ishq-e-mamnua

vo mujh se milā magar

qurb-o-dūrī kī is nahaj par

jahāñ amānat meñ ḳhayānat kā ḳhauf rahā

jahāñ chāshnī kā aisā daur thā

ki na din guzarne kā ilm na raat kā patā

jahāñ supurdagī kā vo aalam thā

ki do jism ek jaan kā mo.āmla

magar ajab sā ek rakh-rakhāv rahā

ham donoñ ke darmiyān

na vo dariyā ke paar utrā

na maiñ ne khole bādbān

goyā mere aur us ke biich

chand farlāñg adab kī duurī ho

us ke andar jhāñknā jaise

koī nā-qābil-e-muāfī chorī ho

jaise muqaddas kitāboñ kī jānib

be-vuzū baḌhtā huā haath

ehtirāman rok le koī

jaise sirhāne pe paḌtā huā paañv

ehtiyātan thaam le koī

jaise ulTe paḌe hue juute kī samt

fauran ruḳh āsmān se moḌ le koī

goyā us kā vajūd kisī muqaddas shai kī mānind thā

jis ko ġhair qasdan chhūnā bhī gunāh ho

goyā us kī zaat meñ safar karnā to halāl thā

magar us ke dil meñ ghar karnā harām ho

vo mujh se milā magar

qurb-o-dūrī kī us nahaj par

jahāñ amānat meñ ḳhayānat kā ḳhauf rahā

wo mujh se mila magar

qurb-o-duri ki is nahaj par

jahan amanat mein KHayanat ka KHauf raha

jahan chashni ka aisa daur tha

ki na din guzarne ka ilm na raat ka pata

jahan supurdagi ka wo aalam tha

ki do jism ek jaan ka moamla

magar ajab sa ek rakh-rakhaw raha

hum donon ke darmiyan

na wo dariya ke par utra

na main ne khole baadban

goya mere aur us ke bich

chand farlang adab ki duri ho

us ke andar jhankna jaise

koi na-qabil-e-muafi chori ho

jaise muqaddas kitabon ki jaanib

be-wuzu baDhta hua hath

ehtiraman rok le koi

jaise sirhane pe paDta hua panw

ehtiyatan tham le koi

jaise ulTe paDe hue jute ki samt

fauran ruKH aasman se moD le koi

goya us ka wajud kisi muqaddas shai ki manind tha

jis ko ghair qasdan chhuna bhi gunah ho

goya us ki zat mein safar karna to halal tha

magar us ke dil mein ghar karna haram ho

wo mujh se mila magar

qurb-o-duri ki us nahaj par

jahan amanat mein KHayanat ka KHauf raha