dil-ashob

yuuñ kahne ko rāheñ mulk-e-vafā kī ujaal gayā

ik dhund milī jis raah meñ paik-e-ḳhayāl gayā

phir chāñd hameñ kisī raat kī god meñ Daal gayā

ham shahr meñ Thahreñ, aisā to jī kā rog nahīñ

aur ban bhī haiñ suune un meñ bhī ham se log nahīñ

aur kūche ko tere lauTne kā to savāl gayā

tire lutf-o-atā kī dhuum sahī mahfil mahfil

ik shaḳhs thā inshā nām-e-mohabbat meñ kāmil

ye shaḳhs yahāñ pāmāl rahā, pāmāl gayā

tirī chaah meñ dekhā ham ne ba-hāl-e-ḳharāb ise

par ishq o vafā ke yaad rahe ādāb ise

tirā naam o maqām jo pūchhā, hañs kar Taal gayā

ik saal gayā, ik saal nayā hai aane ko

par vaqt kī bhī ab hosh nahīñ dīvāne ko

dil haath se is ke vahshī hiran kī misāl gayā

ham ahl-e-vafā ranjūr sahī, majbūr nahīñ

aur shahr-e-vafā se dasht-e-junūñ kuchh duur nahīñ

ham ḳhush na sahī, par tere sar kā vabāl gayā

ab husn ke gaḌ.h aur shahr-panāheñ suunī haiñ

vo jo āshnā the un sab kī nigāheñ suunī haiñ

par tū jo gayā har baat kā jī se malāl gayā

yun kahne ko rahen mulk-e-wafa ki ujal gaya

ek dhund mili jis rah mein paik-e-KHayal gaya

phir chand hamein kisi raat ki god mein Dal gaya

hum shahr mein Thahren, aisa to ji ka rog nahin

aur ban bhi hain sune un mein bhi hum se log nahin

aur kuche ko tere lauTne ka to sawal gaya

tere lutf-o-ata ki dhum sahi mahfil mahfil

ek shaKHs tha insha nam-e-mohabbat mein kaamil

ye shaKHs yahan pamal raha, pamal gaya

teri chah mein dekha hum ne ba-haal-e-KHarab ise

par ishq o wafa ke yaad rahe aadab ise

tera nam o maqam jo puchha, hans kar Tal gaya

ek sal gaya, ek sal naya hai aane ko

par waqt ki bhi ab hosh nahin diwane ko

dil hath se is ke wahshi hiran ki misal gaya

hum ahl-e-wafa ranjur sahi, majbur nahin

aur shahr-e-wafa se dasht-e-junun kuchh dur nahin

hum KHush na sahi, par tere sar ka wabaal gaya

ab husn ke gaDh aur shahr-panahen suni hain

wo jo aashna the un sab ki nigahen suni hain

par tu jo gaya har baat ka ji se malal gaya