intizar

sab sitāre chāñd sūraj phuul phal ga.e

kab kahāñ aur kaun ke sab silsile ab ḳhatm haiñ

vaqt par maut aa ga.ī mausam badal ga.e

vaqt kā lamha-e-fānī le gayā sab raushnī aur rang-o-bū

ab na pyāla hai na paanī

ek korā āsmāñ hai

be-dar-o-dīvār rauzan aur benām-o-nishāñ

shakl aur shīshe kī ārā.ish kā manzar bhī nahīñ

nuur kī nazreñ bhī patthar ho ga.iiñ

ab raho tum muntazir

ḳhāk-o-ḳhūñ kī chāshnī meñ kaun ab lā.egā vasl-o-hijr ke mausam yahāñ

ab vo gum-gashta ḳhazīnoñ kī ḳhabar

phuul kī pattī meñ larzāñ phir na dekhoge kabhī

ye ḳhayāl-o-ḳhvāb kī ḳhākistarī ḳhabroñ ke din

aur ḳhvābīda nashe meñ lauTtī rātoñ kī battiyāñ gul huiiñ

ḳhāk-dāñ sab jal-bujhe

ḳhuun kī holī ke khel

terī merī zid ke saare mel-jol

vasl kī sab qurbateñ aur hijr ke sab fāsle

sab sadā.eñ aur sadiyāñ mausamoñ ke qāfile

Dhal Dhalā kar rang kī āmezishoñ ke saa.e meñ

tere mere sar se saare vaar kar

chāñdnī aur dhuup ke in nuqra.ī sikkoñ kā ruup

le uḌe haiñ kāġhazī pairāhanoñ ke dosh par

terī merī kulfatoñ aur ulfatoñ kī dāstāñ

qāfiloñ kā vaqt ab baaqī nahīñ

chhoḌ do paimā.ish-e-sūd-o-ziyāñ

daur ab reg-e-ravāñ kā ḳhatm hai

vaqt kā vaqfa nayā aa.egā bhī

phir bisāt-e-dil bichhā.eñge na.ī

phir khilegā mausam-e-gul bhī nayā

bāñdh rakh raḳht-e-safar

ai ham-safar

maiñ vahī musht-e-ġhubār-e-rah-guzar

huuñ muntazir

sab sitare chand suraj phul phal gae

kab kahan aur kaun ke sab silsile ab KHatm hain

waqt par maut aa gai mausam badal gae

waqt ka lamha-e-fani le gaya sab raushni aur rang-o-bu

ab na pyala hai na pani

ek kora aasman hai

be-dar-o-diwar rauzan aur benam-o-nishan

shakl aur shishe ki aaraish ka manzar bhi nahin

nur ki nazren bhi patthar ho gain

ab raho tum muntazir

KHak-o-KHun ki chashni mein kaun ab laega wasl-o-hijr ke mausam yahan

ab wo gum-gashta KHazinon ki KHabar

phul ki patti mein larzan phir na dekhoge kabhi

ye KHayal-o-KHwab ki KHakistari KHabron ke din

aur KHwabida nashe mein lauTti raaton ki battiyan gul huin

KHak-dan sab jal-bujhe

KHun ki holi ke khel

teri meri zid ke sare mel-jol

wasl ki sab qurbaten aur hijr ke sab fasle

sab sadaen aur sadiyan mausamon ke qafile

Dhal Dhala kar rang ki aamezishon ke sae mein

tere mere sar se sare war kar

chandni aur dhup ke in nuqrai sikkon ka rup

le uDe hain kaghazi pairahanon ke dosh par

teri meri kulfaton aur ulfaton ki dastan

qafilon ka waqt ab baqi nahin

chhoD do paimaish-e-sud-o-ziyan

daur ab reg-e-rawan ka KHatm hai

waqt ka waqfa naya aaega bhi

phir bisat-e-dil bichhaenge nai

phir khilega mausam-e-gul bhi naya

bandh rakh raKHt-e-safar

ai ham-safar

main wahi musht-e-ghubar-e-rah-guzar

hun muntazir