hawa har ek samt bah rahi hai

havā har ik samt bah rahī hai

jilau meñ kūche makān le kar

safar ke be-ant pāniyoñ kī thakān le kar

jo aañkh ke ijz se pare haiñ

unhī zamānoñ kā gyaan le kar

tire ilāqe kī sarhadoñ ke nishān le kar

havā har ik samt bah rahī hai

zamīn chup

āsmān vus.at meñ kho gayā hai

fazā sitāroñ kī fasl se lahlhā rahī hai

makāñ makīnoñ kī āhaToñ se dhaḌak rahe haiñ

jhuke jhuke nam-zada darīchoñ meñ

aañkh koī rukī huī hai

fasīl-e-shahr-e-murād par

nā-murād aahaT aTak ga.ī hai

ye ḳhaak terī mirī sadā ke dayār meñ

phir bhaTak ga.ī hai

dayār shām-o-sahar ke andar

nigār-e-dasht-o-shajar ke andar

savād-e-jān-o-nazar ke andar

ḳhamoshī bahr-o-bar ke andar

ridā-e-sub.h-e-ḳhabar ke andar

aziyyat roz-o-shab meñ

hone kī zillatoñ meñ niDhāl sub.hoñ kī

os meñ bhīgtī ThiThurtī

ḳhamoshiyoñ ke bhañvar ke andar

diloñ se bāhar

diloñ ke andar

havā har ik samt bah rahī hai

hawa har ek samt bah rahi hai

jilau mein kuche makan le kar

safar ke be-ant paniyon ki thakan le kar

jo aankh ke ijz se pare hain

unhi zamanon ka gyan le kar

tere ilaqe ki sarhadon ke nishan le kar

hawa har ek samt bah rahi hai

zamin chup

aasman wusat mein kho gaya hai

faza sitaron ki fasl se lahlha rahi hai

makan makinon ki aahaTon se dhaDak rahe hain

jhuke jhuke nam-zada darichon mein

aankh koi ruki hui hai

fasil-e-shahr-e-murad par

na-murad aahaT aTak gai hai

ye KHak teri meri sada ke dayar mein

phir bhaTak gai hai

dayar sham-o-sahar ke andar

nigar-e-dasht-o-shajar ke andar

sawad-e-jaan-o-nazar ke andar

KHamoshi bahr-o-bar ke andar

rida-e-subh-e-KHabar ke andar

aziyyat roz-o-shab mein

hone ki zillaton mein niDhaal subhon ki

os mein bhigti ThiThurti

KHamoshiyon ke bhanwar ke andar

dilon se bahar

dilon ke andar

hawa har ek samt bah rahi hai