hawa ke dosh pe

vo Dher kāñch kā thā

kisī ne raakh samajh kar jise TaTolā thā

ajiib rañg the raqsāñ nigāh ke aage

hathelī risne lagī to gumān sā guzrā

kahīñ ye ḳhuun ke chhīñToñ kī surḳhiyāñ to nahīñ

magar vo dard kahāñ hai jo sukh nigaltā hai

jo jism-o-jān meñ utrā hai ab thakan ban kar

kahīñ se āh-o-bukā kī sadā.eñ aatī haiñ

ye niim añdherā baḌā karbnāk lagtā hai

bujhe hue vo sharāre haiñ yā koī aahū

palaT ke dekh to le

raakh rañj kāñch

kahīñ chubh na jaa.eñ āñkhoñ meñ

ye vaqt jis ke palaTne kī aarzū le kar

havā ke dosh pe aaheñ uḌaa.e jaatā hai

wo Dher kanch ka tha

kisi ne rakh samajh kar jise TaTola tha

ajib rang the raqsan nigah ke aage

hatheli risne lagi to guman sa guzra

kahin ye KHun ke chhinTon ki surKHiyan to nahin

magar wo dard kahan hai jo sukh nigalta hai

jo jism-o-jaan mein utra hai ab thakan ban kar

kahin se aah-o-buka ki sadaen aati hain

ye nim andhera baDa karbnak lagta hai

bujhe hue wo sharare hain ya koi aahu

palaT ke dekh to le

rakh ranj kanch

kahin chubh na jaen aankhon mein

ye waqt jis ke palaTne ki aarzu le kar

hawa ke dosh pe aahen uDae jata hai