hawa ruki hai to raqs-e-sharar bhi KHatm hua

qalam udaas hai lafzoñ meñ hashr barpā hai

havā rukī hai to raqs-e-sharar bhī ḳhatm huā

junūn-e-shauq junūn-e-safar bhī ḳhatm huā

furāt-e-jāñ

tirī maujoñ meñ ab ravānī nahīñ

koī fasāna nahīñ ab koī kahānī nahīñ

simaT ga.e haiñ kināre vo be-karānī nahīñ

to kyā ye nabz kā chalnā hī zindagānī hai

nahīñ nahīñ ye koī ziist kī nishānī nahīñ

ki saañs lenā faqat koī zindagānī nahīñ

kuchh aur rañg meñ aa.ī hai ye ḳhizāñ ab ke

hai simTī simTī sī ḳhud meñ hī ġhairat-e-nāhīd

miyān-e-ahl-e-tarīqat bhī be-ridā hai ġhazal

hujūm-e-ahl-e-zabāñ aur be-navā hai ġhazal

safar ye kaise kare ḳhārzār rastoñ par

thakan savār hai is par barahna-pā hai ġhazal

tumhārā saath jo chhūTā to ab pareshāñ hai

ki is taġhāful-e-be-jā pe saḳht hairāñ hai

ye kis maqām pe tum ne akelā chhoḌ diyā

tumheñ ḳhabar hai ki tum se bahut ḳhafā hai ġhazal

ye be-makānī

ye tanhā.ī aur ye dar-ba-darī

satā rahā hai bahut ab ḳhayāl-e-ham-safarī

salīb-o-dār-o-rasan se guzar rahī hai ġhazal

chale bhī aao kahāñ ho ki mar rahī hai ġhazal

siyah libās meñ nauhe udaas baiThe haiñ

saroñ ko thāme qasīde udaas baiThe haiñ

hai marsiye kī nigāhoñ meñ abr Thahrā huā

badan darīda latīfe udaas baiThe haiñ

ubhar rahī hai ye kaisī sadā-e-vāvailā

sirhāne dekho rubā.ī kā bain hotā hai

vo dekho

nazm-e-garebān chaak karte hue

duhā.ī detī hai maqtal ke isti.āroñ kī

alāmatoñ kī kināyoñ kī aur ishāroñ kī

bahut malūl haiñ shahr-e-suḳhan kī tahrīreñ

shab-e-alam ke haiñ qisse junūñ kī tafsīreñ

varaq varaq hai pareshāñ ġhubār-e-ḳhātir kā

huā hai nasr ko ehsās phir yatīmī kā

havā-e-shahr-e-sitam kis adā se guzrī hai

dahan ḳhamosh haiñ

chup chup se haiñ suḳhan ke charāġh

bujhī bujhī sī hai qindīl-e-ḳhānqāh-e-adab

dhuāñ dhuāñ haiñ

ḳhitābat ke fikr-o-fan ke charāġh

hai āsmān adab pe vo dhuñd chhā.ī huī

dikhā.ī detā nahīñ ab koī sitāra-e-nūr

kalām kā vo qarīna

vo guftugū kā shu.ūr

kahāñ se ab koī lā.egā sānī-e-manzūr

ajiib vaqt paḌā hai fan-e-nizāmat par

ki dam-ba-ḳhud se khaḌe haiñ ab 'anvar'-o-'manzūr'

