inqilab

āñsuoñ meñ phir jhalaktā hai lahū

aah ye TuuTe hue jām-o-subū

zalzaloñ se thartharātī hai zamīñ

pur-shikan hai rahguzāroñ kī jabīñ

bujh ga.e ‘ishq-o-basīrat ke kañval

haiñ fanā ke rahm par dasht-o-jabal

kārvāñ gumrāh rāheñ pā-shikan

ye ġhulāmoñ ke sum-ālūda kafan

ḳhuun Tapkātī rahī shāḳh-e-gulāb

kho ga.e zulmat meñ kitne āftāb

qahqahe shor-e-fuġhāñ meñ Dhal ga.e

soz-o-‘irfāñ ke nasheman jal ga.e

miT ga.iiñ rangīniyāñ rā'nā.iyāñ

haiñ bahar-sū maut kī parchhā.iyāñ

abr-pāre ḳhuun barsāne lage

mā'badoñ meñ naag lahrāne lage

ho gayā vīrān firdaus-e-ḳhayāl

ab kahāñ ehsās meñ nūr-e-jamāl

zindagī nafrat kī jānib muḌ ga.ī

bū-e-gul ban kar mohabbat uḌ ga.ī

ik talātum hai dil-e-ġhamnāk meñ

mil ga.e kitne shagūfe ḳhaak meñ

ye siyāhī nā-sazā auhām kī

ruk ga.ī haiñ gardisheñ ayyām kī

āñdhiy.oñ se jaag uTThe ḳhār-zār

muzmahil haiñ chashma-sār o jūebār

tīrgī kī rau meñ sūraj bah ga.e

zamzame ḳhāmosh ho kar rah ga.e

ye añdherī raat aur ḳhvāb-e-sahar

hai mashiyyat ḳhanda-zan insān par

roz-afzūñ shor-e-nāqūs-o-azāñ

aag kā tūfān ḳhākistar dhuāñ

ho ga.e kitne havādis be-naqāb

inqilāb ai inqilāb ai inqilāb

aansuon mein phir jhalakta hai lahu

aah ye TuTe hue jam-o-subu

zalzalon se thartharaati hai zamin

pur-shikan hai rahguzaron ki jabin

bujh gae ‘ishq-o-basirat ke kanwal

hain fana ke rahm par dasht-o-jabal

karwan gumrah rahen pa-shikan

ye ghulamon ke sum-aluda kafan

KHun Tapkati rahi shaKH-e-gulab

kho gae zulmat mein kitne aaftab

qahqahe shor-e-fughan mein Dhal gae

soz-o-‘irfan ke nasheman jal gae

miT gain ranginiyan ra'naiyan

hain bahar-su maut ki parchhaiyan

abr-pare KHun barsane lage

ma'badon mein nag lahrane lage

ho gaya viran firdaus-e-KHayal

ab kahan ehsas mein nur-e-jamal

zindagi nafrat ki jaanib muD gai

bu-e-gul ban kar mohabbat uD gai

ek talatum hai dil-e-ghamnak mein

mil gae kitne shagufe KHak mein

ye siyahi na-saza auham ki

ruk gai hain gardishen ayyam ki

aandhiyon se jag uTThe KHar-zar

muzmahil hain chashma-sar o juebar

tirgi ki rau mein suraj bah gae

zamzame KHamosh ho kar rah gae

ye andheri raat aur KHwab-e-sahar

hai mashiyyat KHanda-zan insan par

roz-afzun shor-e-naqus-o-azan

aag ka tufan KHakistar dhuan

ho gae kitne hawadis be-naqab

inqilab ai inqilab ai inqilab