istiqbaal

ubal rahā hai tarannum chhalak rahī hai sharāb

piyo piyo ki na.e saal kī kiran phūTī

magar ye kaun hai har baar mujh se kahtā hai

tirā ḳhumār bhī jhūTā sharāb bhī jhūTī

vo dekho bint-e-kalīsā kī nīlgūñ āñkheñ

jhukī jhukī sī haiñ palkeñ magar subū degī

ye chīḳh haañ ye tamaddun kī ek hichkī thī

isī dayār meñ insāniyat lahū degī

magar lahū to Tapaktā hai surḳh Doroñ se

usī lahū meñ sharābor haiñ lab-o-ruḳhsār

magar ye kis kā lahū hai jo mujh se kahtā hai

mire ubaal se baḌhtā hai zindagī kā vaqār

sukūn sabr qanā.at najāt taqdīreñ

ye borzā.ī tamaddun kī istelāheñ haiñ

qadam uThe haiñ to manzil pe jā ke dam leñge

mirī nigāh meñ duniyā kī shāhrāheñ haiñ

maiñ jāntā huuñ ye tahzīb jī nahīñ saktī

yahīñ hayāt kā zaḳhmī sukūt TūTegā

kaho kaho mire jāñ-bāz sāthiyoñ se kaho

isī ufuq pe nayā āftāb ubhregā

ubal raha hai tarannum chhalak rahi hai sharab

piyo piyo ki nae sal ki kiran phuTi

magar ye kaun hai har bar mujh se kahta hai

tera KHumar bhi jhuTa sharab bhi jhuTi

wo dekho bint-e-kalisa ki nilgun aankhen

jhuki jhuki si hain palken magar subu degi

ye chiKH han ye tamaddun ki ek hichki thi

isi dayar mein insaniyat lahu degi

magar lahu to Tapakta hai surKH Doron se

usi lahu mein sharabor hain lab-o-ruKHsar

magar ye kis ka lahu hai jo mujh se kahta hai

mere ubaal se baDhta hai zindagi ka waqar

sukun sabr qanaat najat taqdiren

ye borzai tamaddun ki istelahen hain

qadam uThe hain to manzil pe ja ke dam lenge

meri nigah mein duniya ki shahrahen hain

main jaanta hun ye tahzib ji nahin sakti

yahin hayat ka zaKHmi sukut TuTega

kaho kaho mere jaan-baz sathiyon se kaho

isi ufuq pe naya aaftab ubhrega