jab kabhi she’r ho nahin pate

terī tasvīr dekh lete haiñ

jab kabhī she'r ho nahīñ paate

phir to kyā tazkira sunā.eñ ki ham

tā-dam-e-sub.h so nahīñ paate

dekhte haiñ tirī ġhazāl āñkheñ

pahlā misra vujūd paatā hai

Dūbte haiñ jūñhī in āñkhoñ meñ

aglā misra ubhar ke aatā hai

dam-zadan meñ nazar luḌhaktī hai

tire ruḳhsār tamtamāte haiñ

ik karishma hazār rangoñ kā

she'r hī she'r hote jaate haiñ

phir na pūchho ki bas ḳhudā baḳhshe

ik 'ajab vārdāt hotī hai

isti'āroñ ke baab khulte haiñ

tere hoñToñ kī baat hotī hai

allāh allāh kyā bayāñ kiije

haiñ tire hoñT intihā-e-jamāl

baat hoñToñ pe iḳhtitām-pazīr

qat' hotī hai irtiqā-e-ḳhayāl

tire hoñToñ pe likh ke naam apnā

ham taḳhallus kī rasm karte haiñ

raat Dhaltī hai din nikaltā hai

aur ham baat ḳhatm karte haiñ

teri taswir dekh lete hain

jab kabhi she'r ho nahin pate

phir to kya tazkira sunaen ki hum

ta-dam-e-subh so nahin pate

dekhte hain teri ghazal aankhen

pahla misra wujud pata hai

Dubte hain junhi in aankhon mein

agla misra ubhar ke aata hai

dam-zadan mein nazar luDhakti hai

tere ruKHsar tamtamate hain

ek karishma hazar rangon ka

she'r hi she'r hote jate hain

phir na puchho ki bas KHuda baKHshe

ek 'ajab wardat hoti hai

isti'aron ke bab khulte hain

tere honTon ki baat hoti hai

allah allah kya bayan kije

hain tere honT intiha-e-jamal

baat honTon pe iKHtitam-pazir

qat' hoti hai irtiqa-e-KHayal

tere honTon pe likh ke nam apna

hum taKHallus ki rasm karte hain

raat Dhalti hai din nikalta hai

aur hum baat KHatm karte hain