hinDola

dayār-e-hind thā gahvāra yaad hai hamdam

bahut zamāna huā kis ke kis ke bachpan kā

isī zamīn pe khelā hai 'rām' kā bachpan

isī zamīn pe un nanhe nanhe hāthoñ ne

kisī samay meñ dhanush-bān ko sambhālā thā

isī dayār ne dekhī hai 'krishn' kī liilā

yahīñ gharoñdoñ meñ siitā sulochanā rādhā

kisī zamāne meñ guḌiyoñ se kheltī hoñgī

yahī zamīñ yahī dariyā pahāḌ jañgal baaġh

yahī havā.eñ yahī sub.h-o-shām sūraj chāñd

yahī ghaTā.eñ yahī barq-o-ra.ad o qaus-e-quzah

yahīñ ke giit rivāyāt mausamoñ ke julūs

huā zamāna ki 'siddhārth' ke the gahvāre

inhī nazāroñ meñ bachpan kaTā thā 'vikram' kā

sunā hai 'bhartarharī' bhī inhīñ se khelā thā

'bharat' agastya' 'kapil' 'vyās' 'pashī' 'kautilya'

'janak' vashishth' 'manu' 'vālmik' vishvāmitr

'kanād' 'gautam' o ramanuj 'kumāril-bhatt'

mohanjoDāro haḌappā ke aur ajantā ke

banāne vaale yahīñ ballamoñ se khele the

isī hiñDole meñ 'bhavabhut' o 'kālīdās' kabhī

humak humak ke jo tutlā ke gungunā.e the

sarasvatī ne zabānoñ ko un kī chūmā thā

yahīñ ke chāñd va sūraj khilaune the un ke

inhīñ fazāoñ meñ bachpan palā thā 'ḳhusrav' kā

isī zamīñ se uThe 'tansen' aur 'akbar'

'rahīm' 'nanak' o 'chaitanya' aur 'chishti' ne

inhīñ fazāoñ meñ bachpan ke din guzāre the

isī zamīñ pe kabhī shazāda-e-'ḳhurram'

zarā sī dil-shikanī par jo ro diyā hogā

bhar aayā thā dil-e-nāzuk to kyā ajab is meñ

in āñsuoñ meñ jhalak taaj kī bhī dekhī ho

'ahalyabā.i' 'daman' 'padmini' o 'raziya' ne

yahīñ ke peḌoñ kī shāḳhoñ meñ Daale the jhūle

isī fazā meñ baḌhā.ī thī peñg bachpan kī

inhī nazāroñ meñ sāvan ke giit gaa.e the

isī zamīn pe ghuTnoñ ke bal chale hoñge

'malik-mohammad' o 'raskhan' aur 'tulsi-das'

inhīñ fazāoñ meñ gūñjī thī totlī bolī

'kabir-das' 'Tukārām' 'sūr' o 'mīrā' kī

isī hiñDole meñ 'viddypati' kā kañTh khulā

isī zamīn ke the laal 'mīr' o 'ġhālib' bhī

Thumak Thumak ke chale the gharoñ ke āñgan meñ

'anīs' o 'hālī' o 'iqbāl' aur 'vāris-shāh'

yahīñ kī ḳhaak se ubhre the 'premchand' o 'tagore'

