intellectual

thā husn-e-ittifāq ki tea-corner meñ kal

qismat se merī mil ga.e ik intellectual

baiThe hue the zāviya-e-qā.ima bane

jaise mahāz par ho koī field-marshal

rakkhā thā portfolio bag ek mez par

aur us se muttasil thiiñ kitābeñ double double

moTī sī magazine bhī thī ik dharī huī

jis ke sar-e-varaq pe the sir-john-michael

yuuñ ālam-e-ḳhayāl meñ Duube hue the aap

jaise dimāġh meñ ho kisī mas.ale kā hal

uljhe hue the baal hajāmat bhī thī baḌhī

chehre pe idda.ā-e-matānat jabīn pe bal

maiñ ne ba-sad ḳhulūs-o-adab chaa.e pesh kī

aur us ke baa'd aayā ruḳh-e-guftugū nikal

mausam ke tazkire se chalī baat adab kī samt

apnī jagah par aap kā har qaul thā aTal

har baat meñ kahīñ kā havāla zarūr thā

is se ġharaz na thī ki havāla ho bar-mahal

urdu ke irtiqā kī taraf baat jab muḌī

kahne lage ki tez hai raftār āj-kal

maiñ ne kahā ki zehn abhī tak ġhulām haiñ

jaatā nahīñ dimāġh se taqlīd kā ḳhalal

afkār musta.ār haiñ taḳh.īl musta.ār

har nukta be-maqām hai har lafz be-mahal

tanqīd chheḌ-chhāḌ hai tahqīq khod-khād

chalte haiñ yuuñ qalam ki chale jis tarah se hal

afsānoñ ke mizāj meñ afsāna-pan nahīñ

is shutr-e-be-mahār kī sīdhī hai kaun kal

pariyoñ ke badle is meñ mashīnoñ kā naach hai

ik Jute mill banā hai parī-ḳhāna-e-ġhazal

pahle thā fārsī ke tatabbo par iftiḳhār

ab maġhribī adab kī ġhulāmī hai be-ḳhalal

bole fuzūl aap na bakvās kījiye

ab kārvān-e-fikr kī rāheñ ga.iiñ badal

maiñ ne kahā ki chand adīboñ kā naam leñ

apnī Dagar banā ke jo chalte haiñ āj-kal

bole ki ek monsieur-jean-paul sartre

jis ne banā diyā hai hameñ intellectual

aur dūsrā hai james-joyce adīb-e-asr

purze dil-o-dimāġh ke detā hai jo badal

maiñ ne kahā huzūr ye urdu kā thā savāl

bole ki aap bahs kareñ mujh se ye majāl

tha husn-e-ittifaq ki tea-corner mein kal

qismat se meri mil gae ek intellectual

baiThe hue the zawiya-e-qaima bane

jaise mahaz par ho koi field-marshal

rakkha tha portfolio bag ek mez par

aur us se muttasil thin kitaben double double

moTi si magazine bhi thi ek dhari hui

jis ke sar-e-waraq pe the sir-john-michael

yun aalam-e-KHayal mein Dube hue the aap

jaise dimagh mein ho kisi masale ka hal

uljhe hue the baal hajamat bhi thi baDhi

chehre pe iddaa-e-matanat jabin pe bal

main ne ba-sad KHulus-o-adab chae pesh ki

aur us ke ba'd aaya ruKH-e-guftugu nikal

mausam ke tazkire se chali baat adab ki samt

apni jagah par aap ka har qaul tha aTal

har baat mein kahin ka hawala zarur tha

is se gharaz na thi ki hawala ho bar-mahal

urdu ke irtiqa ki taraf baat jab muDi

kahne lage ki tez hai raftar aaj-kal

main ne kaha ki zehn abhi tak ghulam hain

jata nahin dimagh se taqlid ka KHalal

afkar mustaar hain taKHil mustaar

har nukta be-maqam hai har lafz be-mahal

tanqid chheD-chhaD hai tahqiq khod-khad

chalte hain yun qalam ki chale jis tarah se hal

afsanon ke mizaj mein afsana-pan nahin

is shutr-e-be-mahaar ki sidhi hai kaun kal

pariyon ke badle is mein mashinon ka nach hai

ek Jute mill bana hai pari-KHana-e-ghazal

pahle tha farsi ke tatabbo par iftiKHar

ab maghribi adab ki ghulami hai be-KHalal

bole fuzul aap na bakwas kijiye

ab karwan-e-fikr ki rahen gain badal

main ne kaha ki chand adibon ka nam len

apni Dagar bana ke jo chalte hain aaj-kal

bole ki ek monsieur-jean-paul sartre

jis ne bana diya hai hamein intellectual

aur dusra hai james-joyce adib-e-asr

purze dil-o-dimagh ke deta hai jo badal

main ne kaha huzur ye urdu ka tha sawal

bole ki aap bahs karen mujh se ye majal