imkan

ḳhizāñ meñ ab phuul aane vaale haiñ

tum magar saath saath rahnā

ki ham savāb-o-ḳhatā ke qissoñ kā zikr karke

fazā ko pahle hī itnā bojhal banā chuke haiñ

ki ḳhushk pattā bhī girne lag jaa.e to havā siskiyāñ sī letī hai chīḳhtī hai

udaas lamhoñ meñ raushnī apne saath rakhnā

tum apne hāthoñ kī oT karke

charāġh laao

to yaad rakhnā ki raushnī se diyoñ ko bharnā

karam nahīñ hai

kisī pe ehsān to nahīñ hai ki ham ne kirneñ bikher dī haiñ

ki raushnī sab kī zindagī hai

guloñ kī paspā.iyoñ kī rāhoñ ko roknā ho to nuur bāñTo

ki raushnī naqd-e-zindagī hai

ḳhizāñ ke phūloñ se tum na kahnā

ga.ī rutoñ kī halāvateñ kyā thiiñ rang kyā thā

rutoñ ke zinda siyāq

murda sabāq se

apnā rabt kyā thā

hameñ rutoñ ke miTe nishānoñ se DhūñDhnā haiñ

vo naam

jo yaad rah ga.e haiñ

nishān be-nām sūratoñ ke

jo kal ugeñgī

charāġh phūloñ ke

in havāoñ meñ

jalnā mushkil haiñ

jal ga.e to

ujālā jitnā bhī ho bahut hai

KHizan mein ab phul aane wale hain

tum magar sath sath rahna

ki hum sawab-o-KHata ke qisson ka zikr karke

faza ko pahle hi itna bojhal bana chuke hain

ki KHushk patta bhi girne lag jae to hawa siskiyan si leti hai chiKHti hai

udas lamhon mein raushni apne sath rakhna

tum apne hathon ki oT karke

charagh lao

to yaad rakhna ki raushni se diyon ko bharna

karam nahin hai

kisi pe ehsan to nahin hai ki hum ne kirnen bikher di hain

ki raushni sab ki zindagi hai

gulon ki paspaiyon ki rahon ko rokna ho to nur banTo

ki raushni naqd-e-zindagi hai

KHizan ke phulon se tum na kahna

gai ruton ki halawaten kya thin rang kya tha

ruton ke zinda siyaq

murda sabaq se

apna rabt kya tha

hamein ruton ke miTe nishanon se DhunDhna hain

wo nam

jo yaad rah gae hain

nishan be-nam suraton ke

jo kal ugengi

charagh phulon ke

in hawaon mein

jalna mushkil hain

jal gae to

ujala jitna bhi ho bahut hai