innocence

mire bachche ne jab mujh se kahā mammā

zarā jugnū mujhe lā do

mujhe titlī ke rañgoñ ko bhī chhūnā hai

sitāre āsmāñ par hī uge haiñ kyuuñ

zamīñ par kyuuñ nahīñ aate

mujhe bas chāñd lā do us se khelūñgā

maiñ chauñk uTThī

yahī kuchh maiñ ne apnī maañ se pūchhā thā

mirā ma.asūm sā bachpan

jo muTThī se phisal kar kho gayā shāyad

mirā bachcha jo merā aaj hai

aur aane vaalā ik hasīñ kal hai

lahū meñ us kī bātoñ se hī halchal hai

ye merā qīmtī pal hai

mirā bachcha hasīñ ta.abīr ban kar sāmne hai aur

maazī ḳhvāb lagtā hai

to kyā maiñ ḳhvāb se aage nikal aa.ī

mere bachche ne jab mujh se kaha mamma

zara jugnu mujhe la do

mujhe titli ke rangon ko bhi chhuna hai

sitare aasman par hi uge hain kyun

zamin par kyun nahin aate

mujhe bas chand la do us se khelunga

main chaunk uTThi

yahi kuchh main ne apni man se puchha tha

mera masum sa bachpan

jo muTThi se phisal kar kho gaya shayad

mera bachcha jo mera aaj hai

aur aane wala ek hasin kal hai

lahu mein us ki baaton se hi halchal hai

ye mera qimti pal hai

mera bachcha hasin tabir ban kar samne hai aur

mazi KHwab lagta hai

to kya main KHwab se aage nikal aai