iltija

daraḳht ko jaise do lakaḌhāre ek aare se kāTte haiñ

daraḳht chāhe ghanā ho jitnā baḌā ho jitnā

magar ye donoñ baḌe hī ārām se use kāTte haiñ socho

agar ye do kī bajā.e bas ek ho to kyā ho

ki ek ke bas kī baat hogī daraḳht ko kaaT kar girānā

nahīñ ye mumkin nahīñ hai hargiz

bahut sī dushvāriyoñ se us ko guzarnā hogā

agar vo koshish kare bhī to uljhaneñ to hoñgī

bahut se aise bhī mas.ale hoñge jin kī ḳhātir

udāsiyoñ se nirāsh ho kar

vo thak ke baiThe

mirī bhī uljhan kuchh aisī hī hai

ki hijr ye bhī daraḳht jaisā ghanā hai jānāñ baḌā hai jānāñ

akele maiñ is ko kaaT saktā huuñ tum hī socho

bahut sī dushvāriyoñ se maiñ bhī guzar rahā huuñ

agar maiñ koshish karūñ bhī to uljhaneñ bahut haiñ

bahut se aise bhī mas.ale haiñ ki jin kī ḳhātir

udāsiyoñ se nirāsh ho kar

maiñ thak ke baiThā huuñ

suno mirī ek iltijā hai

ki haath merā baTāne tum aao thoḌā jānāñ

bahut hai mumkin

ki donoñ mil kar ye hijr kāTeñ

to ye ghanā peḌ kaT giregā

daraKHt ko jaise do lakaDhaare ek aare se kaTte hain

daraKHt chahe ghana ho jitna baDa ho jitna

magar ye donon baDe hi aaram se use kaTte hain socho

agar ye do ki bajae bas ek ho to kya ho

ki ek ke bas ki baat hogi daraKHt ko kaT kar girana

nahin ye mumkin nahin hai hargiz

bahut si dushwariyon se us ko guzarna hoga

agar wo koshish kare bhi to uljhanen to hongi

bahut se aise bhi masale honge jin ki KHatir

udasiyon se nirash ho kar

wo thak ke baiThe

meri bhi uljhan kuchh aisi hi hai

ki hijr ye bhi daraKHt jaisa ghana hai jaanan baDa hai jaanan

akele main is ko kaT sakta hun tum hi socho

bahut si dushwariyon se main bhi guzar raha hun

agar main koshish karun bhi to uljhanen bahut hain

bahut se aise bhi masale hain ki jin ki KHatir

udasiyon se nirash ho kar

main thak ke baiTha hun

suno meri ek iltija hai

ki hath mera baTane tum aao thoDa jaanan

bahut hai mumkin

ki donon mil kar ye hijr kaTen

to ye ghana peD kaT girega