id

farhat-e-dil rāhat-e-jāñ aish-e-paiham ke liye

iid aa.ī ban ke rāhat saare aalam ke liye

ḳhushk ab angūr ke sharbat se tar hone lage

haath sab ke baḌh rahe haiñ sāġhar-e-jam ke liye

aaj jī-bhar kar pilānā aur piinā chāhiye

tiis din tarse haiñ ik ik qatra-e-yam ke liye

dostoñ ko har taraf sāmān-e-rāhat hai nasīb

ġham hai dushman ke liye dushman banā ġham ke liye

be-takalluf tifl-e-shoḳh-o-shaiḳh-e-shaibb-o-mard-o-zan

aaj mashġhūl-e-tarab haiñ lutf-e-bāham ke liye

majlis-e-vāz aaj to hotī nazar aatī nahīñ

hazrat-e-vā.iz abas koshāñ haiñ koram ke liye

kal hameñ mil jā.egā gar hauz-e-kausar hī kahīñ

aaj kyoñ pyāse raheñ ham aish-e-mub.ham ke liye

eid ke din chāhiye shukr-e-ḳhudā zikr-e-rasūl

vaqt kyoñ zaa.e.a kareñ ham zer aur bam ke liye

ā.īye sun lījiye hai aaj duniyā-e-suḳhan

gosh-bar-āvāz in ash.ār-e-mulham ke liye

farhat-e-dil rahat-e-jaan aish-e-paiham ke liye

id aai ban ke rahat sare aalam ke liye

KHushk ab angur ke sharbat se tar hone lage

hath sab ke baDh rahe hain saghar-e-jam ke liye

aaj ji-bhar kar pilana aur pina chahiye

tis din tarse hain ek ek qatra-e-yam ke liye

doston ko har taraf saman-e-rahat hai nasib

gham hai dushman ke liye dushman bana gham ke liye

be-takalluf tifl-e-shoKH-o-shaiKH-e-shaibb-o-mard-o-zan

aaj mashghul-e-tarab hain lutf-e-baham ke liye

majlis-e-waz aaj to hoti nazar aati nahin

hazrat-e-waiz abas koshan hain koram ke liye

kal hamein mil jaega gar hauz-e-kausar hi kahin

aaj kyon pyase rahen hum aish-e-mubham ke liye

eid ke din chahiye shukr-e-KHuda zikr-e-rasul

waqt kyon zaea karen hum zer aur bam ke liye

aaiye sun lijiye hai aaj duniya-e-suKHan

gosh-bar-awaz in ashaar-e-mulham ke liye