hikayat-e-shab

chunāñche sar-e-shām ham sab kisī ḳhāndān-e-farañgī se bahr-e-mulāqāt nikle

yahāñ merā ''ham sab'' se matlab hai vo dūsre ham-vatan aur paḌosī ki jo mulk-e-afrañg kī is baḌī

jāmia meñ husūl-e-zar-e-ilm-o-dānish ko aa.e hue the

''kisī'' se ye matlab hai ham ko ḳhabar tak nahīñ thī ki ham sab kahāñ jā rahe haiñ

kahāñ kis ko kis shaḳhs kī mezbānī milegī

bahar-hāl ye tā.ifa ajnabī mehmānoñ kā ik darmiyāne se ghar mezbānoñ hī kī rahnumā.ī meñ pahuñchā

vahāñ ham se pahle bhī kuchh log maujūd the

rivāyāt-e-begānagī farañgī meñ basta

tanāboñ meñ barfīle ThiThure hue yaḳh-zada mausamoñ meñ muqayyad

magar jin ke chehroñ pe un kī ma.īshat ke rasmī shagūfe khile the

ta.āruf kī ik muḳhtasar tez ThanDī sī gardān

so āḳhirī naam ke āḳhirī harf kī Dūbtī chand lahreñ

so āḳhirī haath ke khurdure chand reze

mire hāfize meñ to kuchh bhī nahīñ rah gayā thā

chunāñche ta.āruf ke sañgīn farshoñ ko ik baar phir se kuredā to dekhā

sat.h saḳht thī aur nāḳhun baḌe narm the

is asnā meñ ik ḳhānam mezbān donoñ hāthoñ meñ sainī uThā.e

nabīd-e-musaffā o gul-rañg ke kuchh bilorīñ piyāle sajā.e

ba-sad-nāz-o-andāz aa.iiñ

abhī is nabīd-e-musaffā ke do chaar chakkar hue the

ki bosīda rasmoñ kī ūñchī fasleñ

ta.assub ke tārīk zindāñ

takalluf kī chiknī muñDereñ

tasanno kī pur-ḳhār bāḌheñ

sarāsar ye sab gir ga.iiñ aur ajnabī ham-vatan ban ga.e

chunanche sar-e-sham hum sab kisi KHandan-e-farangi se bahr-e-mulaqat nikle

yahan mera ham sab se matlab hai wo dusre ham-watan aur paDosi ki jo mulk-e-afrang ki is baDi

jamia mein husul-e-zar-e-ilm-o-danish ko aae hue the

kisi se ye matlab hai hum ko KHabar tak nahin thi ki hum sab kahan ja rahe hain

kahan kis ko kis shaKHs ki mezbani milegi

bahar-haal ye taifa ajnabi mehmanon ka ek darmiyane se ghar mezbanon hi ki rahnumai mein pahuncha

wahan hum se pahle bhi kuchh log maujud the

riwayat-e-beganagi farangi mein basta

tanabon mein barfile ThiThure hue yaKH-zada mausamon mein muqayyad

magar jin ke chehron pe un ki maishat ke rasmi shagufe khile the

taaruf ki ek muKHtasar tez ThanDi si gardan

so aaKHiri nam ke aaKHiri harf ki Dubti chand lahren

so aaKHiri hath ke khurdure chand reze

mere hafize mein to kuchh bhi nahin rah gaya tha

chunanche taaruf ke sangin farshon ko ek bar phir se kureda to dekha

sath saKHt thi aur naKHun baDe narm the

is asna mein ek KHanam mezban donon hathon mein saini uThae

nabid-e-musaffa o gul-rang ke kuchh bilorin piyale sajae

ba-sad-naz-o-andaz aain

abhi is nabid-e-musaffa ke do chaar chakkar hue the

ki bosida rasmon ki unchi faslen

tassub ke tarik zindan

takalluf ki chikni munDeren

tasanno ki pur-KHar baDhen

sarasar ye sab gir gain aur ajnabi ham-watan ban gae