hubb-e-watan

Altaf Hussain Hali

hubb-e-watan

Altaf Hussain Hali

MORE BY Altaf Hussain Hali

    ai sip.har-e-barīñ ke sayyāro

    ai fazā-e-zamīñ ke gul-zāro

    ai pahāḌoñ dil-fareb fazā

    ai lab-e-jū ThanDī ThanDī havā

    ai anādil ke naġhma-e-saharī

    ai shab-e-māhtāb tāroñ bharī

    ai nasīm-e-bahār ke jhoñko

    dahr-e-nā-pā.edār ke dhoko

    tum har ik haal meñ ho yuuñ to aziiz

    the vatan meñ magar kuchh aur chiiz

    jab vatan meñ hamārā thā ramnā

    tum se dil baaġh baaġh thā apnā

    tum mirī dil-lagī ke sāmāñ the

    tum mire dard-e-dil ke darmāñ the

    tum se kaTtā thā rañj-e-tanhā.ī

    tum se paatā thā dil shakebā.ī

    aan ik ik tumhārī bhātī thī

    jo adā thī vo lubhātī thī

    karte the jab tum apnī ġham-ḳhvārī

    dhoī jaatī thiiñ kulfateñ saarī

    jab havā khāne baaġh jaate the

    ho ke ḳhush-hāl ghar meñ aate the

    baiTh jaate the jab kabhī lab-e-āb

    dho ke uThte the dil ke daaġh shitāb

    koh o sahrā o āsmān o zamīñ

    sab mirī dil-lagī shakleñ thiiñ

    par chhuTā jis se apnā mulk o dayār

    huā tum se ḳhud-ba-ḳhud bezār

    na guloñ adā ḳhush aatī hai

    na sadā bulbuloñ bhātī hai

    sair-e-gulshan hai ik janjāl

    shab-e-mahtāb jaan ko hai vabāl

    koh o sahrā se lab-e-dariyā

    jis taraf jaa.eñ nahīñ lagtā

    kyā hue vo din aur vo rāteñ

    tum meñ aglī ab nahīñ bāteñ

    ham ġhurbat meñ ho ga.e kuchh aur

    tumhāre badal ga.e kuchh taur

    go vahī ham haiñ aur vahī duniyā

    par nahīñ ham ko lutf duniyā

    ai vatan ai mire bahisht-e-barīñ

    kyā hue tere āsmān o zamīñ

    raat aur din vo samāñ na rahā

    vo zamīñ aur vo āsmāñ na rahā

    terī duurī hai morid-e-ālām

    tere chhuTne se chhuT gayā ārām

    kaaTe khātā hai baaġh bin tere

    gul haiñ nazroñ meñ daaġh bin tere

    miT gayā naqsh kāmrānī

    tujh se thā lutf zindagānī

    jo ki rahte haiñ tujh se duur sadā

    in ko kyā hogā zindagī mazā

    ho gayā yaañ to do din meñ ye haal

    tujh bin ek ek pal hai ik ik saal

    sach batā to sabhī ko bhātā hai

    ki mujh se terā naatā hai

    maiñ kartā huuñ tujh pe jaan nisār

    ki duniyā hai terī āshiq-e-zār

    kyā zamāne ko aziiz nahīñ

    ai vatan to aisī chiiz nahīñ

    jin o insān hayāt hai

    murġh o maahī kā.enāt hai

    hai nabātāt numū tujh se

    ruukh tujh bin hare nahīñ hote

    sab ko hotā hai tujh se nashv-o-numā

    sab ko bhātī hai terī āb-o-havā

    terī ik musht-e-ḳhāk ke badle

    luuñ na hargiz agar bahisht mile

    jaan jab tak na ho badan se judā

    koī dushman na ho vatan se havā

    hamla jab qaum-e-āryā ne kiyā

    aur bajā un hind meñ Dañkā

    mulk vaale bahut se kaam aa.e

    jo bache vo ġhulām kahlā.e

    shudr kahlā.e rākshas kahlā.e

    rañj pardes ke magar na uThā.e

    go ġhulāmī lag gayā dhabba

    na chhuTā un se des par na chhuTā

    qadr ai dil vatan meñ rahne

    pūchhe pardesiyoñ ke se koī

    jab milā rām-chandr ko ban-bās

    aur niklā vatan se ho ke udaas

    baap hukm rakh liyā sar par

    par chalā saath le ke dāġh-e-jigar

    paañv uThtā thā us ban taraf

    aur khiñchtā thā dil vatan taraf

    guzre ġhurbat meñ is qadar mah-o-sāl

    par na bholā ayodhya ḳhayāl

    des ko ban meñ bhaTaktā rahā

    dil meñ kāñTā ik khaTaktā rahā

    tiir ik dil meñ aa ke lagtā thā

    aatī thī jab ayodhya havā

    kaTne chaudah baras hue the muhāl

    goyā ek ek jug thā ek ik saal

    hue yasrib samt jab raahī

    sayyed-e-abtahī ke hamrāhī

    rishte ulfat ke saare toḌ chale

    aur bilkul vatan ko chhoḌ chale

    go vatan se chale the ho ke ḳhafā

    par vatan meñ thā sab aTkā

    dil-lagī ke bahut mile sāmān

