husn ki zaban se

jahāñ meñ hai ziyā mirī maiñ husn-e-jalva-kār huuñ

maiñ raunaq is chaman kī huuñ maiñ fasl-e-nau-bahār huuñ

maiñ zeb-e-kā.enāt huuñ maiñ faḳhr-e-rozgār huuñ

maiñ shāhid-e-nahufta kā jamāl-e-āshkār huuñ

ki ā.īne meñ dahr ke maiñ aks-e-kirdgār huuñ

kalīm ko maiñ apnā ruḳh na be-ḳhatar dikhā sakā

surāġh mere nuur kā na koh-e-tūr pā sakā

na maiñ nazar meñ aa sakā na aql meñ samā sakā

ḳhayāl mere auj par na par lagā ke jā sakā

maiñ hisn-e-be-shikast huuñ maiñ rāh-e-be-guzār huuñ

paḌī hai ik ḳhafīf sī nujūm par kiran mirī

ki rakhtī hai tavāf meñ sadā unheñ lagan mirī

chhupī hijāb-e-quds meñ hai sham-e-anjuman mirī

sitāre jal ke ḳhaak hoñ jo dekh leñ phaban mirī

maiñ ganj-e-āb-o-tāb huuñ maiñ bahr-e-nūr-o-nār huuñ

ye chāñdnī kī ThanDakeñ ye dhuup kī harārateñ

ye sub.h kī sabāhateñ ye shaam kī malāhateñ

zamīn kī ye zīnateñ falak kī ye latāfateñ

ye bijliyoñ kī shoḳhiyāñ ye bādaloñ kī rañgateñ

ye rañg-rūp haiñ mire maiñ in meñ āshkār huuñ

har ek shāḳh-sār meñ mujhī se aab o rañg hai

phapakte haiñ daraḳht jo ye merī hī umañg hai

phudakte haiñ parind sab mujhī se ye tarañg hai

karishme dekh kar mire har ek aql dañg hai

haiñ khel nit-na.e mire maiñ vo tilism-kār huuñ

guloñ ke rañg rañg se ayaañ haiñ jhalkiyāñ mirī

chaman ke ġhunche ġhunche meñ shamīm hai nihāñ mirī

zabāñ pe patte patte kī ravāñ hai dāstāñ mirī

surañg paud paud kī jaḌoñ meñ hai davāñ mirī

maiñ rūh-e-sabza-zār huuñ maiñ nāzish-e-bahār huuñ

jahan mein hai ziya meri main husn-e-jalwa-kar hun

main raunaq is chaman ki hun main fasl-e-nau-bahaar hun

main zeb-e-kaenat hun main faKHr-e-rozgar hun

main shahid-e-nahufta ka jamal-e-ashkar hun

ki aaine mein dahr ke main aks-e-kirdgar hun

kalim ko main apna ruKH na be-KHatar dikha saka

suragh mere nur ka na koh-e-tur pa saka

na main nazar mein aa saka na aql mein sama saka

KHayal mere auj par na par laga ke ja saka

main hisn-e-be-shikast hun main rah-e-be-guzar hun

paDi hai ek KHafif si nujum par kiran meri

ki rakhti hai tawaf mein sada unhen lagan meri

chhupi hijab-e-quds mein hai sham-e-anjuman meri

sitare jal ke KHak hon jo dekh len phaban meri

main ganj-e-ab-o-tab hun main bahr-e-nur-o-nar hun

ye chandni ki ThanDaken ye dhup ki hararaten

ye subh ki sabahaten ye sham ki malahaten

zamin ki ye zinaten falak ki ye latafaten

ye bijliyon ki shoKHiyan ye baadalon ki rangaten

ye rang-rup hain mere main in mein aashkar hun

har ek shaKH-sar mein mujhi se aab o rang hai

phapakte hain daraKHt jo ye meri hi umang hai

phudakte hain parind sab mujhi se ye tarang hai

karishme dekh kar mere har ek aql dang hai

hain khel nit-nae mere main wo tilism-kar hun

gulon ke rang rang se ayan hain jhalkiyan meri

chaman ke ghunche ghunche mein shamim hai nihan meri

zaban pe patte patte ki rawan hai dastan meri

surang paud paud ki jaDon mein hai dawan meri

main ruh-e-sabza-zar hun main nazish-e-bahaar hun