husn-e-jaanan

vo ek chehra vo ek paikar

vo ek laḌkī vo ek jaadū

vo aañkh khole to din banā.e

vo muskurā.e to gul khilā.e

vo aañkh jhapke badal de manzar

jhukā.e nazreñ to raat chhā.e

nazar nazar meñ usī ke sadqe

hazār jaañ se utaar Dālūñ

hai aisā chehra yaqīn maano

maiñ jis pe duniyā hī vaar Dālūñ

gulāb hoñToñ se jab vo bole

hazār lafzoñ kī girheñ khole

vo ḳhushbuoñ ke safar pe nikle

har ek mausam bhī saath ho le

vo aise baazū jo khol de to

hazār manzar simaT ke aa.eñ

vo rāstoñ par qadam jo rakkhe

qadam se raste lipaTte jaa.eñ

jo paḌhne baiTho to aañkh mahke

vo achchhe lafzoñ kī diary hai

hazār ġhazloñ kā tarjumāñ hai

vo us kā chehra to shā.erī hai

jo dekho maddham sī raushnī meñ

gumāñ ye guzre ki chāñd utre

jhukā ke nazreñ jo hañs de ik pal

hazāroñ lākhoñ sitāre bikhreñ

agar jo gahrī sī saañs legī

to yuuñ lagegā gulāb mahke

agar vo palkeñ zarā sī khole

to yuuñ lagegā ki ḳhvāb mahke

agar vo chhū legī shāḳh koī

ḳhizāñ kī rut meñ bahār utre

umaD ke aa.egī koī bārish

jo ho ke us par nisār utre

vo bādaloñ kā sitāra jaise

vo ḳhushbuoñ kā ishāra jaise

kabhī ravānī hai pāniyoñ sī

kabhī lage hai kināra jaise

vo dhuup jaise ho sardiyoñ kī

nazar meñ khultā nazāra jaise

vo os jaise ho pattiyoñ par

dahaktā koī sharāra jaise

vo panchhiyoñ kī sadā hai koī

vo dilbaroñ kī adā hai koī

vo ik tabassum hai chāñdnī kā

falak pe jaise ghaTā hai koī

hazār jānib se us kī āñkheñ

mohabbatoñ ke diye jalā.eñ

vo jūñhī baazū pe sar Tikā.e

to ḳhvāb nīñdoñ meñ ghul ke aa.eñ

vo rāstoñ kā yaqīn koī

vo manziloñ kā nishān koī

vo jaise rūhoñ meñ tāzgī ho

vo jaise jismoñ meñ jaan koī

banā ke āñkhoñ ko mai-kada vo

nazar ko chāhe to jaam kar le

uThā ke palkeñ jo dekh le to

vo shāhzāda ġhulām kar le

hai dil kī masnad Thikāna us kā

vajūd merā gharānā us kā

hai merī sāñsoñ kī tishnagī vo

hai dhaḌkanoñ ko bahāna us kā

vo us kī āñkheñ hoñ siip jaise

mahaktī shab ke hoñ diip jaise

vo lab ki khilte gulāb koī

vo shā.erī kī kitāb koī

vo āshiqī ke nisāb meñ gum

kisī dīvāne kā ḳhvāb koī

sahar kī ThanDī havā ke jaisī

vo nekiyoñ kī jazā ke jaisī

vo mere hoñToñ pe khilne vaalī

vo ḳhūbsūrat duā ke jaisī

ḳhudāyā us ko kamāl denā

uruuj denā jamāl denā

atā.eñ us kā nasīb karnā

balā.eñ saarī hī Taal denā

kabhī jo us ko satā.eñ ġham to

phir apnī rahmat kī shaal denā

phir apnī rahmat kī shaal denā

wo ek chehra wo ek paikar

wo ek laDki wo ek jadu

wo aankh khole to din banae

wo muskurae to gul khilae

wo aankh jhapke badal de manzar

jhukae nazren to raat chhae

nazar nazar mein usi ke sadqe

hazar jaan se utar Dalun

hai aisa chehra yaqin mano

main jis pe duniya hi war Dalun

gulab honTon se jab wo bole

hazar lafzon ki girhen khole

wo KHushbuon ke safar pe nikle

har ek mausam bhi sath ho le

wo aise bazu jo khol de to

hazar manzar simaT ke aaen

wo raston par qadam jo rakkhe

qadam se raste lipaTte jaen

jo paDhne baiTho to aankh mahke

wo achchhe lafzon ki diary hai

hazar ghazlon ka tarjuman hai

wo us ka chehra to shaeri hai

jo dekho maddham si raushni mein

guman ye guzre ki chand utre

jhuka ke nazren jo hans de ek pal

hazaron lakhon sitare bikhren

agar jo gahri si sans legi

to yun lagega gulab mahke

agar wo palken zara si khole

to yun lagega ki KHwab mahke

agar wo chhu legi shaKH koi

KHizan ki rut mein bahaar utre

umaD ke aaegi koi barish

jo ho ke us par nisar utre

wo baadalon ka sitara jaise

wo KHushbuon ka ishaara jaise

kabhi rawani hai paniyon si

kabhi lage hai kinara jaise

wo dhup jaise ho sardiyon ki

nazar mein khulta nazara jaise

wo os jaise ho pattiyon par

dahakta koi sharara jaise

wo panchhiyon ki sada hai koi

wo dilbaron ki ada hai koi

wo ek tabassum hai chandni ka

falak pe jaise ghaTa hai koi

hazar jaanib se us ki aankhen

mohabbaton ke diye jalaen

wo junhi bazu pe sar Tikae

to KHwab nindon mein ghul ke aaen

wo raston ka yaqin koi

wo manzilon ka nishan koi

wo jaise ruhon mein tazgi ho

wo jaise jismon mein jaan koi

bana ke aankhon ko mai-kada wo

nazar ko chahe to jam kar le

uTha ke palken jo dekh le to

wo shahzada ghulam kar le

hai dil ki masnad Thikana us ka

wajud mera gharana us ka

hai meri sanson ki tishnagi wo

hai dhaDkanon ko bahana us ka

wo us ki aankhen hon sip jaise

mahakti shab ke hon dip jaise

wo lab ki khilte gulab koi

wo shaeri ki kitab koi

wo aashiqi ke nisab mein gum

kisi diwane ka KHwab koi

sahar ki ThanDi hawa ke jaisi

wo nekiyon ki jaza ke jaisi

wo mere honTon pe khilne wali

wo KHubsurat dua ke jaisi

KHudaya us ko kamal dena

uruj dena jamal dena

ataen us ka nasib karna

balaen sari hi Tal dena

kabhi jo us ko sataen gham to

phir apni rahmat ki shaal dena

phir apni rahmat ki shaal dena