    par na bhūle vatan ke registān

    dil meñ āThoñ pahar khaTakte the

    sañg-reze zamīn-e-bat.hā ke

    ghar jafāoñ se jin chhūTā thā

    dil se rishta na un TuuTā thā

    huiiñ yūsuf saḳhtiyāñ jab duur

    aur huā mulk-e-misr par māmūr

    misr meñ chaar thā hukm ravāñ

    aañkh thī jānib-e-vatan nigarāñ

    yād-e-kan.āñ jab us ko aatī thī

    saltanat saarī bhuul jaatī thī

    dukh uThā.e the jis vatan meñ saḳht

    taaj bhātā na us baġhair na taḳht

    jin se dekhī thī saḳht be-mehrī

    lau thī un bhā.iyoñ dil ko lagī

    ham bhī hubb-e-vatan meñ haiñ go ġharq

    ham meñ aur un meñ hai magar ye farq

    ham haiñ nām-e-vatan ke dīvāne

    vo the ahl-e-vatan ke parvāne

    jis ne yūsuf dāstāñ hai sunī

    jāntā hogā rūedād us

    misr meñ qaht jab paḌā aa kar

    aur huī qaum bhuuk se muztar

    kar diyā vaqf un pe baitulmāl

    lab tak aane diyā na harf-e-savāl

    khatiyāñ aur koThe khol diye

    muft saare zaḳhīre tol diye

    qāfile ḳhālī haath aate the

    aur bharpūr yaañ se jaate the

    yuuñ ga.e qaht ke vo saal guzar

    jaise bachchoñ bhuuk vaqt-e-sahar

    ai dil ai banda-e-vatan hoshiyār

    ḳhvāb-e-ġhaflat se ho zarā bedār

    o sharāb-e-ḳhudī ke matvāle

    ghar chaukhaT ke chūmne vaale

    naam hai kyā isī hubb-e-vatan

    jis tujh ko lagī huī hai lagan

    kabhī bachchoñ dhyān aatā hai

    kabhī yāroñ ġham satātā hai

    yaad aatā hai apnā shahr kabhī

    lau kabhī ahl-e-shahr hai lagī

    naqsh haiñ dil pe kūcha-o-bāzār

    phirte āñkhoñ meñ haiñ dar-o-dīvār

    kyā vatan kyā yahī mohabbat hai

    ye bhī ulfat meñ koī ulfat hai

    is meñ insāñ se kam nahīñ haiñ darind

    is se ḳhālī nahīñ chairnd o parind

    TukḌe hote haiñ sañg ġhurbat meñ

    suukh jaate haiñ ruukh furqat meñ

    ke kābul meñ aam paudā

    kabhī parvān chaḌh nahīñ saktā

    aa ke kābul se yaañ bihī-o-anār

    ho nahīñ sakte bārvar zinhār

    machhlī jab chhūTtī hai paanī se

    haath dhotī hai zindagānī se

    aag se jab huā samundar duur

    us ko jiine phir nahīñ maqdūr

    ghoḌe jab khet se bichhaḌte haiñ

    jaan ke laale un ke paḌte haiñ

    gaa.e, bhaiñs uuñT ho bakrī

    apne apne Thikāne ḳhush haiñ sabhī

    kahiye hubb-e-vatan isī ko agar

    ham se haivāñ nahīñ haiñ kuchh kam-tar

    hai koī apnī qaum hamdard

    nau-e-insāñ samjheñ jis ko fard

    jis pe itlāq-e-ādmī ho sahīh

    jis ko haivāñ pe de sakeñ tarjīh

    qaum par koī zad na dekh sake

    qaum hāl-e-bad na dekh sake

    qaum se jaan tak aziiz na ho

    qaum se baḌh ke koī chiiz na ho

    samjhe un ḳhushī ko rāhat-e-jāñ

    vaañ jo nau-roz ho to iid ho yaañ

    rañj ko un ke samjhe māya-e-ġham

    vaañ agar sog ho to yaañ mātam

    bhuul jaa.e sab apnī qadr-e-jalīl

    dekh kar bhā.iyoñ ko ḳhvār-o-zalīl

    jab paḌe un pe gardish-e-aflāk

    apnī āsā.ishoñ pe Daal de ḳhaak

    baiThe be-fikr kyā ho ham-vatano

    uTho ahl-e-vatan ke dost bano

    mard ho tum kisī ke kaam aao

    varna khaao piyo chale jaao

    jab koī zindagī lutf uThāo

    dil ko dukh bhā.iyoñ ke yaad dilāo

    pahno jab koī umda tum poshāk

    karo dāman se garebāñ chaak

    khānā khaao to meñ tum sharmāo

    ThanDā paanī piyo to ashk bahāo

    kitne bhaa.ī tumhāre haiñ nādār

    zindagī se hai jin dil bezār

    naukaroñ tumhāre jo hai ġhizā

    un ko vo ḳhvāb meñ nahīñ miltā

    jis pe tum jūtiyoñ se phirte ho

    vaañ mayassar nahīñ vo oḌhne ko

    khaao to pahle lo ḳhabar un

    jin pe biptā hai nīstī paḌī

    pahno to pahle bhā.iyoñ ko pahnāo

    ki hai utran tumhārī jin banāv

    ek Daalī ke sab haiñ barg-o-samar

    hai koī un meñ ḳhushk aur koī tar

