ilm

hai zabāñ par sab kī mid.hat ilm kī

kyoñ na ho dil meñ mohabbat ilm kī

kyoñ na ho har ik ko chāhat ilm kī

har kisī ko hai zarūrat ilm kī

ilm ke rutbe se vāqif hai jahāñ

goshe goshe meñ hai shohrat ilm kī

jis ko chaskā lag gayā hai ilm kā

pūchhiye us se haqīqat ilm kī

bas usī ne paa.ī izzat mulk meñ

dil se kī hai jis ne ḳhidmat ilm kī

saare duniyā kā chahītā hai ye ilm

rahtī hai har dil meñ ulfat ilm kī

vo zalīl-o-ḳhvār duniyā meñ huā

jis kisī ne kī na izzat ilm kī

do jahāñ kī us ko ne.amat mil ga.ī

ho ga.ī jis par ināyat ilm kī

surḳh-rū hotā hai vo ik din zarūr

rahtī hai jis dil ko chāhat ilm kī

taḳht-e-shāhī kyā hai miltā hai ḳhudā

is se baḌh kar kyā ho barakat ilm kī

kyoñ kisī ke aage vo phailā.e haath

haath aa.ī jis ke daulat ilm kī

hai ye kunjī aish aur ārām kī

kyā batā.ūñ qadr-o-qīmat ilm kī

saarī duniyā pā rahī hai jis se faiz

hai haqīqat meñ vo daulat ilm kī

jaan se is ko samajhte haiñ aziiz

jin pe raushan hai haqīqat ilm kī

ho vo bachcha yā ho būḌhā yā javān

har kisī ko hai zarūrat ilm kī

jaao 'jauhar' har kahīñ be-ḳhauf tum

koī lūTegā na daulat ilm kī

hai zaban par sab ki midhat ilm ki

kyon na ho dil mein mohabbat ilm ki

kyon na ho har ek ko chahat ilm ki

har kisi ko hai zarurat ilm ki

ilm ke rutbe se waqif hai jahan

goshe goshe mein hai shohrat ilm ki

jis ko chaska lag gaya hai ilm ka

puchhiye us se haqiqat ilm ki

bas usi ne pai izzat mulk mein

dil se ki hai jis ne KHidmat ilm ki

sare duniya ka chahita hai ye ilm

rahti hai har dil mein ulfat ilm ki

wo zalil-o-KHwar duniya mein hua

jis kisi ne ki na izzat ilm ki

do jahan ki us ko neamat mil gai

ho gai jis par inayat ilm ki

surKH-ru hota hai wo ek din zarur

rahti hai jis dil ko chahat ilm ki

taKHt-e-shahi kya hai milta hai KHuda

is se baDh kar kya ho barakat ilm ki

kyon kisi ke aage wo phailae hath

hath aai jis ke daulat ilm ki

hai ye kunji aish aur aaram ki

kya bataun qadr-o-qimat ilm ki

sari duniya pa rahi hai jis se faiz

hai haqiqat mein wo daulat ilm ki

jaan se is ko samajhte hain aziz

jin pe raushan hai haqiqat ilm ki

ho wo bachcha ya ho buDha ya jawan

har kisi ko hai zarurat ilm ki

jao 'jauhar' har kahin be-KHauf tum

koi luTega na daulat ilm ki