insan

koī daanā ye pūchhtā thā savāl

ḳhākī insāñ meñ aisā kyā hai kamāl

naa.eb allāh kā ye ban baiThā

nahīñ miltī kahīñ bhī is kī misāl

is kā uqda nahīñ khulā ab tak

kyoñ kiyā is ko yuuñ buland-iqbāl

ye to majbūr apnī zaat meñ hai

vo ahad vo samad vo izz-o-jalāl

ye taġhayyur ke saath jiitā hai

shaan us kī kamāl-e-istiqlāl

yuuñ to maḳhlūq hai magar phir bhī

kahīñ ausāf meñ kabhī ho visāl

is kī tārīf kyā kare koī

jab majāzī sifāt-e-husn-o-jamāl

us kī tārīf kyā bayān karūñ

chāhiye ik ḳhazīnat-ul-amsāl

jam.a azdād is ke vasf meñ haiñ

aur vo ausāf meñ kamāl-e-kamāl

is ke dil ko TaToliye to kabhī

nuur hai nuur kā kabhī ibtāl

ik taraf intihā pe haiñ hasanāt

ik taraf muntahā-e-sharr-o-zalāl

kabhī aflāk tak rasā.ī hai

kabhī tahtussarā meñ rū-ba-zavāl

kabhī allāh kā payambar hai

koī fir.aun sā shanī’ ḳhisāl

kabhī inkār meñ anā rabbī

aur anal-haq kabhī ba-pesh-e-jamāl

kabhī duniyā meñ jannateñ ābād

kabhī firdaus chhoḌne pe malāl

kabhī mehnat-kashī meñ lā-sānī

aur kabhī ġharq-e-bahr-e-ḳhvāb-o-ḳhayāl

kabhī qārūn kī shahanshāhī

kabhī fāqoñ ke saath akl-e-halāl

kabhī dānish meñ ye hai aflātūn

aur kabhī fahm meñ hai jehl misāl

kabhī darmāndagī se pazhmurda

kabhī ummīd se quā haiñ bahāl

kabhī ajrām par kamand-rasā

aur kabhī zāviyoñ meñ mast bahāl

kabhī uzlat-nashīñ pahāḌoñ meñ

kabhī masrūfiyat meñ jang-o-jidāl

kabhī andesha-hā-e-sūd-o-ziyāñ

aur kabhī aql se tahī a.amāl

kabhī ta.amīr kā alam-bardār

kabhī taḳhrīb par kare na malāl

kabhī nāqūs o dair kā hai asiir

kabhī sahrāoñ meñ sadā-e-bilāl

koi dana ye puchhta tha sawal

KHaki insan mein aisa kya hai kamal

naeb allah ka ye ban baiTha

nahin milti kahin bhi is ki misal

is ka uqda nahin khula ab tak

kyon kiya is ko yun buland-iqbaal

ye to majbur apni zat mein hai

wo ahad wo samad wo izz-o-jalal

ye taghayyur ke sath jita hai

shan us ki kamal-e-istiqlal

yun to maKHluq hai magar phir bhi

kahin ausaf mein kabhi ho visal

is ki tarif kya kare koi

jab majazi sifat-e-husn-o-jamal

us ki tarif kya bayan karun

chahiye ek KHazinat-ul-amsal

jama azdad is ke wasf mein hain

aur wo ausaf mein kamal-e-kamal

is ke dil ko TaToliye to kabhi

nur hai nur ka kabhi ibtal

ek taraf intiha pe hain hasanat

ek taraf muntaha-e-sharr-o-zalal

kabhi aflak tak rasai hai

kabhi tahtussara mein ru-ba-zawal

kabhi allah ka payambar hai

koi firaun sa shani’ KHisal

kabhi inkar mein ana rabbi

aur anal-haq kabhi ba-pesh-e-jamal

kabhi duniya mein jannaten aabaad

kabhi firdaus chhoDne pe malal

kabhi mehnat-kashi mein la-sani

aur kabhi gharq-e-bahr-e-KHwab-o-KHayal

kabhi qarun ki shahanshahi

kabhi faqon ke sath akl-e-halal

kabhi danish mein ye hai aflatun

aur kabhi fahm mein hai jehl misal

kabhi darmandagi se pazhmurda

kabhi ummid se qua hain bahaal

kabhi ajram par kamand-rasa

aur kabhi zawiyon mein mast bahaal

kabhi uzlat-nashin pahaDon mein

kabhi masrufiyat mein jang-o-jidal

kabhi andesha-ha-e-sud-o-ziyan

aur kabhi aql se tahi aamal

kabhi tamir ka alam-bardar

kabhi taKHrib par kare na malal

kabhi naqus o dair ka hai asir

kabhi sahraon mein sada-e-bilal