hujum-e-girya

Ali Akbar Natiq

hujum-e-girya

Ali Akbar Natiq

MORE BYAli Akbar Natiq

    hameñ bhī ro le hujūm-e-girya ki phir na ā.eñge ġham ke mausam

    hameñ bhī ro le ki ham vahī haiñ

    jo āftāboñ bastiyoñ se surāġh laa.e the un saveroñ jin ko shabnam ke pahle qatroñ ne ġhusl baḳhshā

    safed rañgoñ se nūr-e-ma.anī nikāl lete the aur chāñdī ujālte the

    shafaq pe Thahre sunahre bādal se zard sone ko Dhālte the

    ḳhunuk havāoñ meñ ḳhushbuoñ ko milā ke un ko uḌāne vaale

    sabā partoñ pe sher likh kar adam shakleñ banāne vaale

    dimāġh rakhte the lafz o ma.anī aur dast-e-hunar ke mālik

    vaqār-e-nūr-e-charāġh ham the

    hameñ bhī ro le hujūm-e-girya

    hameñ bhī ro le ki ham vahī haiñ

    jo tez āñdhī meñ saaf chehroñ ko dekh lete the aur sāñsoñ ko bhāñpte the

    falak-nashīnoñ se guftugūeñ thiiñ aur pariyoñ se khelte the

    karīm logoñ sohbatoñ meñ kushāda kū-e-saḳhā ko dekhā

    kabhī na rokā thā ham ko sūraj ke chobdāroñ ne qasr-e-baizā ke dāḳhle se

    vahī to ham haiñ

    vahī to ham haiñ jo luT chuke haiñ hafīz rāhoñ pe luTne vaale

    usī falak siyah-zamīñ par jahāñ pe larzāñ haiñ shor-e-nāla se ādiloñ sunahrī kaḌiyāñ

    hameñ bhī ro le hujūm-e-girya

    hameñ bhī ro le ki in dinoñ meñ hamārī pushtoñ pe baar hotā hai zaḳhm-e-tāza ke surḳh phūloñ aur gardan meñ sard aahan kohna laḌiyāñ

    hamārī zid meñ safed nāḳhun qalam banāne meñ dast-e-qātil saath dete haiñ aur neze uchhālte haiñ

    havā lahroñ ne reg-e-sahrā tez dhāroñ se rishte joḌe

    sharīr hāthoñ se kañkaroñ siyāh bārish ke rābte haiñ

    hamārī zid meñ mulkoñ mulkoñ ke shahryāroñ ne ahd bāñdhe

    yahī ki ham ko dhueñ se bāñdheñ aur ab dhueñ se bañdhe hue haiñ

    so ham pe rone ke nauha karne ke din yahī haiñ hujūm-e-girya

    ki musta.id haiñ hamāre mātam ko gahre sāyoñ sard shāmeñ

    ḳhizāñ-rasīda tavīl shāmeñ

    hameñ bhī ro le hujūm-e-girya ki phir na ā.eñge ġham ke mausam

    hamein bhi ro le hujum-e-girya ki phir na aaenge gham ke mausam

    hamein bhi ro le ki hum wahi hain

    jo aaftabon ki bastiyon se suragh lae the un saweron ka jin ko shabnam ke pahle qatron ne ghusl baKHsha

    safed rangon se nur-e-mani nikal lete the aur chandi ujalte the

    shafaq pe Thahre sunahre baadal se zard sone ko Dhaalte the

    KHunuk hawaon mein KHushbuon ko mila ke un ko uDane wale

    saba ki parton pe sher likh kar adam ki shaklen banane wale

    dimagh rakhte the lafz o mani ka aur dast-e-hunar ke malik

    waqar-e-nur-e-charagh hum the

    hamein bhi ro le hujum-e-girya

    hamein bhi ro le ki hum wahi hain

    jo tez aandhi mein saf chehron ko dekh lete the aur sanson ko bhanpte the

    falak-nashinon se guftuguen thin aur pariyon se khelte the

    karim logon ki sohbaton mein kushada ku-e-saKHa ko dekha

    kabhi na roka tha hum ko suraj ke chobdaron ne qasr-e-baiza ke daKHle se

    wahi to hum hain

    wahi to hum hain jo luT chuke hain hafiz rahon pe luTne wale

    usi falak ki siyah-zamin par jahan pe larzan hain shor-e-nala se aadilon ki sunahri kaDiyan

    hamein bhi ro le hujum-e-girya

    hamein bhi ro le ki in dinon mein hamari pushton pe bar hota hai zaKHm-e-taza ke surKH phulon ka aur gardan mein sard aahan ki kohna laDiyan

    hamari zid mein safed naKHun qalam banane mein dast-e-qatil ka sath dete hain aur neze uchhaalte hain

    hawa ki lahron ne reg-e-sahra ki tez dhaaron se rishte joDe

    sharir hathon se kankaron ki siyah barish ke rabte hain

    hamari zid mein hi mulkon mulkon ke shahryaron ne ahd bandhe

    yahi ki hum ko dhuen se bandhen aur ab dhuen se bandhe hue hain

    so hum pe rone ke nauha karne ke din yahi hain hujum-e-girya

    ki mustaid hain hamare matam ko gahre sayon ki sard shamen

    KHizan-rasida tawil shamen

    hamein bhi ro le hujum-e-girya ki phir na aaenge gham ke mausam

    Videos
    This video is playing from YouTube

    Videos
    This video is playing from YouTube

    Ali Akbar Natiq

    Ali Akbar Natiq

    RECITATIONS

    Ali Akbar Natiq

    Ali Akbar Natiq,

    Ali Akbar Natiq

    hujum-e-girya Ali Akbar Natiq

    0
    COMMENTS
    VIEW COMMENTS

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY

    Jashn-e-Rekhta | 2-3-4 December 2022 - Major Dhyan Chand National Stadium, Near India Gate, New Delhi

    GET YOUR FREE PASS
    Speak Now