jang aur neki

ġhaur ke qābil hai duniyā kā nizām

is kā har zarra hai ibrat kā maqām

jang se hotī hai paidā muflisī

muflisī se amn ho jaatā hai aam

amn meñ qaumeñ kahāñ letī haiñ maal

maal se baḌhtā hai kibr ai nek-nām

kibr hai phir pesh-ḳhema jang kā

bas yahī chakkar hai jaarī sub.h-o-shām

aa.e din hotī haiñ yuuñ tabdīliyāñ

koī aaqā ban gayā koī ġhulām

aadmī ko zindagī meñ chāhiye

har ghaḌī kartā rahe nekī ke kaam

nekiyoñ kā 'faiz' jaarī ho agar

ḳhud-baḳhud miT jaa.eñ ye jhagḌe tamām

ghaur ke qabil hai duniya ka nizam

is ka har zarra hai ibrat ka maqam

jang se hoti hai paida muflisi

muflisi se amn ho jata hai aam

amn mein qaumen kahan leti hain mal

mal se baDhta hai kibr ai nek-nam

kibr hai phir pesh-KHema jang ka

bas yahi chakkar hai jari subh-o-sham

aae din hoti hain yun tabdiliyan

koi aaqa ban gaya koi ghulam

aadmi ko zindagi mein chahiye

har ghaDi karta rahe neki ke kaam

nekiyon ka 'faiz' jari ho agar

KHud-baKHud miT jaen ye jhagDe tamam