intizar

raat kā qāfila tezī se guzar jaatā hai

naqsh-e-pā jis ke sar-e-rāh jagmagāte the

miTte jaate haiñ misl-e-harf-e-ġhalat āsmāñ ke saf.he se

maiñ ik darmāñda rāh-rau kī tarah

un kī rāhoñ meñ bichhā.e hue palkoñ ke kañval

kab se baiThā huuñ maiñ

yakkā tanhā

har ik āvāz pe dil merā dhaḌak uThtā hai

jab sabā chaltī hai ḳhushbū ko jilau meñ le kar

un kī mahkī huī zulfoñ kā ḳhayāl aatā hai

nazar uThā ke jo dekhā to

duur duur talak

un kā saaya pas-e-dīvār bhī aayā na nazar

ufuq ke paar se uThtā hai mash.aloñ kā dhuāñ

qāfila ho gayā āsūda-e-manzil shāyad

chāñd kī sham.a bujhī

dil kā diyā bujh sā gayā

aur vo sub.h kā taarā

mirī aashā kī tarah Duub gayā

ab yahāñ koī nahīñ koī nahīñ āye.gā

raat ka qafila tezi se guzar jata hai

naqsh-e-pa jis ke sar-e-rah jagmagate the

miTte jate hain misl-e-harf-e-ghalat aasman ke safhe se

main ek darmanda rah-rau ki tarah

un ki rahon mein bichhae hue palkon ke kanwal

kab se baiTha hun main

yakka tanha

har ek aawaz pe dil mera dhaDak uThta hai

jab saba chalti hai KHushbu ko jilau mein le kar

un ki mahki hui zulfon ka KHayal aata hai

nazar uTha ke jo dekha to

dur dur talak

un ka saya pas-e-diwar bhi aaya na nazar

ufuq ke par se uThta hai mashalon ka dhuan

qafila ho gaya aasuda-e-manzil shayad

chand ki shama bujhi

dil ka diya bujh sa gaya

aur wo subh ka tara

meri aasha ki tarah Dub gaya

ab yahan koi nahin koi nahin aayega