yahīñ se uTThe the tahzīb-e-hind ke me.amār

isī zamīn ne dekhā thā bāl-pan in kā

yahīñ dikhā.ī thiiñ in sab ne bāl-līlā.eñ

yahīñ har ek ke bachpan ne tarbiyat paa.ī

yahīñ har ek ke jīvan kā bālkāñD khulā

yahīñ se uThte bagūloñ ke saath dauḌe haiñ

yahīñ kī mast ghaTāoñ ke saath jhūme haiñ

yahīñ kī madh-bharī barsāt meñ nahā.e haiñ

lipaT ke kīchaḌ o paanī se bachpane un ke

isī zamīn se uTThe vo desh ke sāvañt

uḌā diyā thā jinheñ company ne topoñ se

isī zamīn se uThī haiñ an-ginat nasleñ

pale haiñ hind hiñDole meñ an-ginat bachche

mujh aise kitne hī gumnām bachche khele haiñ

isī zamīñ se isī meñ supurd-e-ḳhāk hue

zamīn-e-hind ab ārām-gāh hai un kī

is arz-e-pāk se uTThīñ bahut sī tahzībeñ

yahīñ tulū huiiñ aur yahīñ ġhurūb huiiñ

isī zamīn se ubhre ka.ī ulūm-o-funūn

farāz-e-koh-e-himāla ye daur-e-gañg-o-jaman

aur in kī god meñ parvarda kārvānoñ ne

yahīñ rumūz-e-ḳhirām-e-sukūñ-numā sīkhe

nasīm-e-sub.h-e-tamaddun ne bhairvīñ chheḌī

yahīñ vatan ke tarānoñ kī vo paveñ phūTeñ

vo be-qarār sukūñ-zā tarannum-e-saharī

vo kapkapāte hue soz-o-sāz ke sho.ale

inhī fazāoñ meñ añgḌā.iyāñ jo le ke uThe

lavoñ se jin ke charāġhāñ huī thī bazm-e-hayāt

jinhoñ ne hind kī tahzīb ko zamāna huā

bahut se zāviyoñ se ā.īna dikhāyā thā

isī zamīñ pe Dhalī hai mirī hayāt kī shaam

isī zamīn pe vo sub.h muskurā.ī hai

tamām sho.ala o shabnam mirī hayāt kī sub.h

sunā.ūñ aaj kahānī maiñ apne bachpan kī

dil-o-dimāġh kī kaliyāñ abhī na chaTkī thiiñ

hamesha kheltā rahtā thā bhaa.ī bahnoñ meñ

hamāre saath mohalle kī laḌkiyāñ laḌke

machā.e rakhte the bālak udham har ek ghaḌī

lahū tarañg uchhal-phāñd kā ye aalam thā

mohalla sar pe uThā.e phire jidhar guzre

hamāre chahchahe aur shor gūñjte rahte

chahār-samt mohalle ke goshe goshe meñ

fazā meñ aaj bhī lā-raib gūñjte hoñge

agarche dūsre bachchoñ kī tarah thā maiñ bhī

ba-zāhir auroñ ke bachpan sā thā mirā bachpan

ye sab sahī mire bachpan kī shaḳhsiyat bhī thī ek

vo shaḳhsiyat ki bahut shoḳh jis ke the ḳhad-o-ḳhāl

adā adā meñ koī shān-e-infirādī thī

ġharaz kuchh aur hī lachchhan the mere bachpan ke

mujhe thā chhoTe baḌoñ se bahut shadīd lagāv

har ek par maiñ chhiḌaktā thā apnī nannhī sī jaañ

dil umDā aatā thā aisā ki jī ye chāhtā thā

uThā ke rakh luuñ kaleje meñ apnī duniyā ko

mujhe hai yaad abhī tak ki khel-kūd meñ bhī

kuchh aise vaqfe pur-asrār aa hī jaate the

ki jin meñ sochne lagtā thā kuchh mirā bachpan

ka.ī ma.ānī-e-be-lafz chhūne lagte the

butūn-e-ġhaib se mere shu.ūr-e-asġhar ko

har ek manzar-e-mānūs ghar kā har gosha

kisī tarah kī ho ghar meñ sajī huī har chiiz

mire mohalle kī galiyāñ makāñ dar-o-dīvār

chabūtre kueñ kuchh peḌ jhāḌiyāñ beleñ

vo pherī vaale ka.ī un ke bhāñt bhāñt ke bol

vo jaane būjhe manāzir vo āsmāñ o zamīñ

badalte vaqt kā ā.īna garmī-o-ḳhunkī

ġhurūb-e-mahr meñ rañgoñ kā jāgtā jaadū

shafaq ke shīsh-mahal meñ gudāz-e-pinhāñ se

javāhroñ kī chaTāneñ sī kuchh pighaltī huiiñ

shajar hajar kī vo kuchh sochtī huī duniyā

suhānī raat kī mānūs ramaziyat kā fusūñ

alassabāh ufuq kī vo thartharātī bhaveñ

kisī kā jhāñknā āhista phūTtī pau se

vo dopahar kā samay darja-e-tapish kā chaḌhāv

thakī thakī sī fazā meñ vo zindagī kā utaar

huā kī bansiyāñ bañsvāḌiyoñ meñ bajtī huiiñ

vo din ke baḌhte hue saa.e sah-pahar kā sukūñ

sukūt shaam kā jab donoñ vaqt milte haiñ

ġharaz jhalakte hue sarsarī manāzir par

mujhe gumān paristāniyat kā hotā thā

har ek chiiz kī vo ḳhvāb-nāk asliyyat

mire shu.ūr kī chilman se jhāñktā thā koī

liye rubūbiyat-e-kā.enāt kā ehsās

har ek jalve meñ ġhaib o shuhūd kā vo milāp

har ik nazāra ik ā.īna-ḳhāna-e-hairat

har ek manzar-e-mānūs ek hairat-zār

kahīñ rahūñ kahīñ kheloñ kahīñ paḌhūñ likhūñ

mire shu.ūr pe mañDlāte the manāzir-e-dahr

maiñ akasr un ke tasavvur meñ Duub jaatā thā

vafūr-e-jazba se ho jaatī thī mizha pur-nam

