hazar karo mere tan se

saje to kaise saje qatl-e-ām kā mela

kise lubhā.egā mere lahū kā vāvailā

mire nazār badan meñ lahū hī kitnā hai

charāġh ho koī raushan na koī jaam bhare

na is se aag hī bhaḌke na us se pyaas bujhe

mire figār badan meñ lahū hī kitnā hai

magar vo zahr-e-halāhal bharā hai nas nas meñ

jise bhī chhedo har ik buuñd qahr-e-af.ī hai

har ik kashīd hai sadiyoñ ke dard o hasrat kī

har ik meñ mohr-ba-lab ġhaiz o ġham kī garmī hai

hazar karo mire tan se ye sam kā dariyā hai

hazar karo ki mirā tan vo chob-e-sahrā hai

jise jalāo to sehn-e-chaman meñ dahkeñge

bajā.e-sarv-o-saman merī haDDiyoñ ke babūl

ise bikherā to dasht-o-daman meñ bikhregī

bajā.e-mushk-e-sabā merī jān-e-zār kī dhuul

hazar karo ki mirā dil lahū kā pyāsā hai

saje to kaise saje qatl-e-am ka mela

kise lubhaega mere lahu ka wawaila

mere nazar badan mein lahu hi kitna hai

charagh ho koi raushan na koi jam bhare

na is se aag hi bhaDke na us se pyas bujhe

mere figar badan mein lahu hi kitna hai

magar wo zahr-e-halahal bhara hai nas nas mein

jise bhi chhedo har ek bund qahr-e-afi hai

har ek kashid hai sadiyon ke dard o hasrat ki

har ek mein mohr-ba-lab ghaiz o gham ki garmi hai

hazar karo mere tan se ye sam ka dariya hai

hazar karo ki mera tan wo chob-e-sahra hai

jise jalao to sehn-e-chaman mein dahkenge

bajae-sarw-o-saman meri haDDiyon ke babul

ise bikhera to dasht-o-daman mein bikhregi

bajae-mushk-e-saba meri jaan-e-zar ki dhul

hazar karo ki mera dil lahu ka pyasa hai