jahannam se pahle jahannam

gandum kī vo boriyāñ

jo hamāre hisse meñ aa.eñ

un meñ kahāniyāñ nahīñ

mare hue kirdār bhare hue the

ham bahut muddat tak talāshte rahe

apnā jalāyā gayā badan

magar koī naqsh mumāsil nahīñ thā

hamāre ḳhāl-o-ḳhad se

yā shāyad hamārā naqsha pighal chukā thā

jo badan ḳhud-ba-ḳhud nahīñ jalte

balki jhoñk diye jaate haiñ

aag kī bal khaa.ī huī rassiyoñ meñ

unheñ tumhārī ilhāmī kitāb

shahīd likhtī hai yā mahlūk

ho saktā hai hameñ ka.ī sau saal pahle tak

zinda rakkhā gayā ho reza reza tah meñ

magar ab to hameñ māchis kī tīliyoñ kī tarah

band rakhā gayā hai

makānoñ kī Dibiyoñ meñ

jahāñ apne hī laave meñ kholtī rahtī hai

hamāre zehnoñ kī hayā-bāḳhtā baġhāvat

magar ham shahīd kī darjātī sīḌhiyoñ se

gir ke apāhij ho chuke haiñ

is liye hameñ salāḳhoñ ke sunahrī jaal meñ

par phaḌphaḌāne do

kahīñ aisā na ho

tum hameñ soḳhta dīvāro kī matrūk kahāniyāñ sunāo

aur ham māchis kī tīliyoñ kī tarah

bhaḌak uTheñ aur phir........

jal ke raakh ho jaa.eñ

jalī huī tīliyoñ kī jagah kahāñ hotī hai?

ye jalāne vaale se behtar

kaun jaan saktā hai?

gandum ki wo boriyan

jo hamare hisse mein aaen

un mein kahaniyan nahin

mare hue kirdar bhare hue the

hum bahut muddat tak talashte rahe

apna jalaya gaya badan

magar koi naqsh mumasil nahin tha

hamare KHal-o-KHad se

ya shayad hamara naqsha pighal chuka tha

jo badan KHud-ba-KHud nahin jalte

balki jhonk diye jate hain

aag ki bal khai hui rassiyon mein

unhen tumhaari ilhami kitab

shahid likhti hai ya mahluk

ho sakta hai hamein kai sau sal pahle tak

zinda rakkha gaya ho reza reza tah mein

magar ab to hamein machis ki tiliyon ki tarah

band rakha gaya hai

makanon ki Dibiyon mein

jahan apne hi lawe mein kholti rahti hai

hamare zehnon ki haya-baKHta baghawat

magar hum shahid ki darjati siDhiyon se

gir ke apahij ho chuke hain

is liye hamein salaKHon ke sunahri jal mein

par phaDphaDane do

kahin aisa na ho

tum hamein soKHta diwaro ki matruk kahaniyan sunao

aur hum machis ki tiliyon ki tarah

bhaDak uThen aur phir

jal ke rakh ho jaen

jali hui tiliyon ki jagah kahan hoti hai?

ye jalane wale se behtar

kaun jaan sakta hai?