mujhe yaqīn hai in unsurī manāzir se

ki aam bachchoñ se letā thā maiñ ziyāda asar

kisī samay mirī tiflī rahī na be-parvā

na chhū sakī mirī tiflī ko ġhaflat-e-tiflī

ye khel-kūd ke lamhoñ meñ hotā thā ehsās

duā.eñ detā ho jaise mujhe sukūt-e-davām

ki jaise haath abad rakh de dosh-e-tiflī par

har ek lamha ke raḳhnoñ se jhāñktī sadiyāñ

kahāniyāñ jo sunūñ un meñ Duub jaatā thā

ki aadmī ke liye aadmī kī jag-bītī

se baḌh ke kaun sī shai aur ho hī saktī hai

inhī fasānoñ meñ pinhāñ the zindagī ke rumūz

inhī fasānoñ meñ khulte the rāz-hā-e-hayāt

unheñ fasānoñ meñ miltī thiiñ ziist kī qadreñ

rumūz-e-besh-bahā TheTh ādmiyat ke

kahāniyāñ thiiñ ki sad-dars-gāh-e-riqqat-e-qalb

har ik kahānī meñ shā.istagi-e-ġham kā sabaq

vo unsur āñsuoñ kā dāstān-e-insāñ meñ

vo nal-daman kī kathā sarguzasht-e-savitrī

'shakuntlā' kī kahānī 'bharat' kī qurbānī

vo marg-e-bhishm-pitāmah vo sej tīroñ kī

vo pān.cho pāñDav kī sovarg-yātrā kī kathā

vatan se ruḳhsat-e-'siddhārth' 'rām' kā ban-bās

vafā ke ba.ad bhī 'sītā' kī vo jalā-vatanī

vo rātoñ-rāt 'sirī-krishn' ko uThā.e hue

balā kī qaid se 'basdev' kā nikal jaanā

vo añdhkār vo bārish, baḌhī huī jamunā

ġham-e-āfrīn kahānī vo 'hīr' 'rāñjhā' kī

shu.ūr-e-hind ke bachpan kī yādgār-e-azīm

ki aise vaise taḳhayyul kī saañs ukhaḌ jaa.e

ka.ī muhayyur-e-idrāk dev-mālāyeñ

hitopdesh ke qisse kathā sarat-sāgar

karoḌoñ sīnoñ meñ vo gūñjtā huā aalhā

maiñ pūchhtā huuñ kisī aur malak vāloñ se

kahāniyoñ kī ye daulat ye be-bahā daulat

fasāne dekh lo in ke nazar bhī aatī hai

maiñ pūchhtā huuñ ki gahvāre aur qaumoñ ke

base hue haiñ kahīñ aisī dāstānoñ se

kahāniyāñ jo maiñ suntā thā apne bachpan meñ

mire liye vo na thiiñ mahz bā.is-e-tafrīh

fasānoñ se mire bachpan ne sochnā sīkhā

fasānoñ se mujhe sanjīdgī ke dars mile

fasānoñ meñ nazar aatī thī mujh ko ye duniyā

ġham o ḳhushī meñ rachī pyaar meñ basā.ī huī

fasānoñ se mire dil ne ghulāvaTeñ pā.īñ

yahī nahīñ ki mashāhīr hī ke afsāne

zarā sī umr meñ karte hoñ mujh ko muta.assir

mohalle Tole ke gumnām ādamiyyoñ ke

kuchh aise sunñe meñ aate the vāqi.āt-e-hayāt

joñ yuuñ to hote the farsūda aur ma.amūlī

magar the ā.īne iḳhlās aur sharāfat ke

ye chand aa.ī ga.ī bāteñ aisī bāteñ thiiñ

ki jin kī oT chamaktā thā dard-e-insānī

ye vārdāt nahīñ razmiyye hayāt ke the

ġharaz ki ye haiñ mire bachpane kī tasvīreñ

nadīm aur bhī kuchh ḳhatt-o-ḳhāl haiñ un ke

ye merī maañ kā hai kahnā ki jab maiñ bachcha thā

maiñ aise aadmī kī god meñ na jaatā thā

jo bad-qimār ho aibī ho yā ho bad-sūrat

mujhe bhī yaad hai nau das baras hī kā maiñ thā

to mujh pe kartā thā jaadū sā husn-e-insānī

kuchh aisā hotā thā mahsūs jab maiñ dekhtā thā

shagufta rañg tar-o-tāza ruup vāloñ kā

ki un kī aañch mirī haDDiyāñ galā degī

ik āzmā.ish-e-jāñ thī ki thā shu.ūr-e-jamāl

aur us kī nashtariyyat us kī ustuḳhāñ-sozī

ġham o nashāt lagāvaT mohabbat o nafrat

ik intishār-e-sakūñ iztirāb pyaar itaab

vo be-panāh zakī-ul-hisī vo hilm o ġhurūr

kabhī kabhī vo bhare ghar meñ hiss-e-tanhā.ī

vo vahshateñ mirī māhaul-e-ḳhush-gavār meñ bhī

mirī sarisht meñ ziddain ke ka.ī joḌe

shurūa hī se the maujūd āb-o-tāb ke saath

mire mizāj meñ pinhāñ thī ek jadaliyyat

ragoñ meñ chhūTte rahte the be-shumār anaar

nadīm ye haiñ mire bāl-pan ke kuchh āsār

vafūr o shiddat-e-jazbāt kā ye aalam thā

ki kauñde jast kareñ dil ke ābgīne meñ

vo bachpanā jise bardāsht apnī mushkil ho

vo bachpanā jo ḳhud apnī hī tevriyāñ sī chaḌhā.e

nadīm zikr-e-javānī se kaañp jaatā huuñ

javānī aa.ī dabe paañv aur yuuñ aa.ī

ki us ke aate hī bigḌā banā-banāyā khel

vo ḳhvāhishāt ke jazbāt ke umaDte hue

vo hoñkte hue be-nām aag ke tūfāñ

vo phūTtā huā jvālā-mukhī javānī kā

ragoñ meñ uThtī huī āñdhiyoñ ke vo jhaTke

ki jo tavāzun-e-hastī jhiñjhoḌ ke rakh deñ

vo zalzale ki pahāḌoñ ke pair ukhaḌ jaa.eñ

bulūġhiyat kī vo Tīseñ vo karb-e-nashv-o-numā

