iltija

ab na chehre pe ujālā

na garebāñ meñ sahar

āñkheñ ḳhāmosh

butoñ kī mānind

yaas bādal kī tarah chhā.ī huī

rāheñ ghabrā.ī huī

ek ik aañkh ne paḌh lī

vo ibārat yaaro

jo mire chehre pe qassam-e-azal ne likhī

us ibārat kā har ik lafz banā hai kaasa

maiñ savālī nazar aane lagā

sar-tā-ba-qadam

āñkheñ ḳhāmosh

butoñ kī mānind

chāhtā huuñ ki baras jaa.eñ ye āñkheñ

khul kar jism taaza ho to shāyad shagūfe kī numū

jabr kī dhuup meñ bhī

hans paḌeñ ḳhvāboñ ke kañval

mere chehre pe jo likhī hai ibārat

us ke

ek ik lafz ke chehre pe ujālā ho

garebāñ meñ sahar

iltijā kartā huuñ

us qādir-e-mutlaq ke huzūr

geñd-e-shab meñ mah-o-najm sajā.e jis ne

shahr-e-dil meñ na sahī chāñd sitāre lekin

us kī dīvāroñ ke hisse meñ darīcha de de

lāla-o-gul kī zarūrat nahīñ is gulshan ko

ho sake gar to koī phuul sā chehra de de

jism baḳhshe haiñ tamannāoñ ko jab patthar ke

dast-e-ummīd meñ sāġhar na de

tesha de de

ab na chehre pe ujala

na gareban mein sahar

aankhen KHamosh

buton ki manind

yas baadal ki tarah chhai hui

rahen ghabrai hui

ek ek aankh ne paDh li

wo ibarat yaro

jo mere chehre pe qassam-e-azal ne likhi

us ibarat ka har ek lafz bana hai kasa

main sawali nazar aane laga

sar-ta-ba-qadam

aankhen KHamosh

buton ki manind

chahta hun ki baras jaen ye aankhen

khul kar jism taza ho to shayad shagufe ki numu

jabr ki dhup mein bhi

hans paDen KHwabon ke kanwal

mere chehre pe jo likhi hai ibarat

us ke

ek ek lafz ke chehre pe ujala ho

gareban mein sahar

iltija karta hun

us qadir-e-mutlaq ke huzur

gend-e-shab mein mah-o-najm sajae jis ne

shahr-e-dil mein na sahi chand sitare lekin

us ki diwaron ke hisse mein daricha de de

lala-o-gul ki zarurat nahin is gulshan ko

ho sake gar to koi phul sa chehra de de

jism baKHshe hain tamannaon ko jab patthar ke

dast-e-ummid mein saghar na de

tesha de de