izhaar

ek muddat huī apne jazbāt ko

maiñ ne qirtās par yuuñ utārā na thā

maiñ ne kholī kitāb aap kī

aur paḌhne ko baiThī to aisā huā

mere alfāz nazmoñ meñ Dhalne lage

aap mere taḳhayyul meñ shāyad kahīñ

jāguzīñ ik zamāne se the

mere dil meñ basī aarzū kī tarah

aap ke sab hī lafzoñ kī jādūgarī

lahza bhar meñ mirī ruuh meñ qalb meñ

yuuñ utarne lagī

mere dil ne kahā

be-ḳhabar

baat sun to mirī ġhaur se

kyā huā hai tujhe ye batā to sahī

aur maiñ

kisī but kī tarah

der tak haath meñ vo kitāb aap kī

le ke baiThī rahī

bhūrī āñkheñ mirī jaise pathrā ga.iiñ

ban ke patthar kā but dekhtī hī rahī

aur phir yuuñ huā

aap ke ḳhāl-o-ḳhad

jaise safhāt par yuuñ utar aa.e hoñ

mere chāroñ taraf nuqra.ī raushnī

raqs karne lagī

phir to mere ḳhayāloñ meñ jaan aa ga.ī

aur aisā lagā jis tarah aap ne

chhū liyā ho mujhe

garm haath apnā rakkhā mire haath par

merī āñkhoñ meñ ik raushnī jaise bharne lagī

aur maiñ aap ke bāzuoñ meñ panāh

DhūñDne lag ga.ī

aap ke lams se aap kī saañs se

mirī sochoñ meñ bhī

ik mahak sī utarne lagī

mirī palkoñ pe ḳhushiyoñ ke sau diip jalne lage

aur phir aap mere taḳhayyul meñ

bharne ko rang aa ga.e

roz-e-raushan kī mānind

ab ye yaqīñ ho chalā thā mujhe

aap mujh meñ sarāyat

is andāz se kar chuke haiñ

maiñ us vaqt anmol shai ho ga.ī thī

aur āḳhir 'duā'

is mohabbat ko maiñ

ik muqaddas sahīfa samajhte hue

aap ko chāhne lag ga.ī

ek muddat hui apne jazbaat ko

main ne qirtas par yun utara na tha

main ne kholi kitab aap ki

aur paDhne ko baiThi to aisa hua

mere alfaz nazmon mein Dhalne lage

aap mere taKHayyul mein shayad kahin

jaguzin ek zamane se the

mere dil mein basi aarzu ki tarah

aap ke sab hi lafzon ki jadugari

lahza bhar mein meri ruh mein qalb mein

yun utarne lagi

mere dil ne kaha

be-KHabar

baat sun to meri ghaur se

kya hua hai tujhe ye bata to sahi

aur main

kisi but ki tarah

der tak hath mein wo kitab aap ki

le ke baiThi rahi

bhuri aankhen meri jaise pathra gain

ban ke patthar ka but dekhti hi rahi

aur phir yun hua

aap ke KHal-o-KHad

jaise safhat par yun utar aae hon

mere chaaron taraf nuqrai raushni

raqs karne lagi

phir to mere KHayalon mein jaan aa gai

aur aisa laga jis tarah aap ne

chhu liya ho mujhe

garm hath apna rakkha mere hath par

meri aankhon mein ek raushni jaise bharne lagi

aur main aap ke bazuon mein panah

DhunDne lag gai

aap ke lams se aap ki sans se

meri sochon mein bhi

ek mahak si utarne lagi

meri palkon pe KHushiyon ke sau dip jalne lage

aur phir aap mere taKHayyul mein

bharne ko rang aa gae

roz-e-raushan ki manind

ab ye yaqin ho chala tha mujhe

aap mujh mein sarayat

is andaz se kar chuke hain

main us waqt anmol shai ho gai thi

aur aaKHir 'dua'

is mohabbat ko main

ek muqaddas sahifa samajhte hue

aap ko chahne lag gai