aur aise meñ mujhe byāhā gayā bhalā kis se

jo ho na saktī thī hargiz mirī sharīk-e-hayāt

ham ek dūsre ke vāste bane hī na the

siyāh ho ga.ī duniyā mirī nigāhoñ meñ

vo jis ko kahte haiñ shādī-e-ḳhānā-ābādī

mire liye vo banī bevgī javānī kī

luTā suhāg mirī zindagī kā māñDo meñ

nadīm khā ga.ī mujh ko nazar javānī kī

balā-e-jān mujhe ho gayā shu.ūr-e-jamāl

talāsh-e-shola-e-ulfat se ye huā hāsil

ki nafratoñ kā agan-kuñD ban ga.ī hastī

vo halq o siina o rag rag meñ be-panāh chubhā

nadīm jaise nigal lī ho maiñ ne nāg-phanī

z ishq-zādam o ishqam kamusht zār-o-dareġh

ḳhabar na burd ba-rustam kase ki sohrābam

na pūchh ālam-e-kām-o-dahan nadīm mire

samar hayāt kā jab raakh bin gayā muñh meñ

maiñ chaltī-phirtī chitā ban gayā javānī kī

maiñ kāñdhā detā rahā apne jiite murde ko

ye sochtā thā ki ab kyā karūñ kahāñ jā.ūñ

bahut se aur masā.ib bhī mujh pe TuuT paḌe

maiñ DhūñDhne lagā har samt sachchī jhūTī panāh

talāsh-e-husn meñ sher-o-adab meñ dostī meñ

ruñdhī sadā se mohabbat kī bhiik māñgī hai

na.e sire se samajhnā paḌā hai duniyā ko

baḌe jatan se sambhālā hai ḳhud ko maiñ ne nadīm

mujhe sambhalne meñ to chālīs saal guzre haiñ

merī hayāt to vish-pān kī kathā hai nadīm

maiñ zahr pī ke zamāne ko de sakā amrit

na pūchh maiñ ne jo zahrāba-e-hayāt piyā

magar huuñ dil se maiñ is ke liye sipās-guzār

larazte hāthoñ se dāman ḳhulūs kā na chhaTā

bachā ke rakkhī thī maiñ ne amānat-e-tiflī

ise na chhīn sakī mujh se dast-burd-e-shabāb

ba-qaul shā.er-e-mulk-e-farañg har bachcha

ḳhud apne ahd-e-javānī kā baap hotā hai

ye kam nahīñ hai ki tiflī-e-rafta chhoḌ ga.ī

dil-e-hazīñ meñ ka.ī chhoTe chhoTe naqsh-e-qadam

mirī anā kī ragoñ meñ paḌe hue haiñ abhī

na jaane kitne bahut narm uñgliyoñ ke nishāñ

hanūz vaqt ke be-dard haath kar na sake

hayāt-e-rafta kī zinda nishāniyoñ ko fanā

zamāna chhīn sakegā na merī fitrat se

mirī safā mire tahtush-shu.ūr kī ismat

taḳhaiyyulāt kī doshīzgī kā radd-e-amal

javān ho ke bhī be-laus tifl-vash jazbāt

syānā hone pe bhī ye jibillateñ merī

ye sarḳhushī o ġham be-riyā ye qalb-gudāz

baġhair bair ke an-ban ġharaz se paak tapāk

ġharaz se paak ye aañsū ġharaz se paak hañsī

ye dasht-e-dahr meñ hamdardiyoñ kā sar-chashma

qubūliyat kā ye jazba ye kā.enāt o hayāt

is arz-e-pāk par īmān ye ham-āhañgī

har aadmī se har ik ḳhvāb o ziist se ye lagāv

ye maañ kī god kā ehsās sab manāzir meñ

qarīb o duur zamīñ meñ ye bū-e-vataniyyat

nizām-e-shams-o-qamar meñ payām-e-hifz-e-hayāt

ba-chashm-e-shām-o-sahar māmtā kī shabnam sī

ye saaz o dil meñ mire naġhma-e-analkaunain

har iztirāb meñ rūh-e-sukūn-e-be-pāyāñ

zamāna-e-guzarāñ meñ davām kā sargam

ye bazm-e-jashn-e-hayāt-o-mamāt sajtī huī

kisī kī yaad kī shahnā.iyāñ sī bajtī huī

ye ramazīyat ke anāsir shu.ūr-e-puḳhta meñ

falak pe vajd meñ laatī hai jo farishtoñ ko

vo shā.erī bhī bulūġh-e-mizāj-e-tiflī hai

ye nashtariyyat-e-hastī ye is kī sheriyat

ye pattī pattī pe gulzār-e-zindagī ke kisī

latīf nuur kī parchhā.iyāñ sī paḌtī huī

baham ye hairat o mānūsiyat kī sargoshī

bashar kī zaat ki mahr-e-ulūhiyat ba-jabīñ

abad ke dil meñ jaḌeñ mārtā huā sabza

ġham-e-jahāñ mujhe āñkheñ dikhā nahīñ saktā

ki āñkheñ dekhe hue huuñ maiñ ne apne bachpan kī

mire lahū meñ abhī tak sunā.ī detī haiñ

sukūt-e-huzn meñ bhī ghuñghruoñ kī jhankāreñ

ye aur baat ki maiñ is pe kaan de na sakūñ

isī vadī.at-e-tiflī kā ab sahārā hai

yahī haiñ marham-e-kāfūr dil ke zaḳhmoñ par

unhī ko rakhnā hai mahfūz tā-dam-e-āḳhir

zamīn-e-hind hai gahvāra aaj bhī hamdam

agar hisāb kareñ das karoḌ bachchoñ kā

ye bachche hind kī sab se baḌī amānat haiñ

har ek bachche meñ haiñ sad-jahān-e-imkānāt

magar vatan kā hal-o-aqd jin ke haath meñ hai

nizām-e-zindagī-e-hind jin ke bas meñ hai

ravayya dekh ke un kā ye kahnā paḌtā hai

kise paḌī hai ki samjhe vo is amānat ko

