ilm

kaun jaane ki ye ḳhurshīd hai nā-ḳhūb ki ḳhuub

chāñd achchhā ki burā kaun batā saktā hai

ḳhush ki nā-ḳhush haiñ ye sham.eñ ye sitāre ye shafaq

kaun ye parda-e-asrār uThā saktā hai

haañ ye mumkin hai shuā.eñ hoñ zarar kā baa.is

kaun kahtā hai ujāloñ se karo kasb-e-ziyāñ

raushnī aag se niklī hai jalā saktī hai

baat itnī bhī samajh sakte nahīñ ham insāñ

ilm mazdūr ko fankār banā detā hai

ilm mansūr ko hoshiyār banā detā hai

ilm alfāz ko talvār banā detā hai

ilm tinke ko bhī patvār banā detā hai

paañv ke chhāle ko rahvār banā detā hai

ik tahī-dast ko sālār banā detā hai

raushnī gul na karo raat abhī baaqī hai

ziist samjhī nahīñ jo baat abhī baaqī hai

ḳhvāhish-e-chashma-e-zulmāt abhī baaqī hai

pa.e naisāñ ho jo barsāt abhī baaqī hai

ilm ek nuur hai ye nuur bikhar jaane do

sub.h-e-irfāñ ko zarā aur nikhar jaane do

rāh-e-hastī ke ḳham-o-pech sañvar jaane do

kaun jaane ki ye KHurshid hai na-KHub ki KHub

chand achchha ki bura kaun bata sakta hai

KHush ki na-KHush hain ye shamen ye sitare ye shafaq

kaun ye parda-e-asrar uTha sakta hai

han ye mumkin hai shuaen hon zarar ka bais

kaun kahta hai ujalon se karo kasb-e-ziyan

raushni aag se nikli hai jala sakti hai

baat itni bhi samajh sakte nahin hum insan

ilm mazdur ko fankar bana deta hai

ilm mansur ko hoshiyar bana deta hai

ilm alfaz ko talwar bana deta hai

ilm tinke ko bhi patwar bana deta hai

panw ke chhaale ko rahwar bana deta hai

ek tahi-dast ko salar bana deta hai

raushni gul na karo raat abhi baqi hai

zist samjhi nahin jo baat abhi baqi hai

KHwahish-e-chashma-e-zulmat abhi baqi hai

pae naisan ho jo barsat abhi baqi hai

ilm ek nur hai ye nur bikhar jaane do

subh-e-irfan ko zara aur nikhar jaane do

rah-e-hasti ke KHam-o-pech sanwar jaane do