hudud ka daera

shajar hajar huuñ ki insāñ huuñ yā sitāre huuñ

sabhī hudūd ke ik dā.ere meñ rahte haiñ

ye kā.enāt zamān o makāñ kī qaid meñ hai

har ek shai hai uruuj o zavāl kī pāband

har ek manzil-e-āḳhir hai manzil-e-avval

jahāñ se ik na.ī manzil kī justujū meñ sabhī

haqīqatoñ ko taḳhayyul kā rañg dete haiñ

safar meñ ruk nahīñ sakte qadam musāfir ke

zamīñ bhī ghūmtī hai rāste bhī chalte haiñ

har ik ufuq pe zamīñ āsmāñ se miltī hai

ghaḌī chale na chale vaqt to guzartā hai

shajar hajar hun ki insan hun ya sitare hun

sabhi hudud ke ek daere mein rahte hain

ye kaenat zaman o makan ki qaid mein hai

har ek shai hai uruj o zawal ki paband

har ek manzil-e-aKHir hai manzil-e-awwal

jahan se ek nai manzil ki justuju mein sabhi

haqiqaton ko taKHayyul ka rang dete hain

safar mein ruk nahin sakte qadam musafir ke

zamin bhi ghumti hai raste bhi chalte hain

har ek ufuq pe zamin aasman se milti hai

ghaDi chale na chale waqt to guzarta hai