kise paḌī hai ki bachchoñ kī zindagī ko bachā.e

ḳharāb hone se Talne se suukh jaane se

bachā.e kaun in āzurda honhāroñ ko

vo zindagī jise ye de rahe haiñ bhārat ko

karoḌoñ bachchoñ ke miTne kā ik alamiyya hai

churā.e jaate haiñ bachche abhī gharoñ se yahāñ

ki jism toḌ diye jaa.eñ un ke taaki mile

churāne vāloñ ko ḳhairāt māgh-mele kī

jo is azaab se bach jaa.eñ to gale paḌ jaa.eñ

vo la.anteñ ki hamāre karoḌoñ bachchoñ kī

nadīm ḳhair se miTTī ḳharāb ho jaa.e

vo muflisī ki ḳhushī chhīn le vo be-bargī

udāsiyoñ se bharī zindagī kī be-rañgī

vo yāsiyāt na jis ko chhue shuā-e-umīd

vo āñkheñ dekhtī haiñ har taraf jo be-nūrī

vo TukTukī ki jo pathrā ke rah ga.ī ho nadīm

vo be-dilī kī hañsī chhīn le jo hoñToñ se

vo dukh ki jis se sitāroñ kī aañkh bhar aa.e

vo gandagī vo kasāfat maraz-zada paikar

vo bachche chhin ga.e hoñ jin se bachpane un ke

hamīñ ne ghoñT diyā jis ke bachpane kā galā

jo khāte-pīte gharoñ ke haiñ bachche un ko bhī kyā

samāj phūlne-phalne ke de sakā sādhan

vo saañs lete haiñ tahzīb-kush fazāoñ meñ

ham un ko dete haiñ be-jān aur ġhalat ta.alīm

milegā ilm-e-jihālat-numā se kyā un ko

nikal ke madrasoñ aur universitiyyoñ se

ye bad-nasīb na ghar ke na ghaaT ke hoñge

maiñ pūchhtā huuñ ye ta.alīm hai ki makkārī

karoḌoñ zindagiyoñ se ye be-panāh daġhā

nisāb aisā ki mehnat kareñ agar is par

bajā.e ilm jahālat kā iktisāb kareñ

ye ulTā dars-e-adab ye saḌī huī ta.alīm

dimāġh kī ho ġhizā yā ġhizā-e-jismānī

har ik tarah kī ġhizā meñ yahāñ milāvaT hai

vo jis ko bachchoñ kī ta.alīm kah ke dete haiñ

vo dars ulTī chhurī hai gale pe bachpan ke

zamīn-e-hind hiñDolā nahīñ hai bachchoñ kā

karoḌoñ bachchoñ kā ye des ab janāza hai

ham inqalāb ke ḳhatroñ se ḳhuub vāqif haiñ

kuchh aur roz yahī rah ga.e jo lail-o-nahār

to mol lenā paḌegā hameñ ye ḳhatra bhī

ki bachche qaum kī sab se baḌī amānat haiñ

dayar-e-hind tha gahwara yaad hai hamdam

bahut zamana hua kis ke kis ke bachpan ka

isi zamin pe khela hai 'ram' ka bachpan

isi zamin pe un nanhe nanhe hathon ne

kisi samay mein dhanush-ban ko sambhaala tha

isi dayar ne dekhi hai 'krishn' ki lila

yahin gharondon mein sita sulochana radha

kisi zamane mein guDiyon se khelti hongi

yahi zamin yahi dariya pahaD jangal bagh

yahi hawaen yahi subh-o-sham suraj chand

yahi ghaTaen yahi barq-o-rad o qaus-e-quzah

yahin ke git riwayat mausamon ke julus

hua zamana ki 'siddhaarth' ke the gahware

inhi nazaron mein bachpan kaTa tha 'wikram' ka

suna hai 'bhartarhari' bhi inhin se khela tha

'bharat' agastya' 'kapil' 'wyas' 'pashi' 'kautilya'

'janak' washishth' 'manu' 'walmik' wishwamitr

'kanad' 'gautam' o ramanuj 'kumaril-bhatt'

mohanjoDaro haDappa ke aur ajanta ke

banane wale yahin ballamon se khele the

isi hinDole mein 'bhawabhut' o 'kalidas' kabhi

humak humak ke jo tutla ke gungunae the

saraswati ne zabanon ko un ki chuma tha

yahin ke chand wa suraj khilaune the un ke

inhin fazaon mein bachpan pala tha 'KHusraw' ka

isi zamin se uThe 'tansen' aur 'akbar'

'rahim' 'nanak' o 'chaitanya' aur 'chishti' ne

inhin fazaon mein bachpan ke din guzare the

isi zamin pe kabhi shazada-e-'KHurram'

zara si dil-shikani par jo ro diya hoga

bhar aaya tha dil-e-nazuk to kya ajab is mein

in aansuon mein jhalak taj ki bhi dekhi ho

'ahalyabai' 'daman' 'padmini' o 'raziya' ne

yahin ke peDon ki shaKHon mein Dale the jhule

isi faza mein baDhai thi peng bachpan ki

inhi nazaron mein sawan ke git gae the

isi zamin pe ghuTnon ke bal chale honge

'malik-mohammad' o 'raskhan' aur 'tulsi-das'

inhin fazaon mein gunji thi totli boli

'kabir-das' 'Tukaram' 'sur' o 'mira' ki

isi hinDole mein 'widdypati' ka kanTh khula

isi zamin ke the lal 'mir' o 'ghaalib' bhi

Thumak Thumak ke chale the gharon ke aangan mein

'anis' o 'haali' o 'iqbaal' aur 'waris-shah'

yahin ki KHak se ubhre the 'premchand' o 'tagore'

