hijrat ki nazm

palak ke jhapakte ka.ī saal biite

maiñ vāpas jo lauTī to maiñ ne ye dekhā

mire ghar kī har chhat Tapakne lagī thī

dar-o-bām kā rang maddham paḌā thā

vo āñgan ki jis meñ mahaktī thī champā

us āñgan kā har phuul murjhā gayā thā

faqat ek bargad ki tanhā khaḌā thā

vo tanhā thā aur jaane kyā sochtā thā

ḳhizāoñ ne har-sū baserā kiyā thā

yahī vo jagah thī jahāñ merā bachpan

ka.ī mehrbāñ narm hāthoñ meñ guzrā

yahīñ par mirī tund-ḳhū dhaḌkanoñ ne

na.e mausamoñ kī bashārat sunī thī

mirī saarī sub.heñ mirī saarī shāmeñ

is āñgan kī uḌtī huī titliyāñ thiiñ

magar ek din aisī saa.at bhī aa.ī

mirā ghar faqat chaar lafzoñ kī andhī aqīdat ke aage

aap hī aap chup-chāp ho kar

sabhī rābtoñ se sabhī vāstoñ se alag ho gayā thā

bayāz-e-nazar ke vo mauhūm nuqte

bhī phail ke dā.ere ban chuke haiñ

na.ī zindagī meñ

purāne dinoñ kī

haqīqat faqat kāñch kī TūTtī chūḌiyāñ rah ga.ī hai

ki jin ko tashaḳhḳhus kī hājat nahīñ hai

palak ke jhapakte kai sal bite

main wapas jo lauTi to main ne ye dekha

mere ghar ki har chhat Tapakne lagi thi

dar-o-baam ka rang maddham paDa tha

wo aangan ki jis mein mahakti thi champa

us aangan ka har phul murjha gaya tha

faqat ek bargad ki tanha khaDa tha

wo tanha tha aur jaane kya sochta tha

KHizaon ne har-su basera kiya tha

yahi wo jagah thi jahan mera bachpan

kai mehrban narm hathon mein guzra

yahin par meri tund-KHu dhaDkanon ne

nae mausamon ki bashaarat suni thi

meri sari subhen meri sari shamen

is aangan ki uDti hui titliyan thin

magar ek din aisi saat bhi aai

mera ghar faqat chaar lafzon ki andhi aqidat ke aage

aap hi aap chup-chap ho kar

sabhi rabton se sabhi waston se alag ho gaya tha

bayaz-e-nazar ke wo mauhum nuqte

bhi phail ke daere ban chuke hain

nai zindagi mein

purane dinon ki

haqiqat faqat kanch ki TuTti chuDiyan rah gai hai

ki jin ko tashaKHKHus ki hajat nahin hai