idhar na dekho

idhar na dekho ki jo bahādur

qalam ke yā teġh ke dhanī the

jo azm-o-himmat ke mudda.ī the

ab un ke hāthoñ meñ sidq-e-īmāñ kī

āzmūda purānī talvār muḌ ga.ī hai

jo kaj-kulah sāhib-e-hasham the

jo ahl-e-dastār mohtaram the

havas ke pur-pech rāstoñ meñ

kulah kisī ne girau rakh dī

kisī ne dastār bech dī hai

udhar bhī dekho

jo apne ruḳhshāñ lahū ke dīnār

muft bāzār meñ luTā kar

nazar se ojhal hue

aur apnī lahad meñ is vaqt tak ġhanī haiñ,

udhar bhī dekho

jo harf-e-haq kī salīb par apnā tan sajā kar

jahāñ se ruḳhsat hue

aur ahl-e-jahāñ meñ is vaqt tak nabī haiñ

idhar na dekho ki jo bahadur

qalam ke ya tegh ke dhani the

jo azm-o-himmat ke muddai the

ab un ke hathon mein sidq-e-iman ki

aazmuda purani talwar muD gai hai

jo kaj-kulah sahib-e-hasham the

jo ahl-e-dastar mohtaram the

hawas ke pur-pech raston mein

kulah kisi ne girau rakh di

kisi ne dastar bech di hai

udhar bhi dekho

jo apne ruKHshan lahu ke dinar

muft bazar mein luTa kar

nazar se ojhal hue

aur apni lahad mein is waqt tak ghani hain,

udhar bhi dekho

jo harf-e-haq ki salib par apna tan saja kar

jahan se ruKHsat hue

aur ahl-e-jahan mein is waqt tak nabi hain