yahin se uTThe the tahzib-e-hind ke meamar

isi zamin ne dekha tha baal-pan in ka

yahin dikhai thin in sab ne baal-lilaen

yahin har ek ke bachpan ne tarbiyat pai

yahin har ek ke jiwan ka baalkanD khula

yahin se uThte bagulon ke sath dauDe hain

yahin ki mast ghaTaon ke sath jhume hain

yahin ki madh-bhari barsat mein nahae hain

lipaT ke kichaD o pani se bachpane un ke

isi zamin se uTThe wo desh ke sawant

uDa diya tha jinhen company ne topon se

isi zamin se uThi hain an-ginat naslen

pale hain hind hinDole mein an-ginat bachche

mujh aise kitne hi gumnam bachche khele hain

isi zamin se isi mein supurd-e-KHak hue

zamin-e-hind ab aaram-gah hai un ki

is arz-e-pak se uTThin bahut si tahziben

yahin tulu huin aur yahin ghurub huin

isi zamin se ubhre kai ulum-o-funun

faraaz-e-koh-e-himala ye daur-e-gang-o-jaman

aur in ki god mein parwarda karwanon ne

yahin rumuz-e-KHiram-e-sukun-numa sikhe

nasim-e-subh-e-tamaddun ne bhairwin chheDi

yahin watan ke taranon ki wo pawen phuTen

wo be-qarar sukun-za tarannum-e-sahari

wo kapkapate hue soz-o-saz ke shoale

inhi fazaon mein angDaiyan jo le ke uThe

lawon se jin ke charaghan hui thi bazm-e-hayat

jinhon ne hind ki tahzib ko zamana hua

bahut se zawiyon se aaina dikhaya tha

isi zamin pe Dhali hai meri hayat ki sham

isi zamin pe wo subh muskurai hai

tamam shoala o shabnam meri hayat ki subh

sunaun aaj kahani main apne bachpan ki

dil-o-dimagh ki kaliyan abhi na chaTki thin

hamesha khelta rahta tha bhai bahnon mein

hamare sath mohalle ki laDkiyan laDke

machae rakhte the baalak udham har ek ghaDi

lahu tarang uchhal-phand ka ye aalam tha

mohalla sar pe uThae phire jidhar guzre

hamare chahchahe aur shor gunjte rahte

chahaar-samt mohalle ke goshe goshe mein

faza mein aaj bhi la-raib gunjte honge

agarche dusre bachchon ki tarah tha main bhi

ba-zahir auron ke bachpan sa tha mera bachpan

ye sab sahi mere bachpan ki shaKHsiyat bhi thi ek

wo shaKHsiyat ki bahut shoKH jis ke the KHad-o-KHal

ada ada mein koi shan-e-infiradi thi

gharaz kuchh aur hi lachchhan the mere bachpan ke

mujhe tha chhoTe baDon se bahut shadid lagaw

har ek par main chhiDakta tha apni nannhi si jaan

dil umDa aata tha aisa ki ji ye chahta tha

uTha ke rakh lun kaleje mein apni duniya ko

mujhe hai yaad abhi tak ki khel-kud mein bhi

kuchh aise waqfe pur-asrar aa hi jate the

ki jin mein sochne lagta tha kuchh mera bachpan

kai maani-e-be-lafz chhune lagte the

butun-e-ghaib se mere shuur-e-asghar ko

har ek manzar-e-manus ghar ka har gosha

kisi tarah ki ho ghar mein saji hui har chiz

mere mohalle ki galiyan makan dar-o-diwar

chabutre kuen kuchh peD jhaDiyan belen

wo pheri wale kai un ke bhant bhant ke bol

wo jaane bujhe manazir wo aasman o zamin

badalte waqt ka aaina garmi-o-KHunki

ghurub-e-mahr mein rangon ka jagta jadu

shafaq ke shish-mahal mein gudaz-e-pinhan se

jawahron ki chaTanen si kuchh pighalti huin

shajar hajar ki wo kuchh sochti hui duniya

suhani raat ki manus ramaziyat ka fusun

alassabah ufuq ki wo thartharaati bhawen

kisi ka jhankna aahista phuTti pau se

wo dopahar ka samay darja-e-tapish ka chaDhaw

thaki thaki si faza mein wo zindagi ka utar

hua ki bansiyan banswaDiyon mein bajti huin

wo din ke baDhte hue sae sah-pahar ka sukun

sukut sham ka jab donon waqt milte hain

gharaz jhalakte hue sarsari manazir par

mujhe guman paristaniyat ka hota tha

har ek chiz ki wo KHwab-nak asliyyat

mere shuur ki chilman se jhankta tha koi

liye rububiyat-e-kaenat ka ehsas

har ek jalwe mein ghaib o shuhud ka wo milap

har ek nazara ek aaina-KHana-e-hairat

har ek manzar-e-manus ek hairat-zar

kahin rahun kahin khelon kahin paDhun likhun

mere shuur pe manDlate the manazir-e-dahr

main akasr un ke tasawwur mein Dub jata tha

wafur-e-jazba se ho jati thi mizha pur-nam

mujhe yaqin hai in unsuri manazir se

ki aam bachchon se leta tha main ziyaada asar

kisi samay meri tifli rahi na be-parwa

na chhu saki meri tifli ko ghaflat-e-tifli

ye khel-kud ke lamhon mein hota tha ehsas

duaen deta ho jaise mujhe sukut-e-dawam

ki jaise hath abad rakh de dosh-e-tifli par

har ek lamha ke raKHnon se jhankti sadiyan

kahaniyan jo sunun un mein Dub jata tha

ki aadmi ke liye aadmi ki jag-biti

se baDh ke kaun si shai aur ho hi sakti hai

inhi fasanon mein pinhan the zindagi ke rumuz

inhi fasanon mein khulte the raaz-ha-e-hayat

unhen fasanon mein milti thin zist ki qadren

rumuz-e-besh-baha TheTh aadmiyat ke

