua tha

hawa bhuke bachchon ki lori ban gai thi

main hawa ko moattar mahsus karna chahta hun

magar ye hamesha

jhulsi hui lashen DhunD leti hai

ye tapti hui lau mein

aur sardiyon ki udas ThiThurti hui sham ko

logon ke phaTe hue kapDon mein ghus jati hai

hawa ek behtarin KHatib hai

jab hum

garm ya sard hone lagen

ye taqdir ke alfaz ban kar

hamare kanon mein chhup jati hai

hawa ek qalam hai

jo purani kahani mein har roz nae kirdar gaD deta hai