    sab ko hai ek asl se paivand

    koī āzurda hai koī ḳhursand

    muqbilo mudabbiroñ ko yaad karo

    ḳhush-dilo ġham-zadoñ ko shaad karo

    jāgne vaale ġhāfiloñ ko jagāo

    tairne vaalo Dūbtoñ ko tirāo

    haiñ mile tum ko chashm o gosh agar

    lo jo jaa.e kor-o-kar ḳhabar

    tum agar haath paañv rakhte ho

    lañgḌe lūloñ ko kuchh sahārā do

    tandurustī shukr kiyā hai batāo

    rañj bīmār bhā.iyoñ haTāo

    tum agar chāhte ho mulk ḳhair

    na kisī ham-vatan ko samjho ġhair

    ho musalmān us meñ hindū

    bodh maz.hab ho ki ho brahamū

    ja.afrī hove ki ho hanafī

    jīn-mat hove ho vaishnavī

    sab ko mīThī nigāh se dekho

    samjho āñkhoñ putliyāñ sab ko

    mulk haiñ ittifāq se āzād

    shahr haiñ ittifāq se ābād

    hind meñ ittifāq hotā agar

    khāte ġhairoñ Thokareñ kyūñkar

    qaum jab ittifāq kho baiThī

    apnī pūñjī se haat dho baiThī

    ek ek ho gayā bad-ḳhvāh

    lagī ġhairoñ paḌne tum pe nigāh

    phir ga.e bhā.iyoñ se jab bhaa.ī

    jo na aanī thī vo balā aa.ī

    paañv iqbāl ke ukhaḌne lage

    mulk par sab ke haath paḌne lage

    kabhī tūrāniyoñ ne ghar luuTā

    kabhī durrāniyoñ ne zar luuTā

    kabhī nādir ne qatl-e-ām kiyā

    kabhī mahmūd ne ġhulām kiyā

    sab se āḳhir ko le ga.ī baazī

    ek shā.ista qaum maġhrib

    ye bhī tum par ḳhudā thā in.aam

    ki paḌā tum ko aisī qaum se kaam

    varna dum mārne na paate tum

    paḌtī jo sar pe vo uThāte tum

    mulk rauñde ga.e haiñ pairoñ se

    chain kis ko milā hai ġhairoñ se

    qaum se jo tumhāre bartāv

    socho ai mere pyāro aur sharmāo

    ahl-e-daulat ko hai ye istiġhnā

    ki nahīñ bhā.iyoñ kuchh parvā

    shahr meñ qaht duhā.ī hai

    jān-e-ālam laboñ pe aa.ī hai

    bachche ik ghar meñ bilbilāte haiñ

    ro ke maañ baap ko rulāte haiñ

    koī phirtā hai māñgtā dar dar

    hai kahīñ peT se bañdhā patthar

    par jo haiñ un meñ sāhib-e-maqdūr

    un meñ gintī ke hoñge aise ġhayūr

    ki jinheñ bhā.iyoñ ġham hogā

    apnī rāhat dhyān kam hogā

    jitne dekhoge pāoge be-dard

    dil ke nāmard aur naam ke mard

    aish meñ jin ke kaTte haiñ auqāt

    iid hai din to shabbarāt hai raat

    qaum martī hai bhuuk se to mare

    kaam unheñ apne halve-māñDe se

    in ko ab tak ḳhabar nahīñ aslan

    shahr meñ bhaav kyā hai ġhalle

    ġhalla arzāñ hai in dinoñ ki girāñ

    kaal hai shahr meñ paḌā ki samāñ

    kaal kyā shai hai kis ko kahte haiñ bhuuk

    bhuuk meñ kyūñki marte haiñ maflūk

    ser bhūke qadr kyā samjhe

    us ke nazdīk sab haiñ peT bhare

    ahl-e-daulat sun chuke tum haal

    ab suno rūedād-e-ahl-e-kamāl

    fāziloñ ko hai fāziloñ se inaad

    panditoñ meñ paḌe hue haiñ fasād

    hai tabīboñ meñ nok-jhok sadā

    ek se ek hai thuuk judā

    rahne do ahl-e-ilm haiñ is tarah

    pahalvānoñ meñ laag ho jis tarah

    iidū vāloñ hai agar paTThā

    sheḳhū vāloñ meñ nahīñ saktā

    shā.iroñ meñ bhī hai yahī takrār

    ḳhushnavesoñ ko hai yahī āzār

    laakh nekoñ kyuuñ na ho ik nek

    dekh saktā nahīñ hai ek ko ek

    is pe turra ye hai ki ahl-e-hunar

    duur samjhe hue haiñ apnā ghar

    milī ik gāñTh jis ko haldī

    us ne samjhā ki maiñ huuñ pansārī

    nusḳha ik tib jis ko aatā hai

    sage-bhā.ī se vo chhupātā hai

    jis ko aatā hai phūñknā kushta

    hai hamārī taraf se vo gūñgā

    jis ko hai kuchh ramal meñ mālūmāt

    vo nahīñ kartā sīdhe muñh se baat

    baap bhaa.ī ho ki ho beTā

    bhed paatā nahīñ munajjam

    kaam kañdle jis ko hai ma.alūm

    hai zamāne meñ us buḳhl dhuum

    al-ġharaz jis ke paas hai kuchh chiiz

    jaan se bhī sivā hai us ko aziiz

    qaum par un kuchh nahīñ ehsāñ