kahaniyan thin ki sad-dars-gah-e-riqqat-e-qalb

har ek kahani mein shaistagi-e-gham ka sabaq

wo unsur aansuon ka dastan-e-insan mein

wo nal-daman ki katha sarguzasht-e-sawitri

'shakuntla' ki kahani 'bharat' ki qurbani

wo marg-e-bhishm-pitamah wo sej tiron ki

wo pancho panDaw ki sowarg-yatra ki katha

watan se ruKHsat-e-'siddhaarth' 'ram' ka ban-bas

wafa ke baad bhi 'sita' ki wo jala-watani

wo raaton-raat 'siri-krishn' ko uThae hue

bala ki qaid se 'basdew' ka nikal jaana

wo andhkar wo barish, baDhi hui jamuna

gham-e-afrin kahani wo 'hir' 'ranjha' ki

shuur-e-hind ke bachpan ki yaadgar-e-azim

ki aise waise taKHayyul ki sans ukhaD jae

kai muhayyur-e-idrak dew-malayen

hitopdesh ke qisse katha sarat-sagar

karoDon sinon mein wo gunjta hua aalha

main puchhta hun kisi aur malak walon se

kahaniyon ki ye daulat ye be-baha daulat

fasane dekh lo in ke nazar bhi aati hai

main puchhta hun ki gahware aur qaumon ke

base hue hain kahin aisi dastanon se

kahaniyan jo main sunta tha apne bachpan mein

mere liye wo na thin mahz bais-e-tafrih

fasanon se mere bachpan ne sochna sikha

fasanon se mujhe sanjidgi ke dars mile

fasanon mein nazar aati thi mujh ko ye duniya

gham o KHushi mein rachi pyar mein basai hui

fasanon se mere dil ne ghulawaTen pain

yahi nahin ki mashahir hi ke afsane

zara si umr mein karte hon mujh ko mutassir

mohalle Tole ke gumnam aadamiyyon ke

kuchh aise sunne mein aate the waqiat-e-hayat

jon yun to hote the farsuda aur mamuli

magar the aaine iKHlas aur sharafat ke

ye chand aai gai baaten aisi baaten thin

ki jin ki oT chamakta tha dard-e-insani

ye wardat nahin razmiyye hayat ke the

gharaz ki ye hain mere bachpane ki taswiren

nadim aur bhi kuchh KHatt-o-KHal hain un ke

ye meri man ka hai kahna ki jab main bachcha tha

main aise aadmi ki god mein na jata tha

jo bad-qimar ho aibi ho ya ho bad-surat

mujhe bhi yaad hai nau das baras hi ka main tha

to mujh pe karta tha jadu sa husn-e-insani

kuchh aisa hota tha mahsus jab main dekhta tha

shagufta rang tar-o-taza rup walon ka

ki un ki aanch meri haDDiyan gala degi

ek aazmaish-e-jaan thi ki tha shuur-e-jamal

aur us ki nashtariyyat us ki ustuKHan-sozi

gham o nashat lagawaT mohabbat o nafrat

ek intishaar-e-sakun iztirab pyar itab

wo be-panah zaki-ul-hisi wo hilm o ghurur

kabhi kabhi wo bhare ghar mein hiss-e-tanhai

wo wahshaten meri mahaul-e-KHush-gawar mein bhi

meri sarisht mein ziddain ke kai joDe

shurua hi se the maujud aab-o-tab ke sath

mere mizaj mein pinhan thi ek jadaliyyat

ragon mein chhuTte rahte the be-shumar anar

nadim ye hain mere baal-pan ke kuchh aasar

wafur o shiddat-e-jazbaat ka ye aalam tha

ki kaunde jast karen dil ke aabgine mein

wo bachpana jise bardasht apni mushkil ho

wo bachpana jo KHud apni hi tewriyan si chaDhae

nadim zikr-e-jawani se kanp jata hun

jawani aai dabe panw aur yun aai

ki us ke aate hi bigDa bana-banaya khel

wo KHwahishat ke jazbaat ke umaDte hue

wo honkte hue be-nam aag ke tufan

wo phuTta hua jwala-mukhi jawani ka

ragon mein uThti hui aandhiyon ke wo jhaTke

ki jo tawazun-e-hasti jhinjhoD ke rakh den

wo zalzale ki pahaDon ke pair ukhaD jaen

bulughiyat ki wo Tisen wo karb-e-nashw-o-numa

aur aise mein mujhe byaha gaya bhala kis se

jo ho na sakti thi hargiz meri sharik-e-hayat

hum ek dusre ke waste bane hi na the

siyah ho gai duniya meri nigahon mein

wo jis ko kahte hain shadi-e-KHana-abaadi

mere liye wo bani bewgi jawani ki

luTa suhag meri zindagi ka manDo mein

nadim kha gai mujh ko nazar jawani ki

bala-e-jaan mujhe ho gaya shuur-e-jamal

talash-e-shola-e-ulfat se ye hua hasil

ki nafraton ka agan-kunD ban gai hasti

wo halq o sina o rag rag mein be-panah chubha

nadim jaise nigal li ho main ne nag-phani

z ishq-zadam o ishqam kamusht zar-o-daregh

KHabar na burd ba-rustam kase ki sohrabam

na puchh aalam-e-kaam-o-dahan nadim mere

samar hayat ka jab rakh bin gaya munh mein

main chalti-phirti chita ban gaya jawani ki

main kandha deta raha apne jite murde ko

ye sochta tha ki ab kya karun kahan jaun

bahut se aur masaib bhi mujh pe TuT paDe

main DhunDhne laga har samt sachchi jhuTi panah

talash-e-husn mein sher-o-adab mein dosti mein

rundhi sada se mohabbat ki bhik mangi hai

nae sire se samajhna paDa hai duniya ko

baDe jatan se sambhaala hai KHud ko main ne nadim

mujhe sambhalne mein to chaalis sal guzre hain

meri hayat to wish-pan ki katha hai nadim

