intiqam

jab rāheñ sab masdūd huiiñ

sab niist huiiñ nābūd huiiñ

dushman ko khojte phirne kī

thiiñ kāvisheñ jo

be-sūd huiiñ

paspā.iyāñ jo maujūd na thiiñ

ik aan meñ aa maujūd huiiñ

maiñ soch ke ik dorāhe par

hairāñ āzurda aa pahuñchā

ye saarī tag-o-dau tanhā thī

is moḌ pe bhī tanhā pahuñchā

lekin is tanhā manzar meñ

ik chehra aur ubhar aayā

jo saaf nazar aayā na kabhī

ab itne qarīb nazar aayā

vo chehrā dushman kā chehrā

is ruup meñ pahlī baar milā

kabhī zaat ke har manzar meñ mire

kabhī manzar ke us paar milā

maiñ ḳhuub use pahchān gayā

jis ruup meñ vo jis baar milā

phir apne dil pe nazar jo kī

āmāda pa.e-paikār milā

phir maiñ ne kisī tāḳhīr binā

ik vaar bahut saffāk kiyā

ḳhud apnā garebāñ chaak kiyā

jab rahen sab masdud huin

sab nist huin nabud huin

dushman ko khojte phirne ki

thin kawishen jo

be-sud huin

paspaiyan jo maujud na thin

ek aan mein aa maujud huin

main soch ke ek dorahe par

hairan aazurda aa pahuncha

ye sari tag-o-dau tanha thi

is moD pe bhi tanha pahuncha

lekin is tanha manzar mein

ek chehra aur ubhar aaya

jo saf nazar aaya na kabhi

ab itne qarib nazar aaya

wo chehra dushman ka chehra

is rup mein pahli bar mila

kabhi zat ke har manzar mein mere

kabhi manzar ke us par mila

main KHub use pahchan gaya

jis rup mein wo jis bar mila

phir apne dil pe nazar jo ki

aamada pae-paikar mila

phir main ne kisi taKHir bina

ek war bahut saffak kiya

KHud apna gareban chaak kiya