husn aur maut

jo phuul saare gulistāñ meñ sab se achchhā ho

faroġh-e-nūr ho jis se fazā-e-rañgīñ meñ

ḳhizāñ ke jaur-o-sitam ko na jis ne dekhā ho

bahār ne jise ḳhūn-e-jigar se paalā ho

vo ek phuul samātā hai chashm-e-gulchīñ meñ

hazār phūloñ se ābād bāġh-e-hastī hai

ajal kī aañkh faqat ek ko tarastī hai

ka.ī diloñ kī umīdoñ kā jo sahārā ho

fazā-e-dahr kī ālūdgī se baalā ho

jahāñ meñ aa ke abhī jis ne kuchh na dekhā ho

na qaht-e-aish-o-masarrat na, ġham kī arzānī

kanār-e-rahmat-e-haq meñ use sulātī hai

sukūt-e-shab meñ farishtoñ kī marsiya-ḳhvānī

tavāf karne ko sub.h-e-bahār aatī hai

sabā chaḌhāne ko jannat ke phuul laatī hai

jo phul sare gulistan mein sab se achchha ho

farogh-e-nur ho jis se faza-e-rangin mein

KHizan ke jaur-o-sitam ko na jis ne dekha ho

bahaar ne jise KHun-e-jigar se pala ho

wo ek phul samata hai chashm-e-gulchin mein

hazar phulon se aabaad bagh-e-hasti hai

ajal ki aankh faqat ek ko tarasti hai

kai dilon ki umidon ka jo sahaara ho

faza-e-dahr ki aaludgi se baala ho

jahan mein aa ke abhi jis ne kuchh na dekha ho

na qaht-e-aish-o-masarrat na, gham ki arzani

kanar-e-rahmat-e-haq mein use sulati hai

sukut-e-shab mein farishton ki marsiya-KHwani

tawaf karne ko subh-e-bahaar aati hai

saba chaDhane ko jannat ke phul lati hai