jahan-naward

chāk-e-taḳhlīq par ek jaisī hī aadam kī shakleñ baneñ

ruuh kī ābiyārī bhī yaksāñ huī

be-karāñ zindagī kī duā.eñ liye kitne shams-o-qamar roz ugne lage

sabz chāragarī ke sahīfe dimāġhoñ kī banjar tahoñ meñ farozāñ hue

mausamoñ ke jazīre zamīñ ke badan se nikāle ga.e

raushnī ke zaḳhīre chhupā.e ga.e āsmāñ meñ kahīñ

phir ta.affun-zada chand zehnoñ meñ taḳhrīb kī gaḌgaḌāhaT huī

be-zamīroñ ne rabb-e-musāvāt ke aa.ine reza-reza kiye

sharq aur ġharb meñ bhaiñs us kī huī

jo ma.īshat kī lāThī chalāne meñ ayyār hai

phir bhī kuchh sar-phire

qīr-gūñ jañgaloñ barf-zāroñ kī jānib

mashaqqat bharī rasm-e-duniyā nibhāne chale aa.e haiñ

un kī bāteñ musāvāt kā ruup haiñ

un ke siine samāvāt ke aa.ine

un ke hoñToñ pe rang-e-mohabbat ayaañ

un ke hāthoñ meñ parcham rahe amn kā

chaak-e-taKHliq par ek jaisi hi aadam ki shaklen banen

ruh ki aabiyari bhi yaksan hui

be-karan zindagi ki duaen liye kitne shams-o-qamar roz ugne lage

sabz chaaragari ke sahife dimaghon ki banjar tahon mein farozan hue

mausamon ke jazire zamin ke badan se nikale gae

raushni ke zaKHire chhupae gae aasman mein kahin

phir taffun-zada chand zehnon mein taKHrib ki gaDgaDahaT hui

be-zamiron ne rabb-e-musawat ke aaine reza-reza kiye

sharq aur gharb mein bhains us ki hui

jo maishat ki laThi chalane mein ayyar hai

phir bhi kuchh sar-phire

qir-gun jangalon barf-zaron ki jaanib

mashaqqat bhari rasm-e-duniya nibhane chale aae hain

un ki baaten musawat ka rup hain

un ke sine samawat ke aaine

un ke honTon pe rang-e-mohabbat ayan

un ke hathon mein parcham rahe amn ka