is waqt to yun lagta hai

is vaqt to yuuñ lagtā hai ab kuchh bhī nahīñ hai

mahtāb na sūraj, na añdherā na saverā

āñkhoñ ke darīchoñ pe kisī husn kī chilman

aur dil kī panāhoñ meñ kisī dard kā Derā

mumkin hai koī vahm thaa, mumkin hai sunā ho

galiyoñ meñ kisī chaap kā ik āḳhirī pherā

shāḳhoñ meñ ḳhayāloñ ke ghane peḌ kī shāyad

ab aa ke karegā na koī ḳhvāb baserā

ik bair na ik mehr na ik rabt na rishta

terā koī apnā, na parāyā koī merā

maanā ki ye sunsān ghaḌī saḳht kaḌī hai

lekin mire dil ye to faqat ik hī ghaḌī hai

himmat karo jiine ko to ik umr paḌī hai

is waqt to yun lagta hai ab kuchh bhi nahin hai

mahtab na suraj, na andhera na sawera

aankhon ke darichon pe kisi husn ki chilman

aur dil ki panahon mein kisi dard ka Dera

mumkin hai koi wahm tha, mumkin hai suna ho

galiyon mein kisi chap ka ek aaKHiri phera

shaKHon mein KHayalon ke ghane peD ki shayad

ab aa ke karega na koi KHwab basera

ek bair na ek mehr na ek rabt na rishta

tera koi apna, na paraya koi mera

mana ki ye sunsan ghaDi saKHt kaDi hai

lekin mere dil ye to faqat ek hi ghaDi hai

himmat karo jine ko to ek umr paDi hai