main zahr pi ke zamane ko de saka amrit

na puchh main ne jo zahraba-e-hayat piya

magar hun dil se main is ke liye sipas-guzar

larazte hathon se daman KHulus ka na chhaTa

bacha ke rakkhi thi main ne amanat-e-tifli

ise na chhin saki mujh se dast-burd-e-shabab

ba-qaul shaer-e-mulk-e-farang har bachcha

KHud apne ahd-e-jawani ka bap hota hai

ye kam nahin hai ki tifli-e-rafta chhoD gai

dil-e-hazin mein kai chhoTe chhoTe naqsh-e-qadam

meri ana ki ragon mein paDe hue hain abhi

na jaane kitne bahut narm ungliyon ke nishan

hanuz waqt ke be-dard hath kar na sake

hayat-e-rafta ki zinda nishaniyon ko fana

zamana chhin sakega na meri fitrat se

meri safa mere tahtush-shuur ki ismat

taKHaiyyulat ki doshizgi ka radd-e-amal

jawan ho ke bhi be-laus tifl-wash jazbaat

syana hone pe bhi ye jibillaten meri

ye sarKHushi o gham be-riya ye qalb-gudaz

baghair bair ke an-ban gharaz se pak tapak

gharaz se pak ye aansu gharaz se pak hansi

ye dasht-e-dahr mein hamdardiyon ka sar-chashma

qubuliyat ka ye jazba ye kaenat o hayat

is arz-e-pak par iman ye ham-ahangi

har aadmi se har ek KHwab o zist se ye lagaw

ye man ki god ka ehsas sab manazir mein

qarib o dur zamin mein ye bu-e-wataniyyat

nizam-e-shams-o-qamar mein payam-e-hifz-e-hayat

ba-chashm-e-sham-o-sahar mamta ki shabnam si

ye saz o dil mein mere naghma-e-analkaunain

har iztirab mein ruh-e-sukun-e-be-payan

zamana-e-guzaran mein dawam ka sargam

ye bazm-e-jashn-e-hayat-o-mamat sajti hui

kisi ki yaad ki shahnaiyan si bajti hui

ye ramaziyat ke anasir shuur-e-puKHta mein

falak pe wajd mein lati hai jo farishton ko

wo shaeri bhi bulugh-e-mizaj-e-tifli hai

ye nashtariyyat-e-hasti ye is ki sheriyat

ye patti patti pe gulzar-e-zindagi ke kisi

latif nur ki parchhaiyan si paDti hui

baham ye hairat o manusiyat ki sargoshi

bashar ki zat ki mahr-e-uluhiyat ba-jabin

abad ke dil mein jaDen marta hua sabza

gham-e-jahan mujhe aankhen dikha nahin sakta

ki aankhen dekhe hue hun main ne apne bachpan ki

mere lahu mein abhi tak sunai deti hain

sukut-e-huzn mein bhi ghunghruon ki jhankaren

ye aur baat ki main is pe kan de na sakun

isi wadiat-e-tifli ka ab sahaara hai

yahi hain marham-e-kafur dil ke zaKHmon par

unhi ko rakhna hai mahfuz ta-dam-e-aKHir

zamin-e-hind hai gahwara aaj bhi hamdam

agar hisab karen das karoD bachchon ka

ye bachche hind ki sab se baDi amanat hain

har ek bachche mein hain sad-jahan-e-imkanat

magar watan ka hal-o-aqd jin ke hath mein hai

nizam-e-zindagi-e-hind jin ke bas mein hai

rawayya dekh ke un ka ye kahna paDta hai

kise paDi hai ki samjhe wo is amanat ko

kise paDi hai ki bachchon ki zindagi ko bachae

KHarab hone se Talne se sukh jaane se

bachae kaun in aazurda honhaaron ko

wo zindagi jise ye de rahe hain bhaarat ko

karoDon bachchon ke miTne ka ek alamiyya hai

churae jate hain bachche abhi gharon se yahan

ki jism toD diye jaen un ke taki mile

churane walon ko KHairaat magh-mele ki

jo is azab se bach jaen to gale paD jaen

wo lanten ki hamare karoDon bachchon ki

nadim KHair se miTTi KHarab ho jae

wo muflisi ki KHushi chhin le wo be-bargi

udasiyon se bhari zindagi ki be-rangi

wo yasiyat na jis ko chhue shua-e-umid

wo aankhen dekhti hain har taraf jo be-nuri

wo TukTuki ki jo pathra ke rah gai ho nadim

wo be-dili ki hansi chhin le jo honTon se

wo dukh ki jis se sitaron ki aankh bhar aae

wo gandagi wo kasafat maraz-zada paikar

wo bachche chhin gae hon jin se bachpane un ke

hamin ne ghonT diya jis ke bachpane ka gala

jo khate-pite gharon ke hain bachche un ko bhi kya

samaj phulne-phalne ke de saka sadhan

wo sans lete hain tahzib-kush fazaon mein

hum un ko dete hain be-jaan aur ghalat talim

milega ilm-e-jihaalat-numa se kya un ko

nikal ke madrason aur uniwersitiyyon se

ye bad-nasib na ghar ke na ghaT ke honge

main puchhta hun ye talim hai ki makkari

karoDon zindagiyon se ye be-panah dagha

nisab aisa ki mehnat karen agar is par

bajae ilm jahaalat ka iktisab karen

ye ulTa dars-e-adab ye saDi hui talim

dimagh ki ho ghiza ya ghiza-e-jismani

har ek tarah ki ghiza mein yahan milawaT hai

wo jis ko bachchon ki talim kah ke dete hain

wo dars ulTi chhuri hai gale pe bachpan ke

zamin-e-hind hinDola nahin hai bachchon ka

karoDon bachchon ka ye des ab janaza hai

hum inqalab ke KHatron se KHub waqif hain

kuchh aur roz yahi rah gae jo lail-o-nahaar

to mol lena paDega hamein ye KHatra bhi

ki bachche qaum ki sab se baDi amanat hain