    un honā na honā hai yaksāñ

    sab kamālāt aur hunar un ke

    qabr meñ un ke saath jā.eñge

    qaum kyā kah ke un ko ro.egī

    naam par kyuuñ ki jaan kho.egī

    tarbiyat-yāfta haiñ jo yaañ ke

    ḳhvāh b-a hoñ is meñ m.a

    bharte hubb-e-vatan go dam haiñ

    par muhibb-e-vatan bahut kam haiñ

    qaum ko un se jo umīdeñ thiiñ

    ab jo dekhā to sab ġhalat niklīñ

    history un aur geography

    saat parde meñ muñh diye hai paḌī

    band us qufl meñ hai ilm un

    jis kunjī kuchh nahīñ hai patā

    lete haiñ apne dil dil meñ maze

    goyā gūñge guḌ haiñ khaa.e hue

    karte phirte haiñ sair-e-gul tanhā

    koī paas un ke nahīñ saktā

    ahl-e-insāf sharm hai

    gar nahīñ buḳhl ye to phir kyā hai

    tum ne dekhā hai jo vo sab ko dikhāo

    tum ne chakhā hai jo vo sab ko chakhāo

    ye jo daulat tumhāre paas hai aaj

    ham-vatan is ke haiñ bahut mohtāj

    muñh ko ek ik tumhāre hai taktā

    ki nikaltā hai muñh se aap ke kyā

    aap shā.ista haiñ to apne liye

    kuchh sulūk apnī qaum se bhī kiye

    mez kursī agar lagāte haiñ aap

    qaum se pūchhiye to pun hai na paap

    muñDā juutā gar aap ko hai pasand

    qaum ko is se fā.eda na gazand

    qaum par karte ho agar ehsāñ

    to dikhāo kuchh apnā josh-e-nihāñ

    kuchh dinoñ aish meñ ḳhalal Daalo

    peT meñ jo hai sab ugal Daalo

    ilm ko kar do kū-ba-kū arzāñ

    hind ko kar dikhāo englistāñ

    sunte ho sāma.īn-e-bā-tamkīñ

    sunte ho hāzrīn-e-sadr-nashīñ

    jo haiñ duniyā meñ qaum ke hamdard

    banda-e-qaum un ke haiñ zan o mard

    baap hai duā ye bahr-e-pisar

    qaum maiñ banā.ūñ us ko sipar

    maañ ḳhudā se ye māñgtī hai murād

    qaum par se nisār ho aulād

    bhaa.ī aapas meñ karte haiñ paimāñ

    agar maal de to maiñ duuñ jaañ

    ahl-e-himmat kamā ke laate haiñ

    ham-vatan fā.ede uThāte haiñ

    kahīñ hote haiñ madrase jaarī

    daḳhl aur ḳharj jin ke haiñ bhārī

    aur kahīñ hote haiñ club qaa.em

    mab.has-e-hikmat aur adab qaa.em

    nit-na.e khulte haiñ davā-ḳhāne

    bante haiñ saikḌoñ shifā-ḳhāne

    mulk meñ jo maraz haiñ ālam-gīr

    qaum par un farz hai tadbīr

    haiñ sadā is udheḌ-bun meñ tabīb

    ki koī nusḳha haath aa.e ajiib

    qaum ko pahuñche manfa.at jis se

    mulk meñ phaileñ fā.ede jis ke

    khap ga.e kitne ban ke jhāḌoñ meñ

    mar ga.e saikḌoñ pahāḌoñ meñ

    likhe jab tak jiye safar-nāme

    chal diye haath meñ qalam thāme

    go safar meñ uThā.e rañj-e-kamāl

    kar diyā par vatan ko apne nihāl

    haiñ ab in ke gavāh hubb-e-vatan

    dar-o-dīvār-e-paris o london

    kaam haiñ sab bashar ke ham-vatanoñ

    tum se bhī ho sake to mard bano

    chhoḌo afsurdagī ko josh meñ aao

    bas bahut so.e uTTho hosh meñ aao

    qāfile tum se baḌh ga.e kosoñ

    rahe jaate ho sab se pīchhe kyuuñ

    qāfiloñ se agar milā chāho

    mulk aur qaum bhalā chāho

    gar rahā chāhte ho izzat se

    bhā.iyoñ ko nikālo zillat se

    un izzat tumhārī izzat hai

    un zillat tumhārī zillat hai

    qaum mubtadil hai jo insāñ

    be-haqīqat hai garche hai sultāñ

    qaum duniyā meñ jis hai mumtāz

    hai faqīrī meñ bhī vo bā-e.azāz

    izzat-e-qaum chāhte ho agar

    ke phailāo un meñ ilm-o-hunar

    zaat faḳhr aur nasab ġhurūr

    uTh ga.e ab jahāñ se ye dastūr

    ab na sayyad iftiḳhār sahīh

    na barhaman ko shudr par tarjīh

    huī turkī tamām ḳhānoñ meñ

    kaT ga.ī jaḌ se ḳhāndānoñ meñ

    qaum izzat ab hunar se hai

    ilm se ki sīm-o-zar se hai

    koī din meñ vo daur aa.egā

    be-hunar bhiik tak na pā.egā

    na raheñge sadā yahī din raat

    yaad rakhnā hamārī aaj baat

    gar nahīñ sunte qaul 'hālī'

