hijrat ki salib

nadāmat kī kaḌī dhuup meñ nahā.e hue

ziist ke is kaḌe kos paḌāv meñ

jahāñ sīpiyāñ raushnī ke duḳhūl ke liye darīche kholā nahīñ kartīñ sochtā huuñ

is bharī duniyā meñ tanhā khaḌā

ḳhākistar hasratoñ kī uñglī thāme kumhlā.e hue

armāñ yuuñ bhī nikal sakte the motiyoñ kī chamak-damak kī chaah meñ dar-ba-dar phire baġhair

rishtoñ ke tāne-bāne toḌ kar

za.īf-o-nazār maañ baap kī muntazir āñkhoñ ko pīchhe chhoḌ ke

maiñ ne is baḌe shahr ke chakāchaund ke pīchhe bhāgte bhāgte

kyā khoyā hai kyā paayā hai

sauñdhī miTTī kī mahak taaza gandum kī ḳhushbū kueñ kā ThanDā paanī

mamtā kā āñchal māñ-jā.iyoñ kā pyaar bhā.iyoñ kī ro.ab jamāne vaalī maar

kitnā tarsātī haiñ mujhe aaj

kis qadar ghabrātā thā maiñ ḳhūbāñ se nazar milāte hue

aaj aḌ jaatā huuñ maiñ

sharm aatī nahīñ mujhe apne gunāh chhupāte hue

un sab kā mujrim huuñ maiñ

apne zamīr ke kaTghare meñ khaḌā huuñ apnī hī ruuh ko muqayyad kiye

hijrat kī salīb apne nā-tavāñ kandhoñ par uThā.e

kīleñ saath rakhtā huuñ maiñ

koī hai jo aa kar mujhe suulī par chaḌhā.e

nadamat ki kaDi dhup mein nahae hue

zist ke is kaDe kos paDaw mein

jahan sipiyan raushni ke duKHul ke liye dariche khola nahin kartin sochta hun

is bhari duniya mein tanha khaDa

KHakistar hasraton ki ungli thame kumhlae hue

arman yun bhi nikal sakte the motiyon ki chamak-damak ki chah mein dar-ba-dar phire baghair

rishton ke tane-bane toD kar

zaif-o-nazar man bap ki muntazir aankhon ko pichhe chhoD ke

main ne is baDe shahr ke chakachaund ke pichhe bhagte bhagte

kya khoya hai kya paya hai

saundhi miTTi ki mahak taza gandum ki KHushbu kuen ka ThanDa pani

mamta ka aanchal man-jaiyon ka pyar bhaiyon ki roab jamane wali mar

kitna tarsati hain mujhe aaj

kis qadar ghabraata tha main KHuban se nazar milate hue

aaj aD jata hun main

sharm aati nahin mujhe apne gunah chhupate hue

un sab ka mujrim hun main

apne zamir ke kaTghare mein khaDa hun apni hi ruh ko muqayyad kiye

hijrat ki salib apne na-tawan kandhon par uThae

kilen sath rakhta hun main

koi hai jo aa kar mujhe suli par chaDhae