jahan main khaDi thi

jahāñ maiñ khaḌī thī

vahāñ se qadam, do qadam hī kā rasta thā

jis jā pe mausam badalne ko tayyār baiThe the

mere ye bas meñ nahīñ thā ki maiñ

apnī khiḌkī ke aage pighalte hue

manzaroñ meñ koī

apnī marzī kā hī rang bhar duuñ

ḳhizāñ kī akaḌtī huī zard bāñhoñ ko

apne jharoke ke aage ye bad-rañg piile manāzir

sajāne se hī rok pā.ūñ

daraḳhtoñ kī mazbūt shāḳhoñ se dāman chhuḌāte

hue zard pattoñ ko rokūñ

bikharte hue phuul lachkīlī, sarsabz shāḳhoñ pe phir se ḳhilā.uñ

havāoñ kī pazhmurda sāñsoñ meñ phir zindagī dauḌ jaa.e

parindoñ kī chahkār ubhre, nadī muskurā.e

jahāñ maiñ khaḌī thī

vahāñ se qadam, do qadam hī kā rasta thā

raste meñ bikhre hue kitne pal the

adhūre safar the

magar mere bas meñ nahīñ thā ki maiñ

saare bikhre hue pal hī tartīb de duuñ

masāfat ke maare hue rāste manziloñ se milā duuñ

ulajhtī huii, sar paTaḳhtī huī tund maujoñ ke aage kināre bichhā duuñ

jahāñ maiñ khaḌī thī

vahāñ se qadam, do qadam hī kā rasta thā

jis jā pe duniyā thii, Thahrā huā vaqt thā

jis jagah zindagī thī

magar mere bas meñ nahīñ thā ki maiñ

zindagī se ye kah duuñ

ki Thahre hue vaqt se aage kuchh pal nikalne na paa.e

ye duniyā ko jā ke batā.e

mujhe saañs lene ko thoḌī jagah chāhiye

vaqt kā ek ujlā kināra mile

zindagī se kuchh aisā ishāra mile

is zamāne kā hī saath saarā mile

maiñ use jā ke kah duuñ

magar mere bas meñ nahīñ thā ki maiñ

apnī bāñheñ uThā.ūñ

qadam ko baḌhā.ūñ

nigāhoñ se us ko bulā.ūñ

use kah hī pā.ūñ

ki hai ye qadam, do qadam hī kā rasta

jahāñ maiñ khaḌī huuñ!

jahan main khaDi thi

wahan se qadam, do qadam hi ka rasta tha

jis ja pe mausam badalne ko tayyar baiThe the

mere ye bas mein nahin tha ki main

apni khiDki ke aage pighalte hue

manzaron mein koi

apni marzi ka hi rang bhar dun

KHizan ki akaDti hui zard banhon ko

apne jharoke ke aage ye bad-rang pile manazir

sajaane se hi rok paun

daraKHton ki mazbut shaKHon se daman chhuDate

hue zard patton ko rokun

bikharte hue phul lachkili, sarsabz shaKHon pe phir se KHilaun

hawaon ki pazhmurda sanson mein phir zindagi dauD jae

parindon ki chahkar ubhre, nadi muskurae

jahan main khaDi thi

wahan se qadam, do qadam hi ka rasta tha

raste mein bikhre hue kitne pal the

adhure safar the

magar mere bas mein nahin tha ki main

sare bikhre hue pal hi tartib de dun

masafat ke mare hue raste manzilon se mila dun

ulajhti hui, sar paTaKHti hui tund maujon ke aage kinare bichha dun

jahan main khaDi thi

wahan se qadam, do qadam hi ka rasta tha

jis ja pe duniya thi, Thahra hua waqt tha

jis jagah zindagi thi

magar mere bas mein nahin tha ki main

zindagi se ye kah dun

ki Thahre hue waqt se aage kuchh pal nikalne na pae

ye duniya ko ja ke batae

mujhe sans lene ko thoDi jagah chahiye

waqt ka ek ujla kinara mile

zindagi se kuchh aisa ishaara mile

is zamane ka hi sath sara mile

main use ja ke kah dun

magar mere bas mein nahin tha ki main

apni banhen uThaun

qadam ko baDhaun

nigahon se us ko bulaun

use kah hi paun

ki hai ye qadam, do qadam hi ka rasta

jahan main khaDi hun!