vaqār kaise atā ho shikasta lahjoñ ko

rafū kare koī kaise darīda jumloñ ko

hai muskurānā zarūrī vaqār-e-ġham ke liye

tarāshe kaun zabāñ hurmate-qalam ke liye

tumhāre jaane se vīrān ho ga.ī mahfil

ujaḌ gayā hai ye dekho jahān-e-shahr-e-adab

samajh meñ kuchh nahīñ aatā ki ab kahāñ jaa.eñ

bhaTakte phirte haiñ ab sākinān-e-shahr-e-adab

ye mai-kade kī udāsī

ye jaam ulTe hue

ki jaise ro.e hoñ shab-bhar ye sāġhar-o-mīnā

ka.ī dinoñ se hañsī hī nahīñ hai collage-girl

tumhāre hijr ne patthar banā diyā hai use

bahut udaas baḌī be-qarār chup chup sī

ki huzn-o-yās kā manzar banā diyā hai use

vo dekho mez pe jitnī kitābeñ rakkhī haiñ

tumhārī gard rifāqat hai sab ke chehre par

pukārtī haiñ tumheñ ye adhūrī tahrīreñ

bikharte TūTte ḳhvāboñ kī tishna ta.abīreñ

ye ujḌā ujḌā dabistān DhūñDhtā hai tumheñ

chale bhī aao ki imkān DhūñDhtā hai tumheñ

jo ho sake to chale aao tum malik-zāda

magar ye ḳhvāhish-e-bejā

use ḳhabar hī nahīñ

ki jaane vaale kabhī lauT kar nahīñ aate

mahakte rahte haiñ gul-dān un kī yādoñ ke

sulagte rahte haiñ lobān un kī yādoñ ke

qalam udas hai lafzon mein hashr barpa hai

hawa ruki hai to raqs-e-sharar bhi KHatm hua

junun-e-shauq junun-e-safar bhi KHatm hua

furaat-e-jaan

teri maujon mein ab rawani nahin

koi fasana nahin ab koi kahani nahin

simaT gae hain kinare wo be-karani nahin

to kya ye nabz ka chalna hi zindagani hai

nahin nahin ye koi zist ki nishani nahin

ki sans lena faqat koi zindagani nahin

kuchh aur rang mein aai hai ye KHizan ab ke

hai simTi simTi si KHud mein hi ghairat-e-nahid

miyan-e-ahl-e-tariqat bhi be-rida hai ghazal

hujum-e-ahl-e-zaban aur be-nawa hai ghazal

safar ye kaise kare KHarzar raston par

thakan sawar hai is par barahna-pa hai ghazal

tumhaara sath jo chhuTa to ab pareshan hai

ki is taghaful-e-be-ja pe saKHt hairan hai

ye kis maqam pe tum ne akela chhoD diya

tumhein KHabar hai ki tum se bahut KHafa hai ghazal

ye be-makani

ye tanhai aur ye dar-ba-dari

sata raha hai bahut ab KHayal-e-ham-safari

salib-o-dar-o-rasan se guzar rahi hai ghazal

chale bhi aao kahan ho ki mar rahi hai ghazal

siyah libas mein nauhe udas baiThe hain

saron ko thame qaside udas baiThe hain

hai marsiye ki nigahon mein abr Thahra hua

badan darida latife udas baiThe hain

ubhar rahi hai ye kaisi sada-e-wawaila

sirhane dekho rubai ka bain hota hai

wo dekho

nazm-e-gareban chaak karte hue

duhai deti hai maqtal ke istiaron ki

alamaton ki kinayon ki aur ishaaron ki

bahut malul hain shahr-e-suKHan ki tahriren

shab-e-alam ke hain qisse junun ki tafsiren

waraq waraq hai pareshan ghubar-e-KHatir ka

hua hai nasr ko ehsas phir yatimi ka

hawa-e-shahr-e-sitam kis ada se guzri hai

dahan KHamosh hain

chup chup se hain suKHan ke charagh

bujhi bujhi si hai qindil-e-KHanqah-e-adab

dhuan dhuan hain

KHitabat ke fikr-o-fan ke charagh

hai aasman adab pe wo dhund chhai hui

dikhai deta nahin ab koi sitara-e-nur

kalam ka wo qarina

wo guftugu ka shuur

kahan se ab koi laega sani-e-manzur

ajib waqt paDa hai fan-e-nizamat par

ki dam-ba-KHud se khaDe hain ab 'anwar'-o-'manzur'

waqar kaise ata ho shikasta lahjon ko

rafu kare koi kaise darida jumlon ko

hai muskurana zaruri waqar-e-gham ke liye

tarashe kaun zaban hurmate-qalam ke liye

tumhaare jaane se viran ho gai mahfil

ujaD gaya hai ye dekho jahan-e-shahr-e-adab

samajh mein kuchh nahin aata ki ab kahan jaen

bhaTakte phirte hain ab sakinan-e-shahr-e-adab

ye mai-kade ki udasi

ye jam ulTe hue

ki jaise roe hon shab-bhar ye saghar-o-mina

kai dinon se hansi hi nahin hai collage-girl

tumhaare hijr ne patthar bana diya hai use

bahut udas baDi be-qarar chup chup si

ki huzn-o-yas ka manzar bana diya hai use

wo dekho mez pe jitni kitaben rakkhi hain

tumhaari gard rifaqat hai sab ke chehre par

pukarti hain tumhein ye adhuri tahriren

bikharte TuTte KHwabon ki tishna tabiren

ye ujDa ujDa dabistan DhunDhta hai tumhein

chale bhi aao ki imkan DhunDhta hai tumhein

jo ho sake to chale aao tum malik-zada

magar ye KHwahish-e-beja

use KHabar hi nahin

ki jaane wale kabhi lauT kar nahin aate

mahakte rahte hain gul-dan un ki yaadon ke

sulagte rahte hain loban un ki yaadon ke