    phir na kahnā ki koī kahtā thā

    ai siphar-e-barin ke sayyaro

    ai faza-e-zamin ke gul-zaro

    ai pahaDon ki dil-fareb faza

    ai lab-e-ju ki ThanDi ThanDi hawa

    ai anadil ke naghma-e-sahari

    ai shab-e-mahtab taron bhari

    ai nasim-e-bahaar ke jhonko

    dahr-e-na-paedar ke dhoko

    tum har ek haal mein ho yun to aziz

    the watan mein magar kuchh aur hi chiz

    jab watan mein hamara tha ramna

    tum se dil bagh bagh tha apna

    tum meri dil-lagi ke saman the

    tum mere dard-e-dil ke darman the

    tum se kaTta tha ranj-e-tanhai

    tum se pata tha dil shakebai

    aan ek ek tumhaari bhati thi

    jo ada thi wo ji lubhati thi

    karte the jab tum apni gham-KHwari

    dhoi jati thin kulfaten sari

    jab hawa khane bagh jate the

    ho ke KHush-haal ghar mein aate the

    baiTh jate the jab kabhi lab-e-ab

    dho ke uThte the dil ke dagh shitab

    koh o sahra o aasman o zamin

    sab meri dil-lagi ki shaklen thin

    par chhuTa jis se apna mulk o dayar

    ji hua tum se KHud-ba-KHud bezar

    na gulon ki ada KHush aati hai

    na sada bulbulon ki bhati hai

    sair-e-gulshan hai ji ka ek janjal

    shab-e-mahtab jaan ko hai wabaal

    koh o sahra se ta lab-e-dariya

    jis taraf jaen ji nahin lagta

    kya hue wo din aur wo raaten

    tum mein agli si ab nahin baaten

    hum hi ghurbat mein ho gae kuchh aur

    ya tumhaare badal gae kuchh taur

    go wahi hum hain aur wahi duniya

    par nahin hum ko lutf duniya ka

    ai watan ai mere bahisht-e-barin

    kya hue tere aasman o zamin

    raat aur din ka wo saman na raha

    wo zamin aur wo aasman na raha

    teri duri hai morid-e-alam

    tere chhuTne se chhuT gaya aaram

    kaTe khata hai bagh bin tere

    gul hain nazron mein dagh bin tere

    miT gaya naqsh kaamrani ka

    tujh se tha lutf zindagani ka

    jo ki rahte hain tujh se dur sada

    in ko kya hoga zindagi ka maza

    ho gaya yan to do hi din mein ye haal

    tujh bin ek ek pal hai ek ek sal

    sach bata to sabhi ko bhata hai

    ya ki mujh se hi tera nata hai

    main hi karta hun tujh pe jaan nisar

    ya ki duniya hai teri aashiq-e-zar

    kya zamane ko tu aziz nahin

    ai watan tu to aisi chiz nahin

    jin o insan ki hayat hai tu

    murgh o mahi ki kaenat hai tu

    hai nabaatat ka numu tujh se

    rukh tujh bin hare nahin hote

    sab ko hota hai tujh se nashw-o-numa

    sab ko bhati hai teri aab-o-hawa

    teri ek musht-e-KHak ke badle

    lun na hargiz agar bahisht mile

    jaan jab tak na ho badan se juda

    koi dushman na ho watan se hawa

    hamla jab qaum-e-arya ne kiya

    aur baja un ka hind mein Danka

    mulk wale bahut se kaam aae

    jo bache wo ghulam kahlae

    shudr kahlae rakshas kahlae

    ranj pardes ke magar na uThae

    go ghulami ka lag gaya dhabba

    na chhuTa un se des par na chhuTa

    qadr ai dil watan mein rahne ki

    puchhe pardesiyon ke ji se koi

    jab mila ram-chandr ko ban-bas

    aur nikla watan se ho ke udas

    bap ka hukm rakh liya sar par

    par chala sath le ke dagh-e-jigar

    panw uThta tha us ka ban ki taraf

    aur khinchta tha dil watan ki taraf

    guzre ghurbat mein is qadar mah-o-sal

    par na bhola ayodhya ka KHayal

    des ko ban mein ji bhaTakta raha

    dil mein kanTa sa ek khaTakta raha

    tir ek dil mein aa ke lagta tha

    aati thi jab ayodhya ki hawa

    kaTne chaudah baras hue the muhaal

    goya ek ek jug tha ek ek sal

    hue yasrib ki samt jab rahi

    sayyed-e-abtahi ke hamrahi

    rishte ulfat ke sare toD chale

    aur bilkul watan ko chhoD chale

    go watan se chale the ho ke KHafa

    par watan mein tha sab ka ji aTka

    dil-lagi ke bahut mile saman

    par na bhule watan ke registan

    dil mein aaThon pahar khaTakte the

