iKHtilaf

bayāz-e-zindagī meñ amn kā varaq hī saaf hai

ye āfiyat kā qasr hai aur qasr meñ shigāf hai

zamīñ pe āsmāñ nahīñ ye zulm kā ġhilāf hai

hameñ ye zulm meñ aTī fazā se iḳhtilāf hai

karishma-gar nigāh se hameñ koī ġharaz nahīñ

bahāna-sāz aah se hameñ koī ġharaz nahīñ

numā.ishī karāh se hameñ koī ġharaz nahīñ

hameñ galī-saḌī huī vafā se iḳhtilāf hai

kahīñ hai intihā-pasand ḳhū kī nāgavār bū

kahīñ hai sard hastiyoñ pe kāñptī ridā-e-ḳhū

kahīñ havās meñ kamī kahīñ havās meñ ġhulū

hameñ to asr-e-hāl kī havā se iḳhtilāf hai

vahāñ to fauj-e-misr hai yahāñ nahīñ koī asā

muḳhālifat meñ hosh rakh na is tarah se josh khā

baġhaur dast-o-bāzū-e-adū ko dekh le zarā

hameñ tirī ghuTTī huī sadā se iḳhtilāf hai

shu.ūr-e-dīñ se jabr-e-nāravā kī baag moḌ de

sukūn-o-āgahī se do diloñ kā rabt joḌ de

salāmtī se panja-e-sitam kā zor toḌ de

hameñ tirī TuuTī huī asā se iḳhtilāf hai

bayaz-e-zindagi mein amn ka waraq hi saf hai

ye aafiyat ka qasr hai aur qasr mein shigaf hai

zamin pe aasman nahin ye zulm ka ghilaf hai

hamein ye zulm mein aTi faza se iKHtilaf hai

karishma-gar nigah se hamein koi gharaz nahin

bahana-saz aah se hamein koi gharaz nahin

numaishi karah se hamein koi gharaz nahin

hamein gali-saDi hui wafa se iKHtilaf hai

kahin hai intiha-pasand KHu ki nagawar bu

kahin hai sard hastiyon pe kanpti rida-e-KHu

kahin hawas mein kami kahin hawas mein ghulu

hamein to asr-e-haal ki hawa se iKHtilaf hai

wahan to fauj-e-misr hai yahan nahin koi asa

muKHalifat mein hosh rakh na is tarah se josh kha

baghaur dast-o-bazu-e-adu ko dekh le zara

hamein teri ghuTTi hui sada se iKHtilaf hai

shuur-e-din se jabr-e-narawa ki bag moD de

sukun-o-agahi se do dilon ka rabt joD de

salamti se panja-e-sitam ka zor toD de

hamein teri TuTi hui asa se iKHtilaf hai