husn-e-jaanan

tū ki shahkār-e-sannā'-e-har-avvalīñ

tū bayāñ meñ nahīñ dastaras meñ nahīñ

husn kāfir tirā aañkh tauba-shikan

daav par lag ga.e jān-o-īmān bhī

tū dalīl-e-sahar sham'-e-bahr-o-bar

rāh-e-īmān bhī rang-e-vijdān bhī

terī āñkhoñ meñ dair-o-haram qaid hai

jām-e-gulfām kyā jām-e-jam qaid hai

gaahe rang-e-ġhilāf-e-haram ho ga.iiñ

gaahe rang-e-hinā dam-ba-dam ho ga.iiñ

gaahe kitnoñ ko bhaTkā diyā raah se

gaahe ye manziloñ kā 'alam ho ga.iiñ

terī palkeñ jhukīñ chāñd Dhalne lage

shaam hone lagī zaḳhm jalne lage

sāhira phir tirā sehr hone lagā

log girne lage hosh uḌne lage

terā ruḳhsār hai chāñdnī kī hayā

duudh meñ jaise sindūr ghulne lagā

tere ruḳhsār rang-e-shafaq ho ga.e

yā'nī ye shā'irī ke ufuq ho ga.e

kis ko tashbīh duuñ isti'āra karūñ

lab ko lab ke liye hī gavārā karūñ

hoñT kyā āyateñ haiñ ye qur.ān kī

jaan haiñ jān-e-jāñ ye tirī jaan kī

un se chhū leñ to alfāz ḳhushbū baneñ

qahqahe nuur ban jaa.eñ jaadū baneñ

shabnamī pankhuḌī pankhuḌī haiñ faqat

aur kyā maiñ kahūñ zindagī haiñ faqat

sochtā huuñ to kuchh sochā jaatā nahīñ

husn terā to ab dekhā jaatā nahīñ

yā'nī 'jāved-aḳhtar’ ne sach hī kahā

husn-e-jānāñ kī tā'rīf mumkin nahīñ

husn-e-jānāñ kī tā'rīf mumkin nahīñ

tu ki shahkar-e-sanna'-e-har-awwalin

tu bayan mein nahin dastaras mein nahin

husn kafir tera aankh tauba-shikan

daw par lag gae jaan-o-iman bhi

tu dalil-e-sahar sham'-e-bahr-o-bar

rah-e-iman bhi rang-e-wijdan bhi

teri aankhon mein dair-o-haram qaid hai

jam-e-gulfam kya jam-e-jam qaid hai

gahe rang-e-ghilaf-e-haram ho gain

gahe rang-e-hina dam-ba-dam ho gain

gahe kitnon ko bhaTka diya rah se

gahe ye manzilon ka 'alam ho gain

teri palken jhukin chand Dhalne lage

sham hone lagi zaKHm jalne lage

sahira phir tera sehr hone laga

log girne lage hosh uDne lage

tera ruKHsar hai chandni ki haya

dudh mein jaise sindur ghulne laga

tere ruKHsar rang-e-shafaq ho gae

ya'ni ye sha'iri ke ufuq ho gae

kis ko tashbih dun isti'ara karun

lab ko lab ke liye hi gawara karun

honT kya aayaten hain ye quran ki

jaan hain jaan-e-jaan ye teri jaan ki

un se chhu len to alfaz KHushbu banen

qahqahe nur ban jaen jadu banen

shabnami pankhuDi pankhuDi hain faqat

aur kya main kahun zindagi hain faqat

sochta hun to kuchh socha jata nahin

husn tera to ab dekha jata nahin

ya'ni 'jawed-aKHtar’ ne sach hi kaha

husn-e-jaanan ki ta'rif mumkin nahin

husn-e-jaanan ki ta'rif mumkin nahin