    sang-reze zamin-e-batha ke

    ghar jafaon se jin ki chhuTa tha

    dil se rishta na un ka TuTa tha

    huin yusuf ki saKHtiyan jab dur

    aur hua mulk-e-misr par mamur

    misr mein chaar su tha hukm rawan

    aankh thi jaanib-e-watan nigaran

    yaad-e-kanan jab us ko aati thi

    saltanat sari bhul jati thi

    dukh uThae the jis watan mein saKHt

    taj bhata na us baghair na taKHt

    jin se dekhi thi saKHt be-mehri

    lau thi un bhaiyon ki dil ko lagi

    hum bhi hubb-e-watan mein hain go gharq

    hum mein aur un mein hai magar ye farq

    hum hain nam-e-watan ke diwane

    wo the ahl-e-watan ke parwane

    jis ne yusuf ki dastan hai suni

    jaanta hoga ruedad us ki

    misr mein qaht jab paDa aa kar

    aur hui qaum bhuk se muztar

    kar diya waqf un pe baitulmal

    lab tak aane diya na harf-e-sawal

    khatiyan aur koThe khol diye

    muft sare zaKHire tol diye

    qafile KHali hath aate the

    aur bharpur yan se jate the

    yun gae qaht ke wo sal guzar

    jaise bachchon ki bhuk waqt-e-sahar

    ai dil ai banda-e-watan hoshiyar

    KHwab-e-ghaflat se ho zara bedar

    o sharab-e-KHudi ke matwale

    ghar ki chaukhaT ke chumne wale

    nam hai kya isi ka hubb-e-watan

    jis ki tujh ko lagi hui hai lagan

    kabhi bachchon ka dhyan aata hai

    kabhi yaron ka gham satata hai

    yaad aata hai apna shahr kabhi

    lau kabhi ahl-e-shahr ki hai lagi

    naqsh hain dil pe kucha-o-bazar

    phirte aankhon mein hain dar-o-diwar

    kya watan kya yahi mohabbat hai

    ye bhi ulfat mein koi ulfat hai

    is mein insan se kam nahin hain darind

    is se KHali nahin chairnd o parind

    TukDe hote hain sang ghurbat mein

    sukh jate hain rukh furqat mein

    ja ke kabul mein aam ka pauda

    kabhi parwan chaDh nahin sakta

    aa ke kabul se yan bihi-o-anar

    ho nahin sakte barwar zinhaar

    machhli jab chhuTti hai pani se

    hath dhoti hai zindagani se

    aag se jab hua samundar dur

    us ko jine ka phir nahin maqdur

    ghoDe jab khet se bichhaDte hain

    jaan ke lale un ke paDte hain

    gae, bhains unT ho ya bakri

    apne apne Thikane KHush hain sabhi

    kahiye hubb-e-watan isi ko agar

    hum se haiwan nahin hain kuchh kam-tar

    hai koi apni qaum ka hamdard

    nau-e-insan ka samjhen jis ko fard

    jis pe itlaq-e-admi ho sahih

    jis ko haiwan pe de saken tarjih

    qaum par koi zad na dekh sake

    qaum ka haal-e-bad na dekh sake

    qaum se jaan tak aziz na ho

    qaum se baDh ke koi chiz na ho

    samjhe un ki KHushi ko rahat-e-jaan

    wan jo nau-roz ho to id ho yan

    ranj ko un ke samjhe maya-e-gham

    wan agar sog ho to yan matam

    bhul jae sab apni qadr-e-jalil

    dekh kar bhaiyon ko KHwar-o-zalil

    jab paDe un pe gardish-e-aflak

    apni aasaishon pe Dal de KHak

    baiThe be-fikr kya ho ham-watano

    uTho ahl-e-watan ke dost bano

    mard ho tum kisi ke kaam aao

    warna khao piyo chale jao

    jab koi zindagi ka lutf uThao

    dil ko dukh bhaiyon ke yaad dilao

    pahno jab koi umda tum poshak

    karo daman se ta gareban chaak

    khana khao to ji mein tum sharmao

    ThanDa pani piyo to ashk bahao

    kitne bhai tumhaare hain nadar

    zindagi se hai jin ka dil bezar

    naukaron ki tumhaare jo hai ghiza

    un ko wo KHwab mein nahin milta

    jis pe tum jutiyon se phirte ho

    wan mayassar nahin wo oDhne ko

    khao to pahle lo KHabar un ki

    jin pe bipta hai nisti ki paDi

    pahno to pahle bhaiyon ko pahnao

    ki hai utran tumhaari jin ka banaw

    ek Dali ke sab hain barg-o-samar

    hai koi un mein KHushk aur koi tar

    sab ko hai ek asl se paiwand

    koi aazurda hai koi KHursand

    muqbilo mudabbiron ko yaad karo

    KHush-dilo gham-zadon ko shad karo

