hisab-e-shab

maiñ apne aap gum summun udaas vāmāñda

ye sochtā huuñ ki kyā haq hai mujh ko jiine kā

na māhtāb mirā hai na āftāb mirā

na din ke rañg mire haiñ na lutf-e-ḳhvāb mirā

koī qarīb se dekhe to mere dāman meñ

shikāyateñ bhī bahut haiñ mohabbateñ bhī bahut

rivāyateñ bhī bahut haiñ baġhāvateñ bhī bahut

phir ik savāl hai bedār shab ke āñgan meñ

jo ḳhud hī jaag rahā ho udaas bistar par

vo shab ke reñgte lamhāt se kahe kyūñkar

siyāh raat hai aao lipaT ke so jaao

ufuq ke paar nigār-e-sahar ko kyā ma.alūm

dayār-e-shab meñ guzartī hai zindagī kaise

maiñ in ko apne ġhamoñ kā gavāh kaise karūñ

nashāt-e-zīst jo samjheñ mirī mashaqqat ko

misāl-e-reg bikharte hue badan ke sivā

tamām din kī thakan kā koī gavāh nahīñ

mujhe havā-e-sar-e-rah-guzar pasand sahī

magar havā-e-sar-e-rah-guzar mire haq meñ

sumūm-e-ta.ana-o-dushnām le ke aa.ī hai

mirī sahar ke liye shaam le ke aa.ī hai

ḳhulūs-o-rishta-e-mehr-o-vafā se kyā hāsil

kuchh aur chāhiye is ahd kī mohabbat ko

kahūñ to kis se kahūñ ai mire but-e-ma.asūm

matā-e-qalb-o-nazar haar kar huā ma.alūm

fareb thiiñ tirī bāñheñ sarāb the tire hoñT

jab āñsuoñ pe matā-e-vafā kā dhokā thā

to reg-e-dasht ke mānind ḳhushk thiiñ āñkheñ

ab āñsuoñ kī koī qadr hai na qīmat hai

to ashk-bār hī rahne lagī haiñ āñkheñ bhī

maiñ sochtā huuñ mujhe hazm-o-ehtiyāt se kyā

ye zindagī jo dobāra nahīñ milegī mujhe

guzār dūñgā yūñhī ghuum phir ke saḌkoñ par

mire liye yahī ġham haiñ yahī masā.il haiñ

maiñ rā.egāñ huuñ ki huuñ kāmrāñ nahīñ ma.alūm

yahī hai jurm mirā hai yahī ḳhatā merī

rahūñ havā kī tarah dasht-o-dar meñ āvāra

kabhī huuñ jañg pe nādim kabhī hai sulh se ḳhauf

ye jañg-o-sulh kā mafhūm āj-kal kyā hai

isī ḳhayāl meñ jis vaqt niiñd aatī hai

mire lahū meñ mirī saañs meñ mire dil meñ

ġhamoñ kī ajnabī zanjīr khaḌkhaḌātī hai

maiñ ḳhauf-e-habs se yak-laḳht jaag uThtā huuñ

ye sochtā huuñ ki bedāriyoñ meñ ālam-e-ḳhvāb

azaab hai nafas-e-ātish-āshnā kā azaab

mirā sukūñ kisī mujrim kī mohlat-e-ta.azīr

mirī ḳhushī kisī qaidī kā mehmāñ jaise

mirā vajūd guzartā huā dhuāñ jaise

ḳhud apne aap pe ab yuuñ mujhe ta.assuf hai

tamām umr rahā huuñ maiñ rā.egāñ jaise

main apne aap gum summun udas wamanda

ye sochta hun ki kya haq hai mujh ko jine ka

na mahtab mera hai na aaftab mera

na din ke rang mere hain na lutf-e-KHwab mera

koi qarib se dekhe to mere daman mein

shikayaten bhi bahut hain mohabbaten bhi bahut

riwayaten bhi bahut hain baghawaten bhi bahut

phir ek sawal hai bedar shab ke aangan mein

jo KHud hi jag raha ho udas bistar par

wo shab ke rengte lamhat se kahe kyunkar

siyah raat hai aao lipaT ke so jao

ufuq ke par nigar-e-sahar ko kya malum

dayar-e-shab mein guzarti hai zindagi kaise

main in ko apne ghamon ka gawah kaise karun

nashat-e-zist jo samjhen meri mashaqqat ko

misal-e-reg bikharte hue badan ke siwa

tamam din ki thakan ka koi gawah nahin

mujhe hawa-e-sar-e-rah-guzar pasand sahi

magar hawa-e-sar-e-rah-guzar mere haq mein

sumum-e-tana-o-dushnam le ke aai hai

meri sahar ke liye sham le ke aai hai

KHulus-o-rishta-e-mehr-o-wafa se kya hasil

kuchh aur chahiye is ahd ki mohabbat ko

kahun to kis se kahun ai mere but-e-masum

mata-e-qalb-o-nazar haar kar hua malum

fareb thin teri banhen sarab the tere honT

jab aansuon pe mata-e-wafa ka dhoka tha

to reg-e-dasht ke manind KHushk thin aankhen

ab aansuon ki koi qadr hai na qimat hai

to ashk-bar hi rahne lagi hain aankhen bhi

main sochta hun mujhe hazm-o-ehtiyat se kya

ye zindagi jo dobara nahin milegi mujhe

guzar dunga yunhi ghum phir ke saDkon par

mere liye yahi gham hain yahi masail hain

main raegan hun ki hun kaamran nahin malum

yahi hai jurm mera hai yahi KHata meri

rahun hawa ki tarah dasht-o-dar mein aawara

kabhi hun jang pe nadim kabhi hai sulh se KHauf

ye jang-o-sulh ka mafhum aaj-kal kya hai

isi KHayal mein jis waqt nind aati hai

mere lahu mein meri sans mein mere dil mein

ghamon ki ajnabi zanjir khaDkhaDati hai

main KHauf-e-habs se yak-laKHt jag uThta hun

ye sochta hun ki bedariyon mein aalam-e-KHwab

azab hai nafas-e-atish-ashna ka azab

mera sukun kisi mujrim ki mohlat-e-tazir

meri KHushi kisi qaidi ka mehman jaise

mera wajud guzarta hua dhuan jaise

KHud apne aap pe ab yun mujhe tassuf hai

tamam umr raha hun main raegan jaise