iltija

bahut māyūs ho kar maiñ tire qadmoñ meñ aayā thā

mujhe āġhosh-e-ulfat meñ chhupā letī to achchhā thā

bahut majbūr ho kar iltijā-e-rahm kī maiñ ne

mirā sar apne siine se lagā letī to achchhā thā

mire shikve mohabbat hī kā maz.har the unheñ sun kar

sukūñ-parvar nigāhoñ ko jhukā letī to achchhā thā

mohabbat ke ḳhayālī falsafe par bahs se pahle

mirī har hasrat-e-tishna miTā letī to achchhā thā

muqaddar ġhair se vābasta kar lene se kuchh pahle

ḳhulūs-e-dost dushman aazmā letī to achchhā thā

burā kyā thā agar ‘sho'la’ hī par lutf-o-karam rahtā

kisī TuuTe hue dil kī du'ā letī to achchhā thā

bahut mayus ho kar main tere qadmon mein aaya tha

mujhe aaghosh-e-ulfat mein chhupa leti to achchha tha

bahut majbur ho kar iltija-e-rahm ki main ne

mera sar apne sine se laga leti to achchha tha

mere shikwe mohabbat hi ka mazhar the unhen sun kar

sukun-parwar nigahon ko jhuka leti to achchha tha

mohabbat ke KHayali falsafe par bahs se pahle

meri har hasrat-e-tishna miTa leti to achchha tha

muqaddar ghair se wabasta kar lene se kuchh pahle

KHulus-e-dost dushman aazma leti to achchha tha

bura kya tha agar ‘sho'la’ hi par lutf-o-karam rahta

kisi TuTe hue dil ki du'a leti to achchha tha