inhidam

dastāvezī process mukammal huā

kāhinoñ ġhaib-dānoñ kī fitnagarī ke zamāne fanā ho ga.e

aur anjum-shanāsī ke māhir falak pe badaltī huī zindagī khoj karte hue miT ga.e

nainvā kī khudā.ī se mai kī bharī botaleñ mil ga.iiñ zā.iqe to savā the magar jaane kyuuñ kal-adam ho ga.e

maz.habī āshram kaif kī kapkapāhaT se uryāñ hoī 300 hertz kī chīḳh biphrī kisī samt se

jins-e-ādam ke kānoñ se bahne lagā ḳhuun phaTne lage phephḌe

to mashaqqat ke circle se venus kā mazdūr thakne lagā

in havāoñ meñ uḌte hoī sab parinde ḳhalāoñ meñ gum ho ga.e

yuuñ khule bāzūoñ se baġhal-gīr ushn ke abrū ḳhamīda hue to usī pal meñ ḳhushkī tarī ke sabhī fāsle miT ga.e

arsh vaale farishte muḳhātab hue vo jo naa.eb the ulTe qadam ho liye aaj kī shab sunā hai ki naqqārchī sab bulā.e ga.e

ek sayyār-e-falakī mohalle se kam ho gayā

dastawezi process mukammal hua

kahinon ghaib-danon ki fitnagari ke zamane fana ho gae

aur anjum-shanasi ke mahir falak pe badalti hui zindagi khoj karte hue miT gae

nainwa ki khudai se mai ki bhari botalen mil gain zaiqe to sawa the magar jaane kyun kal-adam ho gae

mazhabi aashram kaif ki kapkapahaT se uryan hoi 300 hertz ki chiKH biphri kisi samt se

jins-e-adam ke kanon se bahne laga KHun phaTne lage phephDe

to mashaqqat ke circle se wenus ka mazdur thakne laga

in hawaon mein uDte hoi sab parinde KHalaon mein gum ho gae

yun khule bazuon se baghal-gir ushn ke abru KHamida hue to usi pal mein KHushki tari ke sabhi fasle miT gae

arsh wale farishte muKHatab hue wo jo naeb the ulTe qadam ho liye aaj ki shab suna hai ki naqqarchi sab bulae gae

ek sayyar-e-falaki mohalle se kam ho gaya