ishq-o-dosti

ishq ko ek nazar kaafī hai

āgahī pahle se darkār nahīñ

dostī barsoñ kī ham-rāzī hai

jaldī-bāzī kā ye bāzār nahīñ

ho bhī saktī hai kabhī vo hālat

go ho muddat kā ḳhulūs aur niyāz

ek lamha meñ banātī hai jo gat

pyārī sūrat kabhī pyārī āvāz

ġhaur-o-fikr is ke sadā haiñ ham-dast

milne-julne se hai paidā hotī

garm-joshī kī hai mai se sarmast

dostī hai mirī dekhī bhālī

aql ke us meñ karishme dekho

kuchh bigaḌtī hai kuchh iThlātī hai

jab pahuñch jaatī hai us kī tah ko

tab ba-sad faḳhr ye samjhātī hai

na sune aur na hargiz dekhe

dostoñ meñ ho agar aib bhī aah

chāhiye yuuñ nazar-andāz kare

ki havā bhī nahīñ goyā āgāh

ishq meñ us kī kahāñ hai mohlat

kuchh bhī soche sune dekhe bhāle

kyā bhalā samjheñ vo us kī hālat

us kī mai se jo na huuñ matvāle

us ke asrār se ho kaun āgāh

be-qarārī kabhī mahviyyat hai

ḳhuub 'rāsiḳh' ne kahā hai vallāh

ishq ik zor hai kaifiyyat hai

ishq ko ek nazar kafi hai

aagahi pahle se darkar nahin

dosti barson ki ham-raazi hai

jaldi-bazi ka ye bazar nahin

ho bhi sakti hai kabhi wo haalat

go ho muddat ka KHulus aur niyaz

ek lamha mein banati hai jo gat

pyari surat kabhi pyari aawaz

ghaur-o-fikr is ke sada hain ham-dast

milne-julne se hai paida hoti

garm-joshi ki hai mai se sarmast

dosti hai meri dekhi bhaali

aql ke us mein karishme dekho

kuchh bigaDti hai kuchh iThlati hai

jab pahunch jati hai us ki tah ko

tab ba-sad faKHr ye samjhati hai

na sune aur na hargiz dekhe

doston mein ho agar aib bhi aah

chahiye yun nazar-andaz kare

ki hawa bhi nahin goya aagah

ishq mein us ki kahan hai mohlat

kuchh bhi soche sune dekhe bhaale

kya bhala samjhen wo us ki haalat

us ki mai se jo na hun matwale

us ke asrar se ho kaun aagah

be-qarari kabhi mahwiyyat hai

KHub 'rasiKH' ne kaha hai wallah

ishq ek zor hai kaifiyyat hai