    jagne wale ghafilon ko jagao

    tairne walo Dubton ko tirao

    hain mile tum ko chashm o gosh agar

    lo jo li jae kor-o-kar ki KHabar

    tum agar hath panw rakhte ho

    langDe lulon ko kuchh sahaara do

    tandurusti ka shukr kiya hai batao

    ranj bimar bhaiyon ka haTao

    tum agar chahte ho mulk ki KHair

    na kisi ham-watan ko samjho ghair

    ho musalman us mein ya hindu

    bodh mazhab ho ya ki ho brahamu

    jafri howe ya ki ho hanafi

    jin-mat howe ya ho waishnawi

    sab ko miThi nigah se dekho

    samjho aankhon ki putliyan sab ko

    mulk hain ittifaq se aazad

    shahr hain ittifaq se aabaad

    hind mein ittifaq hota agar

    khate ghairon ki Thokaren kyunkar

    qaum jab ittifaq kho baiThi

    apni punji se hat dho baiThi

    ek ka ek ho gaya bad-KHwah

    lagi ghairon ki paDne tum pe nigah

    phir gae bhaiyon se jab bhai

    jo na aani thi wo bala aai

    panw iqbaal ke ukhaDne lage

    mulk par sab ke hath paDne lage

    kabhi turaniyon ne ghar luTa

    kabhi durraniyon ne zar luTa

    kabhi nadir ne qatl-e-am kiya

    kabhi mahmud ne ghulam kiya

    sab se aaKHir ko le gai bazi

    ek shaista qaum maghrib ki

    ye bhi tum par KHuda ka tha inam

    ki paDa tum ko aisi qaum se kaam

    warna dum marne na pate tum

    paDti jo sar pe wo uThate tum

    mulk raunde gae hain pairon se

    chain kis ko mila hai ghairon se

    qaum se jo tumhaare bartaw

    socho ai mere pyaro aur sharmao

    ahl-e-daulat ko hai ye istighna

    ki nahin bhaiyon ki kuchh parwa

    shahr mein qaht ki duhai hai

    jaan-e-alam labon pe aai hai

    bachche ek ghar mein bilbilate hain

    ro ke man bap ko rulate hain

    koi phirta hai mangta dar dar

    hai kahin peT se bandha patthar

    par jo hain un mein sahib-e-maqdur

    un mein ginti ke honge aise ghayur

    ki jinhen bhaiyon ka gham hoga

    apni rahat ka dhyan kam hoga

    jitne dekhoge paoge be-dard

    dil ke namard aur nam ke mard

    aish mein jin ke kaTte hain auqat

    id hai din to shabbaraat hai raat

    qaum marti hai bhuk se to mare

    kaam unhen apne halwe-manDe se

    in ko ab tak KHabar nahin aslan

    shahr mein bhaw kya hai ghalle ka

    ghalla arzan hai in dinon ki giran

    kal hai shahr mein paDa ki saman

    kal kya shai hai kis ko kahte hain bhuk

    bhuk mein kyunki marte hain mafluk

    ser bhuke ki qadr kya samjhe

    us ke nazdik sab hain peT bhare

    ahl-e-daulat ka sun chuke tum haal

    ab suno ruedad-e-ahl-e-kamal

    fazilon ko hai fazilon se inad

    panditon mein paDe hue hain fasad

    hai tabibon mein nok-jhok sada

    ek se ek ka hai thuk juda

    rahne do ahl-e-ilm hain is tarah

    pahalwanon mein lag ho jis tarah

    idu walon ka hai agar paTTha

    sheKHu walon mein ja nahin sakta

    shairon mein bhi hai yahi takrar

    KHushnaweson ko hai yahi aazar

    lakh nekon ka kyun na ho ek nek

    dekh sakta nahin hai ek ko ek

    is pe turra ye hai ki ahl-e-hunar

    dur samjhe hue hain apna ghar

    mili ek ganTh jis ko haldi ki

    us ne samjha ki main hun pansari

    nusKHa ek tib ka jis ko aata hai

    sage-bhai se wo chhupata hai

    jis ko aata hai phunkna kushta

    hai hamari taraf se wo gunga

    jis ko hai kuchh ramal mein malumat

    wo nahin karta sidhe munh se baat

    bap bhai ho ya ki ho beTa

    bhed pata nahin munajjam ka

    kaam kandle ka jis ko hai malum

    hai zamane mein us ki buKHl ki dhum

    al-gharaz jis ke pas hai kuchh chiz

    jaan se bhi siwa hai us ko aziz

    qaum par un ka kuchh nahin ehsan

    un ka hona na hona hai yaksan

    sab kamalat aur hunar un ke

    qabr mein un ke sath jaenge

    qaum kya kah ke un ko roegi

    nam par kyun ki jaan khoegi

    tarbiyat-yafta hain jo yan ke

