iada

maiñ tumhāre sāmne tanhā khaḌā huuñ

jānā-pahchānā sā naqsh-āshnā sā

chand yādoñ kī sadā sā

sūrat-e-harf-o-navā sā

is qadar nazdīk itne paas huuñ maiñ

tum agar chāho to chhū sakte ho mujh ko

baat kar sakte ho mujh se

Daal kar mujh par nigāheñ

khol kar sab band rāheñ

apne ashkoñ se bhigo sakte ho mujh ko

tum agar chāho mirī tah meñ utar kar

naap sakte ho mirī gahrā.iyāñ sab

tol sakte ho mirī parchhā.iyāñ sab

jaan sakte ho mirī tanhā.iyoñ meñ

kaise kaise sang-reze

kitne TuuTe ḳhvāb dhuñdlī ārzūeñ

be-zabāñ lamhe shikasta roz-o-shab be-nūr saa.e

mere andar bolte haiñ

raaz mere kholte haiñ

maiñ tumheñ bhūlā nahīñ huuñ

ab bhī tum ashkoñ kī sūrat

mere andar jī rahī ho

maiñ tumhāre sāmne tanhā khaḌā huuñ

aaj bhī Dhalte hue saa.e pahan kar

tum agar chāho mirā ehsān ban kar

khol kar merī sadāqat

jhāñk kar merī tahoñ meñ

DhūñD sakte ho mujhe merī tahoñ meñ

maan sakte ho mujhe dam-sāz apnā

pyaar kar saktī ho mujh se

tum agar chāho

maiñ tumhāre sāmne khaḌā huuñ

main tumhaare samne tanha khaDa hun

jaana-pahchana sa naqsh-ashna sa

chand yaadon ki sada sa

surat-e-harf-o-nawa sa

is qadar nazdik itne pas hun main

tum agar chaho to chhu sakte ho mujh ko

baat kar sakte ho mujh se

Dal kar mujh par nigahen

khol kar sab band rahen

apne ashkon se bhigo sakte ho mujh ko

tum agar chaho meri tah mein utar kar

nap sakte ho meri gahraiyan sab

tol sakte ho meri parchhaiyan sab

jaan sakte ho meri tanhaiyon mein

kaise kaise sang-reze

kitne TuTe KHwab dhundli aarzuen

be-zaban lamhe shikasta roz-o-shab be-nur sae

mere andar bolte hain

raaz mere kholte hain

main tumhein bhula nahin hun

ab bhi tum ashkon ki surat

mere andar ji rahi ho

main tumhaare samne tanha khaDa hun

aaj bhi Dhalte hue sae pahan kar

tum agar chaho mera ehsan ban kar

khol kar meri sadaqat

jhank kar meri tahon mein

DhunD sakte ho mujhe meri tahon mein

man sakte ho mujhe dam-saz apna

pyar kar sakti ho mujh se

tum agar chaho

main tumhaare samne khaDa hun