irfan

sho'la-zan un ke lahū meñ hai jalāl-e-mahmūd

aaj tak jo tah-e-mehrāb rahe vaqf-e-sujūd

ai ki mā'lūm nahīñ tujh ko ḳhudī kā maqsūd

ātishīñ-‘azm se hai mā’rka-e-būd-o-nabūd

'ishq-o-mastī hama-tan dabdaba-hā-e-mahmūd

paak hai asvad-o-ahmar se shabistān-e-vajūd

zindagī jis se laraztī hai ḳhalīlullāhī

ho ḳharāb-e-zan-o-taḳhmīñ to hai nār-e-namrūd

mujh se naumīdī-e-nazzāra-e-anvār na pūchh

ab mirā jazb-e-darūñ bhī hai pashemān-e-numūd

ek tasvīr ke do ruḳh haiñ jalāl aur jamāl

vahī gulzār-e-ḳhalīl aur vahī nār-e-namrūd

tū hai nā-mahram-e-tāb-o-tap-e-bātin varna

terī aahoñ se pighal jaa.e sitāroñ kā vujūd

sīna-e-lāla ho yā ā.ina-zār-e-shabnam

DhūñD letī hai nazar jalva-gah-e-lā-maujūd

ek hangāma-e-‘irfān-o-tajassus ke baġhair

ziist be-kār yaqīñ ḳhaam namāzeñ be-sūd

sho'la-zan un ke lahu mein hai jalal-e-mahmud

aaj tak jo tah-e-mehrab rahe waqf-e-sujud

ai ki ma'lum nahin tujh ko KHudi ka maqsud

aatishin-‘azm se hai ma’rka-e-bud-o-nabud

'ishq-o-masti hama-tan dabdaba-ha-e-mahmud

pak hai aswad-o-ahmar se shabistan-e-wajud

zindagi jis se larazti hai KHalilullahi

ho KHarab-e-zan-o-taKHmin to hai nar-e-namrud

mujh se naumidi-e-nazzara-e-anwar na puchh

ab mera jazb-e-darun bhi hai pasheman-e-numud

ek taswir ke do ruKH hain jalal aur jamal

wahi gulzar-e-KHalil aur wahi nar-e-namrud

tu hai na-mahram-e-tab-o-tap-e-baatin warna

teri aahon se pighal jae sitaron ka wujud

sina-e-lala ho ya aaina-zar-e-shabnam

DhunD leti hai nazar jalwa-gah-e-la-maujud

ek hangama-e-‘irfan-o-tajassus ke baghair

zist be-kar yaqin KHam namazen be-sud