    KHwah b-a hon is mein ya ma

    bharte hubb-e-watan ka go dam hain

    par muhibb-e-watan bahut kam hain

    qaum ko un se jo umiden thin

    ab jo dekha to sab ghalat niklin

    history un ki aur geography

    sat parde mein munh diye hai paDi

    band us qufl mein hai ilm un ka

    jis ki kunji ka kuchh nahin hai pata

    lete hain apne dil hi dil mein maze

    goya gunge ka guD hain khae hue

    karte phirte hain sair-e-gul tanha

    koi pas un ke ja nahin sakta

    ahl-e-insaf sharm ki ja hai

    gar nahin buKHl ye to phir kya hai

    tum ne dekha hai jo wo sab ko dikhao

    tum ne chakha hai jo wo sab ko chakhao

    ye jo daulat tumhaare pas hai aaj

    ham-watan is ke hain bahut mohtaj

    munh ko ek ek tumhaare hai takta

    ki nikalta hai munh se aap ke kya

    aap shaista hain to apne liye

    kuchh suluk apni qaum se bhi kiye

    mez kursi agar lagate hain aap

    qaum se puchhiye to pun hai na pap

    munDa juta gar aap ko hai pasand

    qaum ko is se faeda na gazand

    qaum par karte ho agar ehsan

    to dikhao kuchh apna josh-e-nihan

    kuchh dinon aish mein KHalal Dalo

    peT mein jo hai sab ugal Dalo

    ilm ko kar do ku-ba-ku arzan

    hind ko kar dikhao englistan

    sunte ho samain-e-ba-tamkin

    sunte ho hazrin-e-sadr-nashin

    jo hain duniya mein qaum ke hamdard

    banda-e-qaum un ke hain zan o mard

    bap ki hai dua ye bahr-e-pisar

    qaum ki main banaun us ko sipar

    man KHuda se ye mangti hai murad

    qaum par se nisar ho aulad

    bhai aapas mein karte hain paiman

    tu agar mal de to main dun jaan

    ahl-e-himmat kama ke late hain

    ham-watan faede uThate hain

    kahin hote hain madrase jari

    daKHl aur KHarj jin ke hain bhaari

    aur kahin hote hain club qaem

    mabhas-e-hikmat aur adab qaem

    nit-nae khulte hain dawa-KHane

    bante hain saikDon shifa-KHane

    mulk mein jo maraz hain aalam-gir

    qaum par un ki farz hai tadbir

    hain sada is udheD-bun mein tabib

    ki koi nusKHa hath aae ajib

    qaum ko pahunche manfat jis se

    mulk mein phailen faede jis ke

    khap gae kitne ban ke jhaDon mein

    mar gae saikDon pahaDon mein

    likhe jab tak jiye safar-name

    chal diye hath mein qalam thame

    go safar mein uThae ranj-e-kamal

    kar diya par watan ko apne nihaal

    hain ab in ke gawah hubb-e-watan

    dar-o-diwar-e-paris o london

    kaam hain sab bashar ke ham-watanon

    tum se bhi ho sake to mard bano

    chhoDo afsurdagi ko josh mein aao

    bas bahut soe uTTho hosh mein aao

    qafile tum se baDh gae koson

    rahe jate ho sab se pichhe kyun

    qafilon se agar mila chaho

    mulk aur qaum ka bhala chaho

    gar raha chahte ho izzat se

    bhaiyon ko nikalo zillat se

    un ki izzat tumhaari izzat hai

    un ki zillat tumhaari zillat hai

    qaum ka mubtadil hai jo insan

    be-haqiqat hai garche hai sultan

    qaum duniya mein jis ki hai mumtaz

    hai faqiri mein bhi wo ba-eazaz

    izzat-e-qaum chahte ho agar

    ja ke phailao un mein ilm-o-hunar

    zat ka faKHr aur nasab ka ghurur

    uTh gae ab jahan se ye dastur

    ab na sayyad ka iftiKHar sahih

    na barhaman ko shudr par tarjih

    hui turki tamam KHanon mein

    kaT gai jaD se KHandanon mein

    qaum ki izzat ab hunar se hai

    ilm se ya ki sim-o-zar se hai

    koi din mein wo daur aaega

    be-hunar bhik tak na paega

    na rahenge sada yahi din raat

    yaad rakhna hamari aaj ki baat

    gar nahin sunte qaul 'haali' ka

    phir na kahna ki koi kahta tha

    Source:

    • Book : intekhab-e-sukhan (Pg. 32)
    • Author : Ibne Kanwal
    • Publication : Kitabi Duniya (2005-2008)
    • Edition : 2005-2008
    0
    COMMENTS
